Тропарь Священномученику Августину Беляеву, архиепископу Калужскому, глас 4:
Священноначальников сопрестольник и новый мучениче, / неусыпный земли нашея к Богу предстателю, / нечестие беззаконных дерзновенно отринул еси / увещая паству твою небоязненно стояти в Православии; / темже сугубым венцем венча тя Христос. / Того моли, святителю отче наш Августине, / умирити мир и спасти души наша.
ЧИТАТЬ ЖИТИЕ!

#церковный_календарь

Тропарь Пресвятой Богородице пред иконой Ея «Купятицкая».
Дне́сь ра́достно пра́зднуем па́мять явле́ния чудотво́рнаго о́браза Твоего́ в Кресте́, Влады́чице, и́же щи́т яви́ся Ве́ры Правосла́вныя, укрепля́яй и спаса́яй во дни́ тя́жких испыта́ний с ве́рою притека́ющих к Тебе́. Си́це приле́жно мо́лимся: Бу́ди всегда́ на́ша Засту́пница.

#церковный_календарь

Тропарь Преподобному Никону, игумену Радонежскому, глас 1
Послуша́ния до́брый рачи́тель быв,/ преподо́бне Ни́коне приснопа́мятне,/ Це́рковь бо прекра́сну Святы́я Тро́ицы/ в похвалу́ отцу́ твоему́ воздви́гл еси́./ Те́мже и мы, ча́да твоя́, любо́вию вопие́м ти:/ сла́ва Да́вшему ти кре́пость,/ сла́ва Венча́вшему тя,// сла́ва Де́йствующему тобо́ю всем исцеле́ния.

#церковный_календарь

Тропарь воскресный, глас 6
А́нгельския си́лы на гро́бе Твое́м,/ и стрегу́щии омертве́ша,/ и стоя́ше Мари́я во гро́бе,/ и́щущи Пречи́стаго Те́ла Твоего́./ Плени́л еси́ а́д, не искуси́вся от него́;/ сре́тил еси́ Де́ву, Да́руяй живо́т.// Воскресы́й из ме́ртвых, Го́споди, сла́ва Тебе́.

#церковный_календарь

Тропарь, глас 3
Пресла́вную му́ченик дво́ицу,/ служи́телей Та́ин Боже́ственных,/ хвалу́ Це́ркве и же́ртву свяще́нную,/ дне́сь любо́вию восхва́лим, ве́рнии,/ Алекса́ндра и Иоа́нна па́стырей на́ших,/ и́же по́двиги ве́ры и благоче́стия/ па́ству во еди́нстве соблюдо́ша/ и да́же до сме́рти за Христа́ пострада́ша,// Его́же приле́жно мо́лят спасти́ души́ на́ша.

#церковный_календарь

Молитва Святому Благоверному великому князю Александру (в схиме Алексию) Невскому
Ско́рый помо́щниче всех усе́рдно к тебе́ прибега́ющих и те́плый наш пред Го́сподем предста́телю, святы́й благове́рный кня́же Алекса́ндре! При́зри ми́лостивно на ны недосто́йныя мно́гими беззако́нии непотре́бны себе́ сотво́ршия, к ра́це моще́й твои́х (или: ико́не твое́й) ны́не притека́ющия и из глубины́ се́рдца тебе́ взыва́ющия: ты в житии́ свое́м ревни́тель и защи́тник правосла́вныя ве́ры был еси́, и нас в ней те́плыми твои́ми моли́твами непоколеби́мы утверди́. Ты вели́кое, возло́женное на тя служе́ние тща́тельно проходи́л еси́, и нас твое́ю по́мощию пребыва́ти коего́ждо, в не́же призва́н есть, наста́ви. Ты, победи́в полки́ супоста́тов, от преде́лов Росси́йских отгна́л еси́, и на нас ополча́ющихся всех ви́димых и неви́димых враго́в низложи́. Ты, оста́вив тле́нный вене́ц ца́рства земна́го, избра́л еси́ безмо́лвное житие́, и ны́не пра́ведно венце́м нетле́нным уве́нчанный, на Небесе́х ца́рствуеши, хода́тайствуй и нам, смире́нно мо́лим тя, житие́ ти́хое и безмяте́жное и к ве́чному Ца́рствию ше́ствие неукло́нное твои́м предста́тельством устро́й нам. Предстоя́ же со все́ми святы́ми Престо́лу Бо́жию, моли́ся о всех правосла́вных христиа́нах, да сохрани́т их Госпо́дь Бог Свое́ю благода́тию в ми́ре, здра́вии, и благоде́нствии, и вся́ком благополу́чии в до́лжайшая ле́та, да и при́сно сла́вим и благослови́м Бо́га, в Тро́ице Святе́й сла́вимаго Отца́, и Сы́на, и Свята́го Ду́ха, ны́не и при́сно и во ве́ки веко́в. Ами́нь.

#церковный_календарь

Тропарь Великомученице Екатерине, глас 4.

Доброде́тельми, я́ко луча́ми со́лнечными,/ просвети́ла еси́ неве́рныя мудрецы́./ И, я́коже пресве́тлая луна́ ходя́щим в нощи́/ неве́рия тьму отгна́ла еси́,/ и цари́цу уве́рила еси́,/ вку́пе же и мучи́теля обличи́ла еси́,/ Богозва́нная неве́сто блаже́нная Екатери́но,/ жела́нием востекла́ еси́ в Небе́сный черто́г/ к прекра́сному Жениху́ Христу́,/ и от Него́ ца́рским венце́м венча́лася еси́:/ Ему́же, со А́нгелы предстоя́щи,/ за ны моли́ся,// творя́щия пречестну́ю па́мять твою́.

#церковный_календарь