ከዲኤንኤ ጋር በተያያዘ የጎረቤት ሀገራት ጭምር ሊገለገሉበት የሚችል ተቋም ገንብተናል - ጠ/ሚ ዐቢይ አሕመድ (ዶ/ር)

አዲስ አበባ፣ ሕዳር 7፣ 2017 (ኤፍ ቢ ሲ) ከዲኤንኤ ጋር በተያያዘ የጎረቤት ሀገራት ጭምር ሊገለገሉበት የሚችል ተቋም ገንብተናል ሲሉ ጠቅላይ ሚኒስትር ዐቢይ አሕመድ (ዶ/ር) ገለጹ።

ጠቅላይ ሚኒስትሩ በማህበራዊ ትስስር ገጻቸው ባስተላለፉት መልዕክት፤ ዛሬ የፌዴራል ፖሊስ የፎሬንሲክ ምርመራ እና የምርምር የልህቀት ማዕከልን መርቀናል ብለዋል።

ከአንድ አመት ተኩል በፊት እንደ ሀገር የዲኤንኤ ምርመራ ሲያስፈልግ ወደ ውጭ ይላክ እንደነበር አስታውሰው፤ ዛሬ ላይ ኢትዮጵያ ከዲኤንኤ ጋር የተያያዙ ችግሮች ሲገጥማት በራሷ መስራት ብቻ ሳይሆን የጎረቤት ሀገራት ጭምር ሊገለገሉበት የሚችል ተቋም ገንብተናል በማለት ገልጸዋል።

ይህ በጸጥታ እና ደህንነት ዘርፍ ባለፉት አመታት የሰራናቸው የሪፎርም ስራዎች ውጤት ነው ሲሉ አመልክተዋል።

ማዕከሉ የዲኤንኤ ምርመራና የአቅም ግንባታ ስልጠና ይሰጣል - ም/ጠ/ሚኒስትር ተመስገን ጥሩነህ

አዲስ አበባ፣ ሕዳር 7፣ 2017 (ኤፍ ቢ ሲ) የፎረንሲክ ምርመራ እና የምርምር የልህቀት ማዕከል ለጎረቤት ሀገራትም የዲኤንኤ ምርመራና የአቅም ግንባታ ስልጠና አገልግሎቶችን መስጠት የሚችል መሆኑን ምክትል ጠቅላይ ሚኒስትር ተመስገን ጥሩነህ ገለጹ።

ምክትል ጠቅላይ ሚኒስትሩ፤ ዛሬ የተመረቀው የፌደራል ፖሊስ የፎረንሲክ ምርመራ እና የምርምር የልህቀት ማዕከል እንደ ሀገር የተጀመረው የፀጥታና ደህንነት ተቋማት ሪፎርም በርካታ ስኬቶች ውስጥ አንዱ ነው ብለዋል።

ተቋሙ ለሀገራችን ብቻ ሳይሆን ለጎረቤት ሀገራትም የዲኤንኤ ምርመራና በዘርፉ የአቅም ግንባታ ስልጠና አገልግሎቶችን መስጠት የሚችል ነው ሲሉ ገልጸዋል።

ተግባሩን ከጅምሩ እስከ ፍፃሜው ለመራችሁ፣ ለከወናችሁ እና ለደገፋችሁ ሁሉ እንኳን ደስ አላችሁ እላለሁ ሲሉ በማህበራዊ ትስስር ገጻቸው መልዕክት አስተላልፈዋል።