#Фикр

СЕН КИМСАН?

Эрталаб

Эрталаб турасан ва телефонингни хотининг текширмаганига шукр қилиб, ҳожатга кириб кетасан. Сассиқ хонада ярим соат ўтириб, телефон ковлайсан, футбол сайтларидан тортиб инстаграмгача кўрасан. Кейин опош бўлиб, дастурхонга ўтирасан ва яна иккала кўзинг телефонда. Кичкина ўғлинг телефоннингни сўраса, уришиб берасан. Ақллисан.

Иш. Ўйин. Ютуб

Ҳаммани ўзингга қаратиб ишга жўнайсан. Иш соатинг ютубдан бошланади. Кириш қисмига қизиқарли видео кўрасан, орада телефондан ўйнашингга жимжимадор хатлар ёзасан. Қўшиқ эшитасан, ишлагиси келаётган одамдек ўзингни тутиб, бир нималар қиласан, эски расмларни кўрасан, Украина, Ғазодаги урушлар ҳақидаги охирги янгиликларни ўқийсан. Қорин таталаб кетдику, серрайиб тушликка чиқасан.

Тушлик. Ишга қайтиш

Официантдан маданият кутасан. Буюртмангни тўлиқ эслаб қололмаганидан жаҳлинг чиқади. Эсноқ босади. Сипо тортиб, костюмингни елкага ташлаб, яна ишхонага қайтасан. Вақт имиллаб ўтаяпти. Оқшом масаласини ҳал қилиш керак.

Соат тўрт ярим

Иш вақти тугашига бир соатдан кўпроқ вақт қолди. Ютуб кўриб чарчадинг. Ёғли овқат ҳазм бўлиб, уйқунгни келтиришни бошлади. Дераза олдидаги ётоқхонанг, ўрин-кўрпанг нимагадир эсингга келаверади, мудрайсан. Гоҳ телефонда, гоҳ компьютерда ўйин ўйнайсан, қизиқарли кўринган видеоларни бепарво томоша қиласан.

Соат олти

Кетиш олдидан бир-икки ташқарига чиқиб, бошқаларга кўриниб қўясан. Хоналарни айланиб, ҳамкасбларинг билан салом-алик қилиб, янгиликларни сўраб оласан, дўстона гурунглашасан тиржайиб. Раҳбар ишхонада бўлса, бирон ўлмас ёлғонни ишга солиб, мундай бир ташаббус билан бирровга шефни олдига кириб чиқасан. Унинг сенга муомаласидан мўлжал оласан, одатдагидек муомала қилса, демак мустаҳкамсан, ишларинг жойида. Кайфиятинг турғунлашади, ҳаётдан завқланишни истайсан. Яна хонангга кириб ютубда бирон кино ёки подкаст кўришни бошлайсан.

Соат саккиз. Оқшом

Уйга қайтишми керак? Ютуб кўраётганингда оёқларинг букланиб, ҳаракатсиз ўтираверганидан увишади. Телеграмда эса янги-янги хабарлар келаверади, спортчиларимиз сени хурсанд қилади. Боксчиларимиздан фахрланасан. Ҳаммадан фахрланасан. Уйга қайтасан ноаниқ кайфиятда. Хаёлингда фақат ухлаш. Кун ботиб тонг отиб, кунлар ўтаверади. Сен эса шундай илмилиқ бўлиб судралиб юраверасан. Шодланасан. Қувонасан. Йиғлайсан. Куласан.

Эртасига эрталаб

Кўзингни очиб, телефонга ёпишасан. Кўрпага ўраниб осмонга қараб ё-ёё-тасан хаёл сурииб. Ҳаёт қандайдир зерикарли. Ўйлаб қарасанг ҳаётингдаги энг ёқимли пайт тонгда уйғониб, янгича одам бўлиб ишга жўнаш. Шу ўрталиқда яшайсан. Уйдан ишхонага боргунча сен одамсан. Умуман эса воқеалар оқимига ўзини ташлаб юборган, ҳаётдан лаззатланишни севадиган, қўлидан бошқа иш келмайдиган ландовур эканлигингни сезмайсан. Сен кимсан ўзи, бадбахт?

Қўтир кўнгилнинг
ўртанишларини
Ҳорун Шоший
оққа кўчирди.

Yoshlar kundaligi