Адæймагæн йе сæфт дæр æмæ й’ амонд дæр йе ’взагыл баст ысты.
#ӕмбисонд

СОТАТЫ ХӔЙРӔГ КУЫД АСАЙДТА.
Иу хӕйрӕг фӕцагъуыд Сотатӕм хӕрзиуӕггур. Куы- иу нурыхойӕн агуырдта, куы сасир, куы цы. Иухатт та аг ракуырдта. Иӕ куыст дзы бакодта ӕмӕ йӕ фӕстӕмӕ ӕрбахаста афоныл, гыццыл аг ма йын йӕ хуылфы сӕвӕрдта, афтӕмӕй.
— Ай та ма цы у? — бадис кодтой бинонтӕ.
— Уый та уын йӕ лӕппын. Заинаг уыд уӕ аг ӕмӕ нӕ уӕларт ныззади,— дзуапп радта хӕйрӕг.
Ууыл бинонтӕ бацин кодтой, уӕлдайдӕр лӕг;
— Ацы хатт дӕр ма йӕ куы кура, уӕддӕр ын-иу ӕй ратт,— загъта уый йӕ усӕн. Иуцасдӕр рӕстӕджы фӕстӕ та хӕйрӕг Сотатӕм аггур бацыд.
Бинонтє бацин кодтой, ӕд лӕппын та нын ӕй ӕрбахӕсдзӕн, зӕгъгӕ, ӕмӕ йын ӕй рӕвдзгомау авӕрдтой. Хӕйрӕг аг ахаста ӕмӕ йӕ арф бафснайдта. Сотатьг аг куы бахъуыд, уӕд хӕйрӕджы лӕгӕты дуар хойынц, нӕ дзаума нын дӕй ӕрӕгмӕ хӕссыс, зӕгъгӕ.
— Ӕмӕ уӕ аг раджы куы амардис,— тӕфӕрфӕсгӕнӕгау сӕм радзырдта хӕйрӕг.
— Уӕд цӕмӕй?
— Зайгӕ-зайын...
— Уӕууа! — бахъыг кодтой Сотаты бинонтӕ ӕмӕ сӕ хӕдзармӕ раздӕхтысты.
Ууыл аг хӕйрӕджытӕн баззад.
#ӕмбисонд

Хæдзары бæркад æфсиныл баст у.
#ӕмбисонд

Бæлас уидагæй фидар лæууы.
#ӕмбисонд

Сусӕг зарӕг хъӕрӕй нӕ чындӕуы.

#ӕмбисонд

Сылгоймаг йе ’фсармӕй ӕхсарджын у.

#ӕмбисонд

Раздзӕуӕг раст куынӕ цӕуа, уӕд хъодыгонд кӕны.
Нывгӕнӕг Каджаты Вадим
#ӕмбисонд

Хорз куыдз лӕгӕн ӕмбал у.

Къамисӕг Тменаты Борис.
#ӕмбисонд

Чидӕр хӕсты уыди, иннӕ та йын йӕ хабӕрттӕ кодта.

#ӕмбисонд

Арахъхъ лӕгӕн йӕ сусӕг ныхӕстӕ къахы.


Каррикатура Коцойты А.
#ӕмбисонд

УӔРЫЧЧЫТӔ.
Хъӕдрӕбын фысты дзуг хызти. Дзугӕй дыууӕ уӕрыччы фӕиппӕрд ысты ’мӕ хибарӕй хизынц. Зӕронд фыс сӕм дзуры:
«Фыдуаг ма ут, уӕркотӕ! Дзугӕй дард ма цӕут, кӕннод уӕм исты замана кӕсы».
Ныр сӕм бирӕгъ дӕр йӕ цӕст дары къудзийы рӕбынӕй ӕмӕ сӕм дзыхыуаг ӕруагъта:
«Ӕгонгӕй, уӕрыччытӕ! Уыцы зӕрондмӕ ма хъусут, уый уӕм хӕлӕг кӕны.. Йӕхӕдӕг базӕронд, ӕмӕ уӕ уымӕн нӕ уадзы хицӕнӕй хизын. Ма йӕм хъусут. Згъорут бархийӕ быдырты!»
Нал байхъуыстой уӕрыччытӕ зӕронд фысмӕ ’мӕ хизгӕ-хизгӕ адард ысты дзугӕй. Бирӕгъ сӕм уӕд рагӕпп ласта къудзийы рӕбынӕй ӕмӕ сӕ ахаста.

#ӕмбисонд