#Лирик_чекиниш

Гулга безанган диёр - Линьи

Кеча оқшом бу ерга келганимдаёқ бир дилбарлик борлигини сезгандим. Линьи келинчакдек сулув ва дилбар шаҳар экан.

Шаҳар четларини шу номдаги сокин дарё ўпиб туради. Гул, гулзор кўп. Конференция бошланадиган манзил минбарига ҳозиргина узилган, шудринг томиб турган хитой атиргулини олиб киришди.

Тушликка тортилган таомлар ҳам гулга ўралган, гул билан зийнатланган эди.

Форум бошланишига ҳали 20 дақиқа бор. Дастлаб B2B ва G2B форматда мулоқотлар бор. Пайтдан фойдаланиб меҳмонхонанинг ёнгинасида жойлашган хиёбонни айландик. Ландшафт дизайни аъло даражада, кишининг баҳри-дили яйрайди.

Устозимиз, маънавиятимиз куюнчаги Сайёра опа Файзиевани эсладим. Маънавият аслида шул, дедим ичимда.

Гул қалбини меҳмонларга тутиб турган камтарин хитойлик дўстларга: "Сеи-сеее" дедим чўзиброқ. Бу хитойчасига "раҳмат" дегани.

Хитой электротехника, нанотехнология, рақамли иқтисодиётда қанча ривожланган бўлса, маданият ва маънавият соҳасида ҳам ғоятда илғор, ниҳоятда эътиборли эканига амин бўлдим.

Беҳзод Қобулов,
Шандун провинцияси, Линьи шаҳри.

Yoshlar kundaligi