#Маъмурий_ислоҳот

Адлия вазири: штат бирликларини мақбуллаштириш натижасида бўшайдиган маблағлар ижтимоий масалаларни ҳал этишга йўналтирилади

Вазирлик ва идоралар бюджет ва бюджетдан ташқари маблағлар ҳисобидан белгиланган мақсадли кўрсаткичларга эришилиши ҳамда маблағларнинг сарфланиши юзасидан барча маълумотларни харажатлар иқтисодий таснифининг моддалари кесимида ўзларининг расмий веб-сайтларида очиқ эълон қилиб боради ва Олий Мажлис палаталари олдида ҳисобот беради.

Шу билан бирга, вазирлар ўзига юклатилган вазифаларни амалга ошира олмаганида, вазир истеъфоси институти илк бор жорий этилмоқда. Мисол учун, муайян вазирлик тизимида коррупция ҳолатларига йўл қўйилса, бунда энг аввало сўров раҳбардан бўлади.

Инсон манфаатларини таъминлашда раҳбарларнинг фаолиятида очиқлик, қонунийлик, натижадорлик ва сифат асосий мезон бўлади.

Республика ижро этувчи ҳокимият органлари раҳбарлари ва уларнинг ўринбосарлари бир вақтнинг ўзида хўжалик бошқаруви органларининг раҳбари вазифасини бажариши тақиқланади.

Уюшма ва бошқа хўжалик бирлашмаларига давлат ҳокимияти ваколатларини бериш ва уларнинг раҳбарларини Вазирлар Маҳкамаси қарорлари билан лавозимга тайинлаш амалиёти бекор қилинади.

Ҳудудларга хизмат сафарлари қисқартирилади, жойлардаги муаммоларни аниқлаш учун “онлайн қабул”, “виртуал ташриф“ каби замонавий масофавий усулларини қўлланади.

Ижро этувчи ҳокимият органларини автотранспорт воситалари билан таъминлаш меъёрлари раҳбар кадрларнинг сони қисқартирилишини инобатга олган ҳолда мақбуллаштирилади.

Таъкидлаш жоизки, штат бирликларини мақбуллаштириш натижасида бўшайдиган маблағлар ижтимоий масалаларни ҳал этишга, хусусан ходимларга адолатли меҳнат иш хақини белгилашга йўналтирилади.