«Цыппурсмӕ ма дыууӕ къуырийы куы вӕййы, уӕд иуӕй-иутӕ ком бабӕттынц, мархойы хӕринаг нӕ фӕхӕрынц, стӕй Цыппурсы сӕ ком суадзынц. Цыппурсы ӕхсӕв вӕййы, ӕртыццӕджы куы баизӕр уа, уӕд. Хӕдзары лӕппу куы уа, уӕд уый уыцы изӕр ацӕуы ӕмӕ ӕртоны ӕрцыхъӕдтӕ ӕмӕ сӕ ӕрбахӕссы хӕдзармӕ. Хӕдзары йын скӕнынц ӕртӕ чъирийы, сагъд сӕ куы фӕуа, уӕдмӕ. Лӕппу йӕ худ сисы ӕмӕ ӕрцыхъӕдтӕ райдайы садзын дуӕртты уӕлкъӕсӕртыл, рудзгуыты уӕлкъӕсӕртыл, къутутыл, гӕрзтыл, мигӕнӕнтыл, ссаддонтыл, хордонтыл.;. Цӕвиттон, хӕдзары цыдӕриддӕр бӕстыхӕйттӕ уа сегасыл дӕр сагъд ӕрцӕуы ӕрцыхъӕдтӕ. Лӕппу уыдон сагъд фӕвӕййы, бацӕуы хӕдзармӕ, ӕмӕ Цыппурсы бӕрӕгбоны тыххӕй скувынц ӕрцыхъӕды чъиритӕ. Иӕхимӕ лӕппу кӕмӕн нӕ вӕййы, уый фӕзӕгъы искӕй лӕппуйӕн, ӕмӕ сын уый ныссадзы ӕрцыхъӕдтӕ. Хур куы ӕрныгуылы, уӕд алчидӕр йӕ хӕдзары дуармӕ скӕны хъӕмпӕй арт. Уыцы хъӕмпӕй артмӕ иуӕй-иутӕ рахӕссынц фиутӕ ӕмӕ сӕ фӕфизонӕг кӕнынц, арты сӕрты фӕгӕппытӕ
кӕнынц, ома ардыгӕй иннӕ ацафонмӕ хъӕлдзӕг уӕм, зӕгъгӕ. Сыхбӕстӕ Цыппурсӕхсӕв кӕрӕдзийы рахон-бахон фӕкӕнынц. Райсом та куыддӕр фӕбон вӕййы, афтӕ ӕртытӕ скӕнынц, алчи дӕр йӕ хӕдзары дуармӕ ӕмӕ кӕрӕдзийӕн арфӕтӕ фӕкӕнынц, кӕрӕдзийы хӕдзӕрттӕм лыстытӕ фӕхӕссынц ӕмӕ фӕдзурынц, цал къӕцӕлы дзы ис, уал азы уыл хъӕлдзӕгӕй цӕуӕд, зӕгъгӕ. Уыцы бон адӕм бӕрӕгбон скӕнынц, ничи фӕкусы. Уыцы бонмӕ иу сауджын дӕр цӕттӕ лӕууыд ӕмӕ ма-иу уый дӕр адӕмы стӕрсын кодта, куыстмӕ чи ацӕуа, уый фӕивар кӕнынӕй...»

КЪАРДЖИАТЫ МАКЪАРЫ ФЫРТ БЕКЫЗӔ
(1893 - 1937)
«ОСЕТИНСКИЕ ОБЫЧАИ И ОБРЯДЫ»
#ЦЫППУРС
#РОЖДЕСТВО_ХРИСТОВО