#Қутлуғ_кун

⚡️⚡️⚡️ Туманимизда байроғимизнинг 32 ёши муносиб нишонланди

Мустақиллик, ҳурлик, тинчлик тимсоли ҳақида гап кетса беихтиёр кўз ўнгимизга байроғимизнинг баланд-баландларда ҳилпираб туриши келади.

Халқаро мусобақаларда ғолиб чиққанидан қувониб, боши узра миллат байроғини кўтарганча майдонда югураётган спортчини кўрганимизда ғуруримиз ортиб кетиши ҳам бежиз эмас.

Бугун мустақил Ўзбекистон байроғининг қабул қилинганлигининг 32 йиллиги туманимизда муносиб нишонланди.

Жумладан, турли давлат ва жамоат идоралари, мактаб ва мактабгача таълим ташкилотларида ўтган тадбирларда байроғимизнинг озодлик, куч-қудрат, жасорат, ғалаба тимсоли эканлиги ҳақидаги фикр-мулоҳазалар билдирилди.

Мудофаасига кўмаклашувчи “Ватанпарвар” ташкилоти Паркент туман ўқув спорт техника клубининг машқ автомобилларидан ташкил топган автокарвони туманимизнинг  марказий кўчалари бўйлаб давлат байроғини ўрнатган ҳолда ҳаракатлангани замирида эса халқимизнинг ғурури, шаъни, қадр-қиммати, иродасининг ифодасини намоён бўлди, дейиш мумкин.

Бугун кун давомида ташкил этилган тадбирлар куннинг иккинчи ярмида туман ҳокимлигида байроғимиз қабул қилинганлигининг 32 йиллигига бағишланган тантанали байрам кечасига уланиб кетди.

Турли давлат ва жамоат ташкилотлари, ёшлар, жамоатчилик фаоллари иштирок этган тантанали тадбирда туманимиз санъаткорлари томонидан ватанпарварлик руҳидаги куй-қўшиқлар, ҳарбий синф ўқувчи-ёшларининг чиқишларига кенг ўрин берилди.

Байрам кечасида Паркент спорт мактаби тарбияланувчилари орасида юксак натижаларни қўлга киритиб, юртимиз байроғини халқаро мусобақаларда баланд кўтарилишига сабабчи бўлган спортчи ёшларимиз эсдалик совғалари билан тақдирланди.

👉 @PARKENT_TONGI