​ЭРДЎҒАН САРАТОНГА ЧАЛИНДИМИ? МИШ-МИШЛАР ҚАНЧАЛИК ТЎҒРИ?

26 апрель куни Туркия раҳбари жонли эфирда нутқ сўзлаётган вақтида бирдан аҳволи ёмонлашиб, эфир 20 дақиқага узилиб қолгани ҳақида хабарлар тарқалди. Матбуот Эрдўғаннинг бу ҳолатини турли талқин қиляпти.

France24 сайтининг ёзишича, Эрдўғаннинг инқиллаган "оҳ-воҳ" товушлари эшитилганидан сўнг камера силкиниб кетган ва эфир шу жойида узиб қўйилган.

Орадан 20 дақиқа вақт ўтиб президент эфирга қайтган ва ошқозон шамоллаши билан боғлиқ оғир муаммоси безовта қилаётганини, аслида бу чиқишни кечиктирмоқчи бўлганини айтди. Бироқ у тоби йўқлигига қарамай интервыю беришни ваъда қилгани учун дастурни бекор қила олмаган.

Бу орада Эрдўғанга турли "ташхис"лар қўйилди. Баъзилар уни саратонга чалинганини, яна баъзилари инфаркт эканлигини иддао қилмоқда. Чунки бундан олдинги брифингларда раҳбарнинг ўзини тутиши соғлиғи билан муаммолари борлигига шубҳа туғдириб қўйган.

"France24" нинг Анқарадаги мухбири Жаспер Мортимер раҳбар ҳақида тарқалган хабарлар қуруқ миш-миш эканини ва ҳозирда Эрдўғаннинг аҳволи яхшилигини айтди. У шунчаки ошқозон шамоллаши билан боғлиқ муаммога дуч келди, дейди у ўз лавҳасида.

Президент маъмурияти ҳам Туркия раҳбарининг соғлиғи ёмонлашаётгани ҳақидаги асоссиз даъволарни кескин рад этди.

“Президентимиз Ражаб Тойиб Эрдўғаннинг соғлиғи ҳақидаги бу асоссиз даъволарни қатъиян рад этамиз. Эртага президентимиз видеоконференция орқали “Оққую” атом электр станциясининг ишга туширилишида иштирок этади. Қанчалик дезинформация қилишмасин, уларни ўзгартира олмайди. Турк халқи ўз раҳбарини қўллаб-қувватлаётгани ва 14 май куни бўлиб ўтадиган сайловда Ражаб Тойиб Эрдўған ва Адолат ва тараққиёт партияси ғалаба қозониши ҳақиқатдир”, дейилади маъмуриятнинг Twitter'даги расмий саҳифасида эълон қилинган баёнотда.

69 ёшли Ражаб Эрдўған қарийб 20 йилдан бери мамлакат тепасида. У 14 май куни бўлиб ўтадиган умумий сайловда кураш олиб боради.

💬Telegram 🌐Website 📱Instagram 📱Facebook 🌐YouTube