#шеърият

КИМ ЎЗИ ЛИДА?

— Лида, жоним Лида! — бақирарди чол,
Уйсиз, юпун дайди, мовий кўз қари.
Гоҳи ижирғаниб, гоҳ қўрқиб хиёл,
Ўтган-кетган ундан юрарди нари.

Мен ҳам ўз йўлимда этарман давом,
Камми бу дунёда бахтсиз, ғамдийда?
Қўл силтаб қўярдим авваллар мудом,
Бу гал хаёлимдан кетмас: «Ким Лида?».

Чол деганим балки чолмасдир асли.
Соч-соқоли ўсган йигитдир ўктам.
Ким билади, бек ё валийдир насли,
Бошига тушгандир чўнг мусибат, ғам.

Ё катта олимдир, ноёб истеъдод,
Шу кўйга солгандир ҳасад лашкари.
Ёки зўр шоирдир у балки, ҳайҳот
Ташлаб кетган ўша суюган дилбари.

Ё қизидир Лида, жигаргўшаси,
Мовий кўзларида қотган изтироб.
Бевақт синиб балки ҳаёт шишаси,
Фарзанд доғи уни қилгандир хароб.

Қанча муаммолар турганда ахир,
Фикру ёдинг чирмаб олса шу савол.
«Лида ким?», туюлар менга негадир,
Дунёнинг азалий жумбоғи мисол.

Опасидир балки бечора, ғариб,
Балки синглисидур содда, ғамгусор.
Йўлига кўз тикиб ётганда оғриб,
Хабар олмагандир ҳолидан бир бор.

Лида ким? Рўшнолик кўрмаган, ёҳу,
Вафодор ёридур — жуфти ҳалоли.
Қай танноз ортидан кетганида у,
Жим, ёстиғин тишлаб қолган аёли.

Ёхуд... онасими, мансаб этиб лол,
Сўнгги сўзи нима бўлгандир армон?
Бу алам, бу фарёд чолнинг эҳтимол,
Бўғзидан отилиб чиққан пушаймон.

Лида деганлари фариштадир ё,
Чолга мадад берган, тинглаган оҳин.
Шаккок ўй кезади шуурда, илло
Балки шундай атар у ўз Илоҳин...

Йилларки, ёдимга тушар шу савол,
Ўтсам ўша маҳзун кўчадан ҳануз.
Қайта учратмадим чолни-ку, алҳол,
Лида кимлигин ҳам билмадим, афсус.

Майлига, излайин уни умрбод,
Майли, то қиёмат тополмай бироқ.
Ё Раб! Ўтган бўлса, руҳин айла шод,
Агар тирик бўлса, яшасин узоқ!

© Зоҳиджон Олов

Обуна бўлинг
🔻🔻🔻
@PARKENT_TONGI

#Шеърият

⚡️⚡️⚡️ Ало, она!

Соғинч ёмон, қўймас омон,
Боролмайман ишдан ортиб.
Эрта, дебон, индин, дебон,
Вақт умримиз олар тортиб.

Юрагингиз оҳи менман,
Кўнглингизнинг доғи менман,
Кундузимни қаро қилган,
Сочингизнинг оқи менман.

Ало, она, онажоним,
Соғинчингиз ўтди жондан,
Лек, бормоққа йўқ имконим,
Куюнманг, мен нотовондан.

Парвонаман сал «йилт» этиб,
Қайлардадир нур порласа.
Боргайдирман дарров етиб,
Олислардан ёр чорласа.

Сиз кўнасиз шу – боримга,
Қувончингиз аритдим мен.
Муштоқ айлаб дийдоримга,
Она, сизни қаритдим мен.

✍ Ботиржон Эргашев, Ўзбекистон Ёзувчилар уюшмаси аъзоси

👉 @PARKENT_TONGI

#Шеърият

⚡️⚡️⚡️ Ота дуоси

Ўғлим, сўрамасман сендан мол-дунё,
Уй ҳам қуриб берма, майли, аломат.
Майли, кўзларимга бўлмагил зиё,
Ёнимда юрсанг бас соғу саломат.

Майли, кўтармагил мени елкангда,
Қалқон ҳам бўлмагил ёғса маломат.
Бир куни ёстиққа бошим текканда
Тепамда турсанг бас соғу саломат.

✍ Абдулла Орипов

👉 @PARKENT_TONGI

#Шеърият

⚡️⚡️⚡️ Давлатинг борида

Давлатинг борида, авжинг зўрида,
Йўқлаб келар, ҳатто бегоналар ҳам.
Давлатинг йўғида, бахтинг шўрида,
Саломинг олмайди девоналар ҳам.

Давлатинг борида, уйинг тўрида,
Оёғинг ўпарлар мастоналар ҳам.
Чироғинг ўчганда, дўстки дўст, ҳатто,
Кўчангдан учмайди парвоналар ҳам.

Бўйнингга илсанг ҳам гадо тўрвасин,
Ичмагил номарднинг ёғли шўрвасин.
Оллоҳимдан сўра, бергай барчасин,
Олтинга айлангай остоналар ҳам.

Кеча ёнгинамда юргандинг, ё Раб,
Кўзим ойнасида сочларинг тараб.
Бугун изларингдан қолдим-ку қараб,
Демак, рост экан-да афсоналар ҳам.

Юлдуздай бир ёндим, ўчарман, жоним,
Ҳижрон йўқ жойларга кетарман, жоним.
Садоийдан ёдгор сенга бу қабрим,
Сарғайган дафтарим, тароналар ҳам...

✍ Шамсиддин Садоий

👉 @PARKENT_TONGI

#Шеърият

⚡️⚡️⚡️ Мени тошлар тинглашади...

Мени тошлар тинглашади, дили борга ўхшайди,
Еллар сочим силашади, қўли борга ўхшайди,
Аё дўстлар, майсаларнинг тили борга ўхшайди,
Мен дилимни хушлаб тургум, ирмоқлар куйлашганда,
Мен тилимни тишлаб тургум, япроқлар сўйлашганда.

Тиконимни тирнаманг, деб янтоқ йиғлаб ўсармиш,
Илдизларнинг табассуми куртагида кўкармиш,
Булбул бўлсанг, бедор бўл, пойингга гул чўкармиш,
Юрагимни ушлаб тургум, юлдузлар бўзлашганда,
Мен тилимни тишлаб тургум, турналар тиллашганда.

Шабнам тонгнинг шаробидир, Тангри қуёшга тутгай,
Лаб очган гул боларини интизор қиздек кутгай,
Икки ошиқ топишганда бу дунёни унутгай,
Мен дилимни хушлаб тургум, ғунчалар гуллашганда,
Мен тилимни тишлаб тургум, ошиқлар сирлашганда.

Сукунатнинг хуш созини сармаст саболар бузгай,
Айтишурлар қиз нозини ақли адолар бузгай,
Айтгим келар, дил торини ишқда гадолар узгай,
Мен дилимни тушовлагум, дилдорлар нозлашганда,
Мен жисмимдан жон овлагум, гадолар юзлашганда.

Мени тошлар тинглашади, дили борга ўхшайди,
Еллар сочим силашади, қўли борга ўхшайди,
Аё Маҳмуд, майсаларнинг тили борга ўхшайди,
Мен дилимни хушлаб тургим, майсалар тиллашганда,
Бу дунё ифордан хуш жийдалар гуллашганда.

✍ Маҳмуд Тоиров, Ўзбекистон халқ шоири

👉 @PARKENT_TONGI

#Шеърият

⚡️⚡️⚡️ Инсон ўзинг!

Шайх Муҳаммад Содиқ Муҳаммад Юсуф шундай деган эди:

"Агар Эркин Воҳидов "Инсон ўзинг" қасидасидан бошқа шеър ёзмаса ҳам, Шерали Жўраев шундан бошқа қўшиқ айтмаганида ҳам ҳар иккиси тарихда қолаверади".

Шоирнинг абадиятга муҳрланган сатрлари асло ўз аҳамиятини йўқотмайди!

👉 @PARKENT_TONGI

#Шеърият

⚡️⚡️⚡️ Мен кўрганман

Ёмғир сабаб йиғилиб
Қолган битта кўлмаксан.
Агар ёмғир ёғмаса,
Йиғилмайсан тўлмайсан.
Кўлман дея мақтанма,
Денгизни мен кўрганман.
Саҳоватда, меҳрда
Тенгсизни мен кўрганман.

Она дея мақтама,
Алла билмас аёлни.
Оналар бор алласи,
Қалқитгайдир ҳилолни.
Ўзбек деган аёли,
Чексизни мен кўрганман.

Тинчман дея мақтанма,
Тинчдир менинг диёрим.
Хирмонига битта дон
Қўшмоқликдир шиорим.
Юрти хонсиз, подшосиз,
Бексизни мен кўрганман.

✍ Усмон БЕК,
Ўзбекистон Ёзувчилар уюшмаси аъзоси