#Матбуот_анжумани

⚡️⚡️⚡️ “Узум сайли” ва виночилик фестивалига қай даражада тайёргарлик кўрилди?

Бугун туманимиздаги Заркент ҳудудидаги “Крушон” виночилик уйида халқаро “Узум сайли” ва виночилик фестивалига тайёргарлик кўриш ва уни юқори савияда ўтказиш бўйича олиб борилган ишлар билан ОАВ вакилларини яқиндан таништириш мақсадида матбуот анжумани бўлиб ўтди.

Унда туман ҳокими Сардор Исоқулов, Тошкент вилояти ҳокимининг ўринбосари Жамшид Бобожонов, Туризм қўмитаси бошқарма бошлиғи Азиз Мақсумов ҳамда ОАВ ходимлари иштирок этди.

Хабарингиз бор, Президентимиз Шавкат Мирзиёев томонидан 2023 йилнинг 3 август куни имзоланган “2023-2026 йилларда узумчилик ва виночилик соҳасини янада ривожлантиришга қаратилган чора-тадбирлар тўғрисида”ги Қарор талабларидан келиб чиққан ҳолда ташкил этилган халқаро “Узум сайли” ва виночилик фестивалини Тошкент вилоятининг Паркент туманида ҳар йили ўтказиш режалаштирилган эди.

Матбуот анжуманида ҳоким Сардор Исоқулов жорий йилнинг 23-24-август кунлари бўлиб ўтадиган “Узум сайли” ва виночилик фестивалига тайёргарлик кўриш ва уни юқори савияда ўтказиш бўйича бугунги кунга қадар амалга оширилган ишлар ҳақида ОАВ вакилларига атрофлича маълумот берди.

Таъкидланганидек, юртимизнинг турли ҳудудларидан ҳамда дунёнинг кўплаб давлатларидан келган меҳмонлар мамлакатимиз, шу жумладан Паркент туманининг туризм салоҳияти, қадимий узумчилик, виночилик тажрибаси, боғдорчилик маҳсулотларининг ноёб турлари ва навлари ҳақида атрофлича маълумот олишади.

Фестивалда Корея, Сингапур, Беларусь, Грузия, Озарбайжон каби 30 дан ортиқ давлатларнинг виночилик соҳасида йирик ва етакчи компаниялари вакиллари иштирок этишди.

Шунингдек, республикамизнинг 12 та вилоятидан фермер хўжаликлари, мамлакатимиз вино заводлари, табиий ичимликлар, шарбатлар ва шарбат концентратлари ишлаб чиқариш корхоналари ўз экспозициялари билан қатнашади.

Албатта, мана шундай нуфузли фестивални юқори савияда ўтказиш бўйича зарур чора-тадбирлар амалга оширилди.

Бугунги кунгача Паркент туманининг Заркент ҳудудидаги павильон ҳар томонлама тайёр ҳолатга келтирилди. Икки кун давом этадиган фестивалнинг дастури ишлаб чиқилиб, бунда энг аввало, маҳаллий ва хорижий сайёҳларни муносиб кутиб олиш, уларга қулай шарт-шароитларни яратишга катта эътибор қаратилди.

Жумладан, “Узум сайли” ва виночилик фестивали доирасида соҳанинг етук мутахассислари иштирокида илмий-амалий семинарлар ташкил этилиб, номинациялар бўйича республика кўрик-танловлари, ҳунармандчилик маҳсулотлари, миллий таомлар ва либослар кўргазмалари ҳамда бошқа маданий тадбирлар ташкил этилади.

Фестиваль доирасида мамлакатимиз, шу жумладан Паркент тумани миришкорлари етиштирган узумлар, тадбиркорларимиз тайёрлаган виноларни хориж бозорларига тўғридан тўғри чиқиши учун шартномалар ва битимлар имзоланишига эришиш мақсадида илмий-амалий семинарлар ўтказиладиган жойлар ҳар томонлама қулай ҳолатга келтирилди. Яна бир муҳим масала, фестиваль давомида узум ва вино аукциони ҳам ўтказилади.

Бундан ташқари, Паркент фарзанди, туманда узумчилик бўйича ўзига хос мактаб қолдирган Ўзбекистон Қаҳрамони Тожибой Ризаев ҳақидаги “Туганмас хазина” ҳужжатли фильми намойиши ҳам бўлиб ўтади.

Шунингдек, фестивалнинг бадиий қисмида йиғилганларга кўтаринки кайфият улашиш мақсадида фольклор жамоалари, эстрада санъаткорларининг чиқишлари, миллий урф-одат ва анъаналарни акс эттирувчи маданий дастурлар намойиши ҳам ўтказилади. Эл ардоғидаги таниқли санъаткорларимиз концерт дастурини ҳам намойиш этади.

Матбуот анжуманида ОАВ ходимлари ўзларининг қизиқтирган саволларига атрофлича жавоб олишди.

👉 @PARKENT_TONGI