#Qonunchilikdagi_yangiliklar

❗️Fuqarolik jamiyati institutlarini davlat tomonidan qo‘llab-quvvatlash takomillashtirildi

Batafsil 👉infografikada

@adliyangiliklari

#Qonunchilikdagi_yangiliklar

❗️Intellektual mulk obyektlarini huquqiy himoya qilish tizimi yanada takomillashtiriladi

Prezident tomonidan imzolangan qonun (OʻRQ-959-son, 10.09.2024 y.) bilan ayrim qonun hujjatlariga qoʻshimcha va oʻzgartirishlar kiritildi

Unga koʻra, intellektual mulk obyektlaridan qonunga xilof ravishda foydalanganlik uchun huquq egasining talabiga koʻra huquqbuzar tomonidan tovon toʻlash tartib-taomili joriy etilishini nazarda tutuvchi qoʻshimcha va oʻzgartirishlar kiritilmoqda.

Jumladan, “Ixtirolar, foydali modellar va sanoat namunalari toʻgʻrisida”gi Qonunga kiritilgan qoʻshimchaga koʻra:

Patent egasi oʻzining mutlaq huquqini buzgan holda sanoat mulki obyektidan foydalanayotgan shaxsdan zararlarning qoplanishi oʻrniga BHMning 20 baravaridan 1000 baravarigacha miqdorda tovon toʻlashini talab qilishi mumkin.

Bunda tovon zararlar yetkazilishi faktidan qatʼi nazar, huquqbuzarlikning xususiyatidan va patent egasining mutlaq huquqini buzgan holda sanoat mulki obyektidan foydalanayotgan shaxsning aybi darajasidan kelib chiqib, ish muomalasi odatlari hisobga olingan holda toʻlanadi.

Tovon miqdori taraflarning kelishuviga muvofiq yoki sud tomonidan belgilanadi.

Ilgari bunday normalar mavjud emas edi.

⚠️ Qonun rasmiy eʼlon qilingan kundan eʼtiboran 3 oy oʻtgach kuchga kiradi.

@adliyangiliklari

#Qonunchilikdagi_yangiliklar

❗️Bir fuqaroga bir necha marta saylov byulletenini berganlik uchun javobgarlik belgilandi

Manba: O‘RQ-953-son, 29.08.2024-y.

@adliyangiliklari

#Qonunchilikdagi_yangiliklar

O‘zbekiston Respublikasi Adliya vazirligi tomonidan Ishlab chiqaruvchilar va import qiluvchilar tomonidan qayta ishlanishi to‘g‘risidagi ma’lumot ko‘rsatilishi majburiy bo‘lgan tovarlarning ro‘yxati va ularning belgilari (ro‘yxat raqami 3576, 2024-yil 19-noyabr) davlat ro‘yxatidan o‘tkazildi.

Xususan, mazkur idoraviy normativ-huquqiy hujjatda ishlab chiqaruvchilar hamda import qiluvchilar tomonidan plastmassalar, qog‘ozlar, metallar, yog‘och va yog‘och materiallari, to‘qimachilik, shishalar, kompozit materiallar, batareya va akkumulatorlar uchun qayta ishlanishi to‘g‘risidagi ma’lumot ko‘rsatilishi majburiy bo‘lgan belgilar ko‘rsatib o‘tilgan.

Ta’kidlash lozimki, yuqoridagi idoraviy normativ-huquqiy hujjat loyihasini jamoatchilik muhokamasidan o‘tkazish jarayonida tadbirkorlik subyektlari tomonidan bildirilgan takliflar asosida ushbu hujjat rasmiy e’lon qilingan kundan e’tiboran o‘n sakkiz oydan keyin kuchga kirishi belgilandi.

Ma’lumot uchun: Ishlab chiqaruvchilar va import qiluvchilar tomonidan qayta ishlanishi to‘g‘risidagi ma’lumot ko‘rsatilishi majburiy bo‘lgan tovarlarning ro‘yxati va ularning belgilari avval Adliya vazirligida davlat ro‘xatidan o‘tkazilmasdan Ekologiya, atrof-muhitni muhofaza qilish va iqlim o‘zgarishi vazirligi hamda Vazirlar Mahkamasi huzuridagi O‘zbekiston texnik jihatdan tartibga solish agentligi tomonidan amalga kiritilgan bo‘lib, ushbu hujjat Adliya vazirligining tegishli taqdimnomasiga asosan bekor qilingan.

📌 Kanalga ulanish

#Qonunchilikdagi_yangiliklar

Oʻzbekiston Respublikasi Adliya vazirligi Ish beruvchilar tomonidan fuqarolarning shaxsiy jamgʻarib boriladigan pensiya hisobvaraqlariga majburiy jamgʻarib boriladigan pensiya badallarini hisoblash va toʻlash tartibi toʻgʻrisidagi nizom (roʻyxat raqami 3577, 20.11.2024-y.) davlat roʻyxatidan oʻtkazdi.

Ushbu Nizomda ish beruvchilar tomonidan fuqarolarning shaxsiy jamgʻarib boriladigan pensiya hisobvaraqlariga majburiy jamgʻarib boriladigan pensiya badallarini hisoblash va toʻlash tartibi belgilangan.

Xususan ish beruvchilar fuqarolarning jamgʻarib boriladigan pensiya hisobvaraqlariga pensiya badallarini byudjetga jismoniy shaxslardan olinadigan daromad soligʻini toʻlash bilan birgalikda jismoniy shaxslardan olinadigan daromad soligʻini toʻlash uchun belgilangan muddatlarda ajratadi.

Bunda, ish beruvchi har oyda hisobot oyidan keyingi oyning 15-kuniga qadar jamgʻarib boriladigan pensiya badallari oʻtkazilgan har bir toʻlov hujjati summasiga alohida, shaxsiy jamgʻarib boriladigan pensiya hisobvaraq raqamlari, har bir xodimning familiyasi, hisoblangan ish haqi va jamgʻarib boriladigan pensiya badallari summasi koʻrsatilgan holda xodimlar reyestrlarini elektron hujjat sifatida shakllantirib, tegishli Xalq banki filialiga taqdim etishi yoki uni Yagona interaktiv davlat xizmatlari portali orqali elektron bazasiga yuborishi shart.

Maʼlumot uchun: “Fuqarolarning jamgʻarib boriladigan pensiya taʼminoti toʻgʻrisida”gi Qonunning 10-moddasida, jismoniy shaxslarning qonunchilikka muvofiq hisoblab chiqarilgan daromad soligʻining tegishlicha kamaytirilgan summasi hisobiga jamgʻarib boriladigan majburiy pensiya badallarini ish beruvchi har oyda toʻlab borishi nazarda tutilgan.

📌 Kanalga ulanish

#Qonunchilikdagi_yangiliklar

Oʻzbekiston Respublikasi Adliya vazirligi tomonidan Bojxona toʻlovlarini toʻlashning bosh taminotini qoʻllash tartibi toʻgʻrisidagi nizom (roʻyxat raqami 3579, 2024 yil 21-noyabr) davlat roʻyxatidan oʻtkazildi.

Ushbu Nizomda bojxona toʻlovlarini toʻlashning bosh taminotini qoʻllash tartibi belgilandi.

Bojxona toʻlovlarini toʻlashning bosh taminoti ayni bir shaxs tomonidan muayyan vaqt ichida bir nechta bojxona operatsiyalarini bajarish chogʻida yuzaga keladigan bojxona toʻlovlarining toʻlanishini bank kafolatini taqdim etish, sugʻurtalash yoki tovarlarni garovga qoʻyish orqali taʼminlash hisoblanadi.

Toʻlovchi bosh taʼminotni Bojxona kodeksining 336, 337 va 338-moddalarida belgilangan hollarda yuzaga keladigan bir yoki bir nechta majburiyat boʻyicha istalgan vaqtda taqdim etishi mumkin.

Bosh taʼminot:
➖taʼminlov hujjatlarining (bank kafolati, sugʻurta polisi yoxud garov shartnomasi) amal qilish muddatlari toʻlovchining bojxona toʻlovlarini toʻlash muddatlaridan koʻp boʻlganda;
➖bojxona toʻlovlari bosh taʼminot hisobidan undirilishi mumkin boʻlganda qabul qilinadi.

Bosh taʼminotni qabul qilish uchun ariza Bojxona qoʻmitasiga yozma yoki uning rasmiy veb-sayti orqali elektron tarzda berilishi mumkin.

Bojxona qoʻmitasi tomonidan ariza 10 ish kuni ichida koʻrib chiqiladi hamda bosh taʼminotni qabul qilish yoki uni qabul qilishni rad etish haqida qaror chiqariladi.

Bosh taʼminotni qabul qilish haqidagi arizani koʻrib chiqish hamda bosh taʼminotni qabul qilish haqida qaror chiqarish uchun yigʻim undirilmaydi.

📌 Kanalga ulanish

#Qonunchilikdagi_yangiliklar

Tijorat banklarining likvidliligini favqulodda qoʻllab-quvvatlash uchun kreditlar ajratish tartibi toʻgʻrisidagi nizom tasdiqlandi

Adliya vazirligi tomonidan Oʻzbekiston Respublikasi Markaziy banki tomonidan tijorat banklarining likvidliligini favqulodda qoʻllab-quvvatlash uchun kreditlar ajratish tartibi toʻgʻrisidagi nizom (roʻyxat raqami 3581, 2024 yil 10-dekabr) davlat roʻyxatidan oʻtkazildi.

Ushbu nizomda Markaziy bank tomonidan tijorat banklarining likvidliligini favqulodda qoʻllab-quvvatlash uchun kreditlar ajratish tartibi belgilandi.

Markaziy bank banklarda likvidlilikning vaqtinchalik taqchilligi yuzaga kelgan hollarda toʻlovlar uzluksizligi va bank tizimi barqarorligini taʼminlashda soʻnggi chora sifatida toʻlovga qobiliyatli va barqaror boʻlgan bankka maqbul aktivlar garovi asosida kredit taqdim etishi mumkin.

Kredit Markaziy bank tomonidan belgilangan limit doirasida ikki haftagacha boʻlgan muddatga likvidlilikni tiklash rejasi va pul oqimlari prognoziga asosan kunlik taqdim etib borish orqali ajratiladi. Mazkur ikki haftalik kredit bankning soʻrovnomasiga asosan toʻliq, qisman va (yoki) qoʻshimcha kredit taqdim etish orqali uch oygacha boʻlgan muddatga uzaytirib borilishi mumkin.

Bank kredit olish uchun likvidlilikning vaqtinchalik taqchilligi holatini batafsil asoslantirgan holda soʻrovnomani Markaziy bankka yozma yoki elektron shaklda taqdim etadi.

Markaziy bank bankning kredit olish boʻyicha soʻrovnomasini u kelib tushgan kundan boshlab 3 bank ish kuni ichida koʻrib chiqadi hamda kreditni ajratish yoki kredit ajratishni rad etish toʻgʻrisida qaror qabul qiladi.

Markaziy bank tomonidan bankka kreditni ajratish toʻgʻrisida qaror qabul qilinganda, Markaziy bank bilan bank oʻrtasida qonunchilikda belgilangan tartibda kredit hamda garov shartnomalari rasmiylashtiriladi.

Kredit bank aktivlari bilan toʻliq taʼminlangan boʻlishi shart.

📌 Kanalga ulanish

#Qonunchilikdagi_yangiliklar

Bir yillik statistika dasturini hisoblash metodikasi davlat roʻyxatidan oʻtkazildi

Adliya vazirligi tomonidan Bir yillik statistika dasturini hisoblash metodikasi (roʻyxat raqami 3582, 2024-yil 10-dekabr) davlat roʻyxatidan oʻtkazildi.

Ushbu metodikada Statistika agentligi tomonidan bir yillik statistika dasturining qiymatini hisoblash, statistika maʼlumotlariga boʻlgan ehtiyojlarni aniqlash, bir yillik statistika dasturini ishlab chiqish va tasdiqlash tartibi belgilandi.

Statistika dasturining qiymati davlat statistika organlari hamda Statistika agentligining Kadrlar malakasini oshirish va statistik tadqiqotlar institutini saqlab turish xarajatlari summasini hisoblash yoʻli bilan aniqlanadi.

Statistika dasturining qiymati Statistika agentligi tomonidan hisoblab chiqariladi hamda Statistika dasturida belgilanadi.

Statistika dasturi foydalanuvchilarning statistika maʼlumotlariga boʻlgan ehtiyojlarini oʻrganish va ulardan kelib tushgan takliflarni koʻrib chiqish natijalari asosida Statistika agentligi tomonidan ishlab chiqiladi hamda har yili yakuniga qadar Statistika kengashi tomonidan tasdiqlanadi.

Statistika dasturida belgilangan va amalga oshirilgan statistika ishlari uchun haq toʻlash statistika ishlarini bajarishga shartnoma
va Statistika agentligi tomonidan har oyda taqdim etiladigan bajarilgan ishlar dalolatnomalari asosida amalga oshiriladi.

📌 Kanalga ulanish

#Qonunchilikdagi_yangiliklar

Oʻzbekiston Respublikasi Adliya vazirligi tomonidan Davlat organlari va tashkilotlarining ichki audit xizmati xodimlarining faoliyati samaradorligini baholash tartibi toʻgʻrisidagi nizom (roʻyxat raqami 3583, 2024-yil 12-dekabr) davlat roʻyxatidan oʻtkazildi.

Ushbu Nizomda ichki audit xizmati tashkil etilgan vazirlik va idoralar, Qoraqalpogʻiston Respublikasi Vazirlar Kengashi, viloyatlar va Toshkent shahri hokimliklarining ichki audit xizmatlari rahbari va xodimi faoliyatining samaradorligini eng muhim koʻrsatkichlar asosida baholash, ularni ragʻbatlantirish va reytingini yuritish tartibi belgilandi.

Ichki audit xizmatlari xodimi faoliyatining eng muhim samaradorlik koʻrsatkichlari etib byudjet toʻgʻrisidagi qonunchilik buzilishi holatlarining oldini olishdagi natijalari, masofaviy nazoratni amalga oshirishdagi natijalari, ichki audit yillik rejasida xodim masʼul boʻlgan ichki audit tadbirlarining oʻtkazilishi hamda xodim tomonidan berilgan taklif va tavsiyalarning ichki audit obyektlari tomonidan bajarilishi belgilandi.

Xodim faoliyatining samaradorligi koʻrsatkichlarini hisoblash natijalari har chorak hisobot davridan keyingi oyning 5-sanasiga qadar belgilangan shaklda baholash tizimini joriy etish va ishlashini monitoring qilish boʻyicha masʼul tarkibiy tuzilmaga kiritiladi.

Davlat organlari va tashkilotlari tomonidan Iqtisodiyot va moliya vazirligiga xodim faoliyatining samaradorligi yigʻma koʻrsatkichlari va uning baholanishi boʻyicha maʼlumotlar hisobot choragidan keyingi oyning 20-sanasiga qadar taqdim etiladi.

📌 Kanalga ulanish

#Qonunchilikdagi_yangiliklar

Kripto-aktivlar aylanmasi sohasida provayderlik faoliyatini amalga oshirish uchun litsenziya uchun qancha davlat boji undiriladi?

Adliya vazirligi tomonidan Kripto-aktivlar aylanmasi sohasidagi xizmatlar provayderlari faoliyatini amalga oshirishga litsenziyalar berilganligi uchun davlat boji miqdorlari (roʻyxat raqami 3584, 2024 yil 17-dekabr) davlat roʻyxatidan oʻtkazildi.

Kripto-aktivlar aylanmasi sohasidagi xizmatlar provayderlari faoliyatini amalga oshirishga litsenziyalar berilganligi uchun davlat boji miqdorlari quyidagicha belgilandi:
➖kripto-birja uchun – BHMning 73 400 baravari;
➖mayning-pul uchun – BHMning 3 000 baravari;
➖kripto-depozitariy uchun – BHMning 7 000 baravari;
➖kripto-doʻkon uchun – BHMning 3 700 baravari.

📌 Kanalga ulanish

#Qonunchilikdagi_yangiliklar

Adliya vazirligi tomonidan Inson aʼzolari va (yoki) toʻqimalari donorligiga qarshi koʻrsatma boʻladigan kasalliklar roʻyxati (roʻyxat raqami 3585, 17.12.2024-y.) davlat roʻyxatidan oʻtkazildi.

Ushbu hujjat bilan inson aʼzolari va (yoki) toʻqimalari donorligiga qarshi koʻrsatma boʻladigan kasalliklar roʻyxati tasdiqlangan.

Xususan, ushbu roʻyxatda tirik donor uchun transplantatsiya obyektlari buyrak, jigar va jigar boʻlagi hamda gematopoetik suyak koʻmigining oʻzak hujayralari transplantatsiyasiga qarshi koʻrsatma boʻladigan kasalliklar nazarda tutilgan (masalan, OIV/OITS, narkomaniya, toksikomaniya, alkogolizm, morbid semizlik, arterial gipertenziya II-III darajasi, surunkali buyrak kasalligi II-III-IV-V bosqichi, qandli diabet, ikki tomonlama siydik tosh kasalligi, xavfli oʻsma kasalliklari).

Shuningdek, inson murdasi uchun transplantatsiya obyektlari buyrak, jigar va jigar boʻlagi, tomirlar (yirik tomirlar qismlari) va koʻz shox pardasi hamda uning qismlari transplantatsiyasiga qarshi koʻrsatma boʻladigan kasalliklar belgilangan (masalan, OIV/OITS, tuberkulyoz, sepsis, zambrugʻli kasalliklar, TORCH-infeksiyasi (IgM pozitiv), oʻta xavfli infeksion kasalliklar, xavfli oʻsma kasalliklari).

📌 Kanalga ulanish

#Qonunchilikdagi_yangiliklar

Adliya vazirligi tomonidan Atmosfera havosini ifloslantiruvchi manbalarni xatlovdan oʻtkazish hamda unga tashlanayotgan ifloslantiruvchi moddalar miqdorini belgilash toʻgʻrisidagi yoʻriqnoma davlat roʻyxatidan oʻtkazildi (roʻyxat raqami 3586, 19.12.2024-y.).

Yoʻriqnomaga koʻra, atmosfera havosini ifloslantiruvchi manbalarni xatlovdan oʻtkazish ushbu ifloslantiruvchi moddalarni chiqaruvchi tashkilotlar (obyektlar) tomonidan amalga oshiriladi.

Atmosfera havosini ifloslantiruvchi manbalarni xatlovdan oʻtkazish quyidagi bosqichlarda amalga oshiriladi:
➖xatlovdan oʻtkazishga tayyorgarlik koʻrish va xatlovdan oʻtkazishda oʻlchashlar olib borish va hisob-kitob ishlarini bajarish;
➖xatlovdan oʻtkazish natijalarini rasmiylashtirish, kelishish va tasdiqlash.

Obyekt rahbari tomonidan atmosfera havosini ifloslantiruvchi manbalarni xatlovdan oʻtkazish natijalari boʻyicha tuzilgan materiallar tasdiqlanib, ushbu materiallarni koʻrib chiqish uchun bir ish kun ichida hududiy ekologiya organiga taqdim etiladi.

Obyekt rahbari tomonidan taqdim etilgan materiallarda kamchiliklar aniqlanmagan taqdirda ushbu materiallar hududiy ekologiya organi tomonidan 15 kun ichida kelishiladi.

Atmosfera havosini ifloslantiruvchi manbalarni xatlovdan oʻtkazish natijalari asosida obyekt rahbari tomonidan ruxsat etilgan chegaraviy tashlama (RECHT) materiallari ishlab chiqilib, tasdiqlanadi.

Bunda, I toifaga mansub obyektlar uchun Davlat ekologik ekspertizasi markazi, II va III toifaga mansub obyektlari uchun Davlat ekologik ekspertizasi markazining hududiy filiallari tomonidan RECHT materiallari yigirma kun ichida koʻrib chiqiladi.

Obyekt rahbari tomonidan taqdim etilgan RECHT materiallarida kamchiliklar aniqlanmagan taqdirda ushbu materiallar Davlat ekologik ekspertizasi markazi va uning hududiy filiallari tomonidan kelishiladi.

▫️I, II va III toifaga mansub obyektlar uchun RECHT besh yil muddatga amal qiladi.
▫️IV toifadagi obyektlar uchun RECHT ishlab chiqilmasdan xatlov natijalari asosida olingan haqiqiy maʼlumotlar boʻyicha oʻrnatiladi.

Maʼlumot uchun: Hukumatning 2020-yil 7-sentyabrdagi 541-son qarorida I toifaga aeroport, atom stansiyalari, suv omborlari va toʻgʻonlar, II toifaga aerodrom, temir yoʻl depolari, III toifaga avtomobilga yonilgʻi va gaz quyish stansiyalari, avtopark, IV toifaga paxta titish sexlari, gilam toʻqish sexlari va boshqalar kirishi nazarda tutilgan.

Ishlab chiqarish texnologiyasi, foydalanilayotgan xom-ashyo tarkibi, ifloslantiruvchi moddalarning miqdori va tarkibi oʻzgarmagan obyektlar uchun RECHT ning muddati tugagan hollarda ushbu muddat yana besh yil muddatga uzaytiriladi.

📌 Kanalga ulanish

#Qonunchilikdagi_yangiliklar

X.Sulaymonova nomidagi Respublika sud ekspertiza markazining Toshkent viloyati hududiy boʻlimi tashkil etiladi

“Oʻzbekiston Respublikasi Adliya vazirligi huzuridagi X. Sulaymonova nomidagi Respublika sud ekspertiza markazi faoliyatini yanada takomillashtirish toʻgʻrisida”gi Hukumat qarori (849-son, 18.12.2024-y.) qabul qilindi.

Qarorga koʻra, X. Sulaymonova nomidagi Respublika sud ekspertiza markazining Toshkent viloyati hududiy boʻlimi tashkil etiladi.

2026-yil 1-iyungacha Sud ekspertiza markazining Toshkent viloyati boʻlimini xalqaro standartlar bilan uygʻunlashgan davlat standarti talablariga javob beradigan binoga joylashtirish hamda maxsus mebel, kompyuterlar, boshqa zarur texnika va inventarlar, shuningdek, yuqori malakali professional kadrlar bilan taʼminlash choralari koʻriladi.

Sud ekspertiza markazida isteʼmol mahsulotlari tarkibida genetik modifikatsiyalangan organizmlar (GMO) mavjudligi va ichimlik suvining tarkibini aniqlashga qaratilgan tadqiqotlarni amalga oshiruvchi Isteʼmol mahsulotlari va ichimlik suvi tarkibini tahlil qilish laboratoriyasi tashkil qilinadi.

Sud ekspertiza markazining hududiy boʻlimlarida quyidagi ekspertiza va tadqiqot turlari bosqichma-bosqich joriy etiladi:
➖2025-yil 1-oktyabrgacha Sud ekspertiza markazining Navoiy viloyati boʻlimida Materiallar, ashyolar va buyumlar kriminalistik ekspertizasi laboratoriyasi hamda Sud-xatshunoslik va hujjatlarning sud-texnikaviy ekspertizalari;
➖2026-yil 1-noyabrgacha Sud ekspertiza markazining Qoraqalpogʻiston Respublikasi boʻlimida Sud-fonografiya, sud-yongʻin texnika va elektrotexnika ekspertizalari;
➖2026-yil 1-dekabrgacha Sud ekspertiza markazining Qashqadaryo viloyati hududiy boʻlimida Materiallar, ashyolar va buyumlar kriminalistik ekspertizasi laboratoriyasi hamda Sud-xatshunoslik va hujjatlarning sud-texnikaviy ekspertizalari.

📌 Kanalga ulanish

#Qonunchilikdagi_yangiliklar

Chet el valyutasidagi operatsiyalarni buxgalteriya hisobida aks ettirish tartibi belgilandi

Adliya vazirligi tomonidan Oʻzbekiston Respublikasi buxgalteriya hisobining milliy standarti (22-sonli BHMS) “Chet el valyutasida ifodalangan aktivlar va majburiyatlarning hisobi” (roʻyxat raqami 3587, 2024-yil 19-dekabr) davlat roʻyxatidan oʻtkazildi.

Ushbu BHMSda yuridik shaxslarning chet el valyutasidagi operatsiyalarini hamda chet eldagi shuʼba va qaram xoʻjalik jamiyatlarining maʼlumotlarini buxgalteriya hisobida aks ettirish va ularni moliyaviy hisobotda yoritib berish tartibi belgilandi.

Yuridik shaxslarning chet el valyutasidagi operatsiyalari ularni amalga oshirish sanasidagi chet el valyutasining soʻmga nisbatan Oʻzbekiston Respublikasi Markaziy bankining kursi boʻyicha tan olinadi.

Yuridik shaxslar moliyaviy hisobotni tuzishda chet el valyutasidagi aktivlari va majburiyatlarining qiymatini soʻmda qayta hisoblashi lozim.

Yuridik shaxslar chet eldagi shuʼba va qaram xoʻjalik jamiyatlarining moliyaviy hisobotlarini konsolidatsiyalashgan moliyaviy hisobotga kiritishda ularning chet el valyutasidagi aktivlari va majburiyatlarini hisobot davrining oxirgi sanasidagi Markaziy bank kursi boʻyicha qayta hisoblashi kerak.

Yuridik shaxslarning moliyaviy natijalariga olib boriladigan kurs farqlari summasi va boshqa maʼlumotlar moliyaviy hisobotga izohlarda yoritib berilishi lozim.

📌 Kanalga ulanish

#Qonunchilikdagi_yangiliklar

Koʻchmas mulkka boʻlgan huquqlarni davlat roʻyxatidan oʻtkazish boʻyicha bosh roʻyxatdan oʻtkazuvchi va roʻyxatdan oʻtkazuvchi lavozimlariga ishga qabul qilish chogʻida tanlov oʻtkazish tartibi belgilandi

Adliya vazirligi tomonidan “Koʻchmas mulkka boʻlgan huquqlarni davlat roʻyxatidan oʻtkazish boʻyicha bosh roʻyxatdan oʻtkazuvchi va roʻyxatdan oʻtkazuvchi lavozimlariga tanlov oʻtkazish tartibi toʻgʻrisida”gi nizom (roʻyxat raqami 3589, 2024-yil 24-dekabr) davlat roʻyxatidan oʻtkazildi.

Ushbu Nizomda Kadastr agentligining Davlat kadastrlari palatasi va uning hududiy boshqarmalarida koʻchmas mulkka boʻlgan huquqlarni davlat roʻyxatidan oʻtkazish boʻyicha bosh roʻyxatdan oʻtkazuvchi va roʻyxatdan oʻtkazuvchi lavozimlariga ishga qabul qilish chogʻida tanlov oʻtkazish tartibi belgilangan.

Xususan, ishga qabul qilish chogʻida tanlov oʻtkazish uchun Kadastr agentligining Davlat kadastrlari palatasi raisining buyrugʻi bilan doimiy faoliyat yuritadigan tanlov komissiyasi tashkil etiladi.

Tanlov jarayoni audio va videoyozuvlarda qayd etib boriladi hamda roʻyxatdan oʻtkazuvchi organning rasmiy veb-saytida real vaqt rejimida translyatsiya qilinadi.

Tanlov komissiyasi tomonidan tanlov tadbirlari oʻtkazilishidan kamida bir oy oldin roʻyxatdan oʻtkazuvchi organning rasmiy veb-saytida boʻsh (vakant) roʻyxatdan oʻtkazuvchi lavozimlari boʻyicha maʼlumotlar hamda tanlov oʻtkazish joyi va kunlari, tanlov tadbirlarida berilishi mumkin boʻlgan savollarning namunaviy roʻyxati joylashtiriladi.

Nomzodlar ishga kirish uchun Tanlov komissiyasiga ariza bilan yozma yoki elektron shaklda murojaat qiladi.

Nomzodning belgilangan malaka talablariga muvofiqligi, shuningdek ish tajribasi va kasbiy kompetensiyasini aniqlash uchun Tanlov komissiyasi tomonidan test va suhbat sinov tadbirlari oʻtkaziladi.

Birinchi bosqichda test sinovlari oʻtkaziladi va nomzodning natijalari 100 ballik tizimda baholanadi.

Test sinovidan olinishi mumkin boʻlgan eng yuqori ballning 55 foizidan yuqori ballni toʻplagan nomzodlar test sinovidan muvaffaqiyatli oʻtgan hisoblanadi va suhbat shaklida oʻtkaziladigan sinov tadbirining keyingi bosqichiga kiritiladi.

Suhbat shaklida oʻtkaziladigan sinov tadbirida nomzodning natijalari 5 ballik tizimda baholanadi va uning natijalari u oʻtkazilgan kunning oʻzida eʼlon qilinadi.

Test va suhbat sinov tadbirlarining umumlashtirilgan natijalariga koʻra eng yuqori ball toʻplagan nomzod tanlov gʻolibi deb hisoblanadi va u boʻsh (vakant) roʻyxatdan oʻtkazuvchi lavozimiga ishga qabul qilinadi.

📌 Kanalga ulanish