#Adliya_xabari

Adliya vaziri oʻrinbosari Xudoyor Meliyevning Sirdaryo viloyatida xizmat safari Boyovut tumanidagi “BOYOVUT COTTON TEXTILE” masʼuliyati cheklangan jamiyati qoshidagi ip yigiruv korxonasi faoliyatini oʻrganish bilan davom etdi.

Adliya masʼullari korxonada ishlab chiqarish jarayonlari bilan tanishdi. Uchrashuvda tadbirkorning sohani yanada kengaytirish hamda yangi loyihalarni amalga oshirish, aholi bandligini taʼminlash boʻyicha taklif va rejalari oʻrganilib, zarur tavsiya va tushunchalar berildi.

Shundan soʻng Boyovut tuman adliya boʻlimi faoliyati oʻrganilib, xodimlar bilan muloqot qilindi.

Davlatimiz rahbarining 2024-yil 24-maydagi farmoni ijrosini tashkil qilish, aholining kundalik hayotida uchrayotgan huquqiy muammolarni aniqlash, “Onlayn mahalla” tizimiga kiritilgan huquqiy muammolarni bartaraf etish va bu borada “mahalla yettiligi” bilan doimiy ishlash yuzasidan aniq vazifalar belgilab berildi.

Vazir oʻrinbosari Boyovut tumanidagi “Ibrat” mahallasida tashkil etilgan “Adliya kuni” tadbirida ishtirok etdi hamda sayyor qabul oʻtkazdi.

Tadbirda “Ibrat”, “Navroʻz”, “Maʼnaviyat”, “Farhod” mahallalaridan kelgan fuqarolar oʻz muammolari bilan vazirlik masʼuliga murojaat qilishdi.

Sayyor qabul davomida 30 ga yaqin fuqarolarning kadastr, ijtimoiy himoya, mehnat munosabatlari, tibbiyot, kommunal soha, davlat xizmatlaridan foydalanish, mulkiy huquqlarga oid bir qator muammolari masʼullar tomonidan koʻrib chiqildi.

Qabul davomida 5 nafar fuqarolarning murojaatlari joyida hal etildi, 10 nafar fuqarolarga muammolarining huquqiy yechimlari tushuntirildi, qolgan 10 dan ortiq murojaatlar ish yurituvga qabul qilinib, ijrosi nazoratga olindi.

📌 Kanalga ulanish

#Adliya_xabari

Adliya vazirligida Sud ekspertiza sohasi boʻyicha davra suhbati oʻtkazildi

Adliya vazirligida sud, prokuratura, ichki ishlar organlari, davlat sud-ekspertiza muassasalarining masʼul mutaxassislari, advokatlar va boshqa tegishli tashkilotlarning vakillari ishtirokida “Sud ekspertiza sohasida 2024-yil davomida amalga oshirilgan ishlar, mavjud muammolar va kelgusidagi vazifalar” mavzusida davra suhbati oʻtkazildi.

Tadbirda Oʻzbekistonda davlat sud-ekspertlik muassasalari faoliyatini muvofiqlashtirish yuzasidan 2024-yil davomida amalga oshirilgan ishlar va kelgusidagi vazifalar yuzasidan xorijiy davlatlarning tajribalari asosida fikr va mulohazalar bildirildi.

Jumladan, sohani yanada rivojlantirish maqsadida ishlab chiqilgan “Sud-ekspertlik faoliyati toʻgʻrisida”gi Qonun va“Sud-ekspertlik faoliyatini takomillashtirishning qoʻshimcha chora-tadbirlari toʻgʻrisida”gi Prezident qarori loyihalarida nazarda tutilgan muhim masalalarni amalga oshirish lozimligi qayd etildi.

Bundan tashqari, nodavlat sud-ekspertiza tashkilotlari faoliyatiga oid amalga oshirilgan muhim islohotlar va kelgusidagi vazifalar yuzasidan ham maʼruzalar qilindi.

Ishtirokchilar sud ekspertiza sohasida kelgusida bajarilishi lozim boʻlgan eng muhim va dolzarb ustuvor vazifalar batafsil muhokama qildi.
Sohani yanada takomillashtirish va mavjud muammo va kamchiliklarni bartaraf etish yuzasidan tegishli taklif va tavsiyalar berildi.

📌 Kanalga ulanish

#Adliya_xabari

Adliya vazirligining "Matonat" filmi "Oltin Humo" mukofotiga sazovor bo‘ldi.

Kuni kecha boʻlib oʻtgan "Oltin xumo – 2024" kinotaqdimotida "Matonat" filmi "Hakamlar hay’atining maxsus sovrini" bilan taqdirlandi.

"Oltin xumo" milliy mukofoti O‘zbekiston Kinoarboblari ijodiy uyushmasi tomonidan 2019-yildan beri har yili gʻoliblarga taqdim etib kelinadi. Mukofot kino sohasidagi eng yorqin yutuqlarni taqdirlash va oʻzbek kinematografiyasidagi zamonaviy tendensiyalarga haqqoniy baho berish maqsadida ta’sis etilgan.

Ma’lumot uchun: "Matonat" hujjatli filmida denovlik nogironligi bor ayol Dilorom Yoʻldosheva haqida hikoya qilinadi.

Film 2024-yil 18-oktyabr kuni “Kino san’ati saroyi”da premyera qilindi. Filmda Adliya vazirligining "Madad" ijtimoiy-huquqiy loyihasi doirasida Dilorom Yoʻldoshevaning oddiy hunarmanddan tadbirkorga aylanish jarayonlari aks ettirilgan.

Film taqdimotidan soʻng Dilorom Yoʻldosheva BBCning 2024-yilda dunyoning ilhomlantiruvchi va ta’sirli 100 ayoli roʻyxatiga kiritildi.

2024-yil 13-dekabr kuni Dilorom Yo‘ldosheva O‘zbekiston Respublikasi Prezidentining Farmoniga asosan “Mardlik” ordeni bilan mukofotlandi.

📹 Filmni tomosha qilish: https://www.youtube.com/watch?v=oTCyEmyI1jo

📌 Kanalga ulanish

#Adliya_xabari

Adliya vaziri oʻrinbosari Forish tumanida tadbirkorlar bilan uchrashdi

Adliya vaziri oʻrinbosari Xudoyor Meliyev Jizzax viloyatining Forish tumanida joylashgan “ROCKFIBER” zavodi faoliyati bilan tanishdi.

Bazalt va boshqa koʻplab bazalt kompozit qurilish materiallari ishlab chiqarishga ixtisoslashgan mazkur zavod oʻz faoliyatini 2015-yilda boshlagan. Zavodda 725 nafar mahalliy aholi ish bilan taʼminlangan.

Uchrashuvda mavjud imkoniyatlar va imtiyozlar yuzasidan huquqiy tushuntirishlar berildi.

Shu bilan birga, Forish tumanida adliya boʻlimi, yuridik xizmat koʻrsatish markazi, davlat xizmatlari markazi hamda FHDY boʻlimlari xodimlari bilan ham suhbat tashkil etilib, mazkur yilda erishilgan yutuqlar va yangi yildagi rejalar haqida oʻrtoqlashildi.

Sohada olib borilayotgan yangiliklardan xodimlarning xabardorlik darajasi oʻrganildi. Oʻz faoliyatida xalqimizga xizmat qilishning ahamiyati va masʼuliyati haqida ham taʼkidlandi.

📌 Kanalga ulanish

#Adliya_xabari

Adliya vaziri oʻrinbosari Sharof Rashidov tumanida sayyor qabul oʻtkazdi

Adliya vaziri oʻrinbosari X.Meliyev tomonidan Sharof Rashidov tumanining “Qo’shko’prik” mahallasida sayyor qabul tashkil etilib, aholi muammolari oʻrganildi.

Xususan, 28 ta murojaat qabul qilindi. Ularning aksariyatini kadastr, kredit, tibbiyot, subsidiya, pensiya masalalari bilan bogʻlik boʻlgan muammolar tashkil etdi. Soha bilan bogʻlik boʻlgan 2 ta murojaat joyida ijobiy hal etildi, oʻrganish talab etiladigan muammolar ish yurituvga qabul qilindi hamda ayrimlari tegishli tashkilotlarga yoʻnaltirildi.

Shuningdek, fuqarolarga sayyor davlat xizmatlaridan foydalanish imkoniyati yaratildi.

Shu bilan birga adliya vaziri oʻrinbosari “mahalla yettiligi” vakillari bilan uchrashib, ularning faoliyatida yuzaga kelayotgan muammolar va ularni bartaraf etish yuzasidan takliflari bilan oʻrtoqlashdi.

Muloqot davomida mahallada jinoyatchilik va huquqbuzarliklarni oldini olish, aholi bandligini taʼminlash, ijtimoiy himoyaga muhtoj aholini qoʻllab-quvvatlash orqali ularga huquqiy yordam koʻrsatish, ajrimlar va oilaviy zoʻravonliklarni oldini olish boʻyicha tavsiyalar berilib, bu borada “mahalla yettiligi” aʼzolarining ham fikr-mulohazalari tinglandi.

Shu kunning oʻzida X.Meliyev tuman adliya boʻlimi faoliyati bilan ham yaqindan tanishib, xodimlar bilan muloqot oʻtkazdi va belgilangan vazifalarni amalga oshirish borasida tavsiyalar berdi.

📌 Kanalga ulanish

#Adliya_xabari

Qoraqalpogʻiston Respublikasi Ellikqalʼa tumani adliya boʻlimi davlat xizmatlari markazi yangi binosining ochilish marosimi boʻlib oʻtdi.

Ochilish marosimida Qoraqalpogʻiston Respublikasi adliya vaziri E.Tursunov va tuman hokimi B.Niyazimbetovlar nutq soʻzlab, yaratilayotgan imkoniyat va sharoitlar fuqarolarimizning huquqlarini taʼminlashga, ularga tez, oson va qulay davlat xizmatlarini koʻrsatishga, vaqtlarini tejashga xizmat qilishi taʼkidlab oʻtildi.

Markaz aholining barcha qatlamlariga, jumladan, yosh bolali ayollar, nogironligi boʻlgan shaxslar, yoshlar va nuroniylarga xizmat koʻrsatishga moʻljallangan. Bino zamonaviy shaharsozlik meʼyorlari asosida qurilgan boʻlib, aholi uchun keng sharoitlar yaratishga alohida eʼtibor qaratilgan.

📌 Kanalga ulanish

#Adliya_xabari

“E-qaror” elektron tizimi orqali monitoring jarayonlarini takomillashtirishga qaratilgan seminar tashkil etildi

“E-qaror” elektron tizimi orqali monitoring jarayonlarini takomillashtirish, amalga oshirilgan ishlar hamda amaliyotdagi kamchiliklar va ularni bartaraf etish boʻyicha takliflarni ishlab chiqish yuzasidan hududiy adliya organlari ishtirokida seminar oʻtkazildi.

Ta'kidlangandek, Vazirlar Mahkamasining 2021-yil 22-iyundagi “Mahalliy davlat hokimiyati organlari faoliyatiga “E-qaror” elektron tizimini joriy etish chora-tadbirlari toʻgʻrisida”gi 390-son qaroriga muvofiq “E-qaror” elektron tizimi respublikaning barcha darajadagi mahalliy davlat hokimiyati organlari faoliyatiga joriy etilib, qabul qilinayotgan qaror va farmoyishlarning monitoringini yuritish adliya organlari zimmasiga yuklatilgan.

Vazirlik tomonidan asossiz yashirilgan hamda noqonuniy ravishda eʼlon qilingan mahalliy davlat hokimiyati organlarining qarorlari hududiy adliya boshqarmalariga taʼsir choralarini qoʻllash va qarorlarni qonunchilik hujjatlariga muvofiqlashtirish uchun yuborilib kelinmoqda hamda doimiy ravishda monitoring ishlari amalga oshirilmoqda.

Seminarda hududiy adliya boshqarmalari masʼul xodimlari tomonidan tizimni takomillashtirish, shuningdek monitoring jarayonlarini jadallashtirish yuzasidan bir qancha takliflari kelib tushdi.

Jumladan, tizimga bir qancha platformalarni integratsiya qilish hamda tizim orqali qarorlarni qabul qilish, huquqiy ekspertiza hamda monitoring (tahlil) qilish jarayonlariga sunʼiy intellektni joriy etish masalalari muhokama qilindi.

📌 Kanalga ulanish

#Adliya_xabari

O‘zbekiston Respublikasi Prezidentining iqtisodiy rivojlanish, samarali boshqaruv va xalqaro hamkorlik masalalari bo‘yicha maslahatchisi Suma Chakrabarti bilan uchrashuv bo‘lib o‘tdi

Bugun, 14-yanvar kuni adliya vaziri Akbar Toshqulov O‘zbekiston Respublikasi Prezidentining iqtisodiy rivojlanish, samarali boshqaruv va xalqaro hamkorlik masalalari bo‘yicha maslahatchisi Suma Chakrabartini qabul qildi.

Uchrashuvda adliya va huquq sohasida hamkorlik aloqalari hamda amalga oshirilishi rejalashtirilayotgan yangi tashabbuslar muhokama qilindi.

Jumladan, adliya vaziri A.Toshqulov xorij tomoniga maxsus huquqiy rejim asosida faoliyat yurituvchi Raqamli texnologiyalar xalqaro markazi («ENTERPRISE UZBEKISTAN») va uning huzurida Xalqaro tijorat sudini tashkil etish, milliy qonunchilikni JST bitimlariga muvofiqlashtirish xamda siyosiy-huquqiy sohadagi xalqaro reyting va indekslarda O‘zbekiston Respublikasining pozitsiyalarini yaxshilash bo‘yicha olib borilayotgan ishlar haqida so‘zlab berdi.

S.Chakrabarti o‘z navbatida, Raqamli texnologiyalar xalqaro markazi
va uning huzurida tashkil etilayotgan sud xalkaro standartlariga mos kelishi kerakligini ta'kidlab, bu borada olib borilayotgan islohotlarni yuqori baholadi. Mazkur soha hamda xalqaro reyting va indekslar sohasida xalqaro ekspertlarni jalb qilishda amaliy yordam ko‘rsatishini ta'kidlab o‘tdi.

Shuningdek, S.Chakrabarti JSTga a'zolik masalasi murakkabligini ta'kidlab, O‘zbekiston Respublikasida amalga oshirilayotgan tizimli islohotlar natijasida yaqin orada JSTga a'zo bo‘lishga ishonch bildirdi.

Uchrashuv yakunida tomonlar O‘zbekiston Respublikasi adliya va huquq tizimida xalqaro va milliy islohotlarda yaqin hamkorlik qilishga tayyorliklarini bildirilar.

📌 Kanalga ulanish

#Adliya_xabari

Respublika ishchi guruhi Buxoro viloyatida tadbirkorlar bilan uchrashdi hamda mahallada sayyor qabul oʻtkazdi

Prezident Administratsiyasi va Adliya vazirligi masʼullaridan iborat respublika ishchi guruhi Buxoro viloyatida dastlab Savdo-sanoat palatasi viloyat hududiy boshqarmasi, soliq, qurilish boshqarmasi, kadastr palatasi agentligi va boshqa tegishli idoralar masʼullari ishtirokida davlat xizmatlaridan foydalanishda mavjud tizimli muammolarni aniqlash boʻyicha viloyatdagi tadbirkorlik subyektlari bilan uchrashuv oʻtkazdi.

Muloqotda 100 nafarga yaqin tadbirkorlik subyektlari ishtirok etdi. Tadbirda davlat xizmatlarini koʻrsatilishidagi tizimli muammolarga oid fikr-mulohazalar, ularni bartaraf etishga oid takliflar tinglandi. Shuningdek, tadbirkorlik faoliyatga oid murojaatlari eshitilib, qonunchilik yuzasidan zarur huquqiy tushuntirishlar berildi. Oʻrganish talab qiladigan ayrim murojaatlar koʻrib chiqish uchun nazoratga olindi.

Ishchi guruh kunning ikkinchi yarmida Buxoro viloyatida “Huquqiy mahalla” loyihasi doirasida amalga oshirgan ishlarni oʻrgandi. Xususan, Jondor tumani “Ushot” mahallasida loyiha doirasida amalga oshirilgan ishlar taqdimoti bilan tanishdi. Mahallada mavjud 712 ta xonadon xatlovdan oʻtkazilib, 4 523 ta huquqiy muammolar mavjudligi aniqlandi. Ulardan 4 140 tasi yoki 91,5 foizi hal etilgan.

Jumladan, 348 nafar shaxsga mulk soligʻi boʻyicha imtiyozlar qoʻllanildi; 30 nafardan ortiq fuqaro oʻzini oʻzi band qilinishi taʼminlandi; mahalla binosida “Adliya kutubxonasi” tashkil etildi; uyma-uy yurilgan holda aholiga 250 ta sayyor tartibda davlat xizmatlari koʻrsatildi; “mahalla yettiligi” aʼzolariga yagona huquqni qoʻllash amaliyotini yoʻlga qoʻyish borasida metodik yordam koʻrsatildi; “Huquqiy targʻibot kuni” va “Adliya sayli” tadbirlari oʻtkazildi.

Shuningdek, adliya vaziri oʻrinbosari Sh.Rabiyev “mahalla yettiligi” bilan uchrashib, jinoyatchilik va huquqbuzarliklarni oldini olish, aholi bandligini taʼminlash, ijtimoiy himoyaga muhtoj aholini qoʻllab-quvvatlash orqali ularga huquqiy yordam koʻrsatish boʻyicha tavsiyalar berdi hamda ularning faoliyatida yuzaga kelayotgan muammolar va ularni bartaraf etish yuzasidan takliflari bilan oʻrtoqlashdi.

Ishchi guruhi tomonidan “Ushot” mahallasida sayyor qabul oʻtkazildi.

📌 Kanalga ulanish