#МИННАТДОРЛИК

Наманган тумани, Шўрқўрғон қишлоғининг «Кўл бўйи» маҳалласи билан Сарой гузарини боғловчи асосий катта йўл кўп йиллардан буён абгор ҳолатда эди. Бугун ўша 700 метр қисмига асфальт босилди. Энди эса текис-равон ва серқатнов кўчадан юраётган одамлар, транспорт ҳайдовчилари хурсанд.

Наманган вилояти раҳбариятига йўллаган мурожаатимиз эътиборсиз қолдирилмади. Вилоят автомобиль йўлларидан фойдаланиш бошқармаси бошлиғи Акрамжон Ҳамдамов томонидан масала дарров назоратга олинди. Ижтимоий тармоқларда чиққан барча фото ва видеоматериаллар тўпланиб, жойига бориб ўрганилди, ишга киришилди. Бошқарма ахборот хизмати раҳбари Райҳона Эркинова ҳудуддаги жараёндан тезкор хабардор этилди, у вазият ҳақида мутасаддиларга маълумот етказиб турди.

Масъулларнинг айтишича, ер теккисланиб ва қотирилганидан сўнг бажарилган топшириқ сифатли якунланди. Фурсатдан фойдаланиб, йўлсозларга қишлоғимиз ва маҳалла аҳли номидан алоҳида миннатдорлик билдирамиз.

Орифжон ЖЎРАЕВ,
журналист.