በታላቁ ሩጫ በኢትዮጵያ አሳየች አይቼውና ቢኒያም መሐሪ አሸነፉ

አዲስ አበባ፣ ሕዳር 8፣ 2017 (ኤፍ ቢ ሲ) በ24ኛው ታላቁ ሩጫ በኢትዮጵያ አትሌት አሳየች አይቼው እና አትሌት ቢኒያም መሐሪ አሸነፉ።

ውድድሩን ፕሬዚዳንት ታዬ አጽቀ ሥላሴ ያስጀመሩት ሲሆን፥ ከፍተኛ የመንግሥት የስራ ኃላፊዎች፣ ጥሪ የተደረገላቸው እንግዶች እና ተሳታፊዎች ተገኝተዋል።

በውድድሩ በሴቶች አትሌት አሳየች አይቼው በቀዳሚነት ስትገባ፤  አትሌት የኔዋ ንብረት ደግሞ ሁለተኛ በመሆን ውድድሩን አጠናቃለች፡፡

በወንዶች ደግሞ ቢኒያም መሐሪ ለሁለተኛ ጊዜ ታላቁ ሩጫ በኢትዮጵያን ያሸነፈበትን ድል አስመዝግቧል።

የዘንድሮው ታላቁ ሩጫ በኢትዮጵያ አዲስ አበባ የስበት ማዕከል መሆን በጀመረችበት ወቅት የተካሄደ ነው - ከንቲባ አዳነች አቤቤ


አዲስ አበባ፣ ሕዳር 8፣ 2017 (ኤፍ ቢ ሲ) የዘንድሮው ታላቁ ሩጫ በኢትዮጵያ አዲስ አበባ ዓለም አቀፍ የስበት ማዕከል መሆን በጀመረችበት ወቅት የተካሄደ ነው ሲሉ የአዲስ አበባ ከተማ አስተዳደር ከንቲባ አዳነች አቤቤ ገለጹ።

ከንቲባዋ በማህበራዊ ትስስር ገጻቸው ባስተላለፉት መልዕክት፤ የከተማችን አንዱ ድምቀት የሆነው 24ኛውን የታላቁ ሩጫ የጎዳና ውድድር ፕሬዚዳንት ታዬ አጽቀ ሥላሴ፣ ሚኒስትሮች፣ አምባሳደሮች፣ ብርቅዬ አትሌቶቻችን እንዲሁም የከተማችን ነዋሪዎች በተገኙበት ዛሬ ማለዳ አስጀምረናል ብለዋል።

ታላቁ ሩጫ ላለፉት 24 ዓመታት ኢትዮጵያን ለዓለም እያስተዋወቀ የቆየ መሆኑን አስታውሰዋል።

የዘንድሮውን ውድድር ለየት የሚያደርገው አዲስ አበባ ተዉባ፣ መንገዶቿ ሰፍተዉ፣ አምረዉና ደምቀዉ ዓለም አቀፍ የስበት ማዕከል መሆን በጀመረችበት ወቅት የተካሄደ መሆኑ ነው ሲሉም ገልጸዋል።