​#мулоҳаза

ЯХШИЛИК ҚИЛ, БИР КУН ҚАЙТАДИ...

Бугун Туркиядаги вазият кўпчиликни теранроқ мушоҳадага чорламоқда. Ижтимоий тармоқларда ёритилаётган ҳар бир пост кузатувчиларни эътиборсиз қолдирмаяпти.

Журналист Дилфуза Комил зилзила бўлган ҳудуддаги дугонасининг ёзганларини улашибди.

«...Кўчада қолган бошпанасиз одамларнинг ёнидан бошимизни баланд кўтариб ўтиб кетардик ёки инсоф қилсак, майда пул бериб ўтардик. Зилзиладан кейин, ҳокимият тарқатаётган емаклардан олиш учун улар билан бир қаторда навбатга туришга мажбур қолдик... Йўқ, мен бундан нолимаяпман. Сенга бошқа нарсани айтмоқчиман.

Кўчада олов атрофида исиниб ўтирганимизда кекса бир киши: "Ол, қизим, шунга ўраниб ўтир", - деб қалин кўрпа кўтариб келди. Кейин: "Ўғлинг тирикми, жабр кўрмадими?" - деб сўради. Ҳайрон бўлдим. Бутунлай нотаниш одам. "Худога шукр, ўғлим соғ-омон" - десам, хурсанд бўлиб кетди. Бироз гаплашдик. Билсам, бу одам кўчада яшаркан. Қачондир ўғлим иккимиз унга тўртта нонга етгулик пул берган эканмиз... Унутмаган экан... Ўпкам тўлиб кетди... Бу зилзила шахсан мен учун хайрли бўлди. Ўз қобиғимга ўралиб, одамгарчиликдан чиқиб қолаётган эканман. Ўзимга келдим. Кўзим очилди!..

Сен шуни ёз. Токи, бошқаларнинг ҳам кўзи очилиши учун бошига бир бало келиши шарт бўлмасин. Одамлар кўзини очсин!..»

Мушоҳадага чорловчи бу сатрлар ёдингизга ниманидир солмаяптими?

✉️Telegram 📱Instagram 📱Facebook 🌐YouTube

​#Муҳокамa_учун_мавзу

ЁТИБ ЕГАНГА ТОҒ ЧИДАМАЙДИ

2021 йил статистикасига кўра, Ўзбекистонда ишсиз ёшлар сони 17 % ни ташкил этар экан. Бу кўрсаткич Тайландда 1.5 %, Японияда 2.8%, Польша ва Бирлашган Араб Амирликларида 3.4%, Германия, Жанубий Кореяда 3.5%, Сингапурда 3.6%, Индонезия, Британияда 4.5%, Хитойда 4.8%, Америкада 5.5%, Канадада 7.5%, Францияда эса 8.1 % ни ташкил этади, масаланда.

Мамлакатимизда ёшларни бандлик билан таъминлаш мақсадида турли имкониятлар яратилмоқда. Бундан ҳар ким ўзича фойдаланади. Яқинда бир танишимнинг уйида бўлган эдим. Ёш оилага давлат томонидан уч маротаба субсидия ажратилган экан. Биринчи марта иссиқхона учун, иккинчи маротаба қорамол, учинчисида эса жўжа очадиган инкубатор. Томорқадаги иссиқхонанинг ҳолига маймунлар йиғлайди. Тўғри фойдаланилмаганми ёки пулни олгач "хўжакўрсинга" қурилганми, билмадим. Лекин иссиқхонанинг таёқларидан бўлак ҳеч баҳоси йўқ эди. Қорамол ҳам сотиб юборилган. Хуллас, инкубатордан келадиган 800 минг сўм даромадга оила икки боласи билан ўз кунини базўр кўриб ўтирибди.

Бундан ташқари бир ҳолатга кўп гувоҳ бўламан. Айримлар шахсий тадбиркорликни йўлга қўяман деб давлатдан субсидия олишади. Фойдаланиш учун эмас, сотиб пулини чўнтакка уриш учун. Яна баъзи тоифа одамлар бор, ҳукумат пулига яшайди. Ўзи кун бўйи уйқуни уради. Кейин "менга ёрдам керак, болаларим оч, уни қилиб бер, буни қилиб бер" сингари важлар билан идора эшикларини тепади.

Биласизми, ётиб еганга тоғ ҳам чидамайди. Агар ҳаракат қилмаса ҳеч кимда пул йўқ, ҳеч кимда нон йўқ. Одамлар тиришқоқлиги сабаб тўқ яшайди, ҳеч ким "ердан супуриб" олмайди. Дунёдаги энг бой ва машҳур шахслар ҳам аслида бир харобадан чиққан инсонлар. Улар ўз меҳнати, пешона тери туфайли шу даражага эришган.

Мақолада баъзи (!) тоифа одамлар ҳақида сўз юритилди. Кимгадир тегиб кетса бизданмас. Айтинг-чи, қачонгача "берсанг ейман, бермасанг ўламан" қабилидаги ҳаёт тарзи билан яшаймиз?

Нилуфар Убайдуллаева,
"Ёшлар кундалиги" мухбири

✉️Telegram 📱Instagram 📱Facebook 🌐YouTube