#ona_tilim_faxrim

ОНА ТИЛИМ

Бобомерос тилим, жон она тилим,
Туркиён юракнинг қат-қатида сен.
Гулсевар булбулга дугона тилим,
Қошғарий бобомнинг луғатида сен.

Ҳусни латиф бўлдинг, мафтункор бўлдинг,
Минг бир дарсхонада жарангдор бўлдинг,
Муаллим, мударрис, улуғвор бўлдинг,
Яссавий бобомнинг ҳикматида сен.

Қадим Энасойнинг тошхати ўзинг,
Мумтоз асарларнинг бошхати ўзинг,,
Муборак «Ҳамса »нинг иззати ўзинг,
Хазрат Навоийнинг дастхатида сен.

Қум тўзон қўпориб келган не ёвуз,,
Зулмларин ютиб юмилмаган кўз,
Лабларда гаҳи най, гаҳи чанқовуз,
Ғаюрнинг турфа ранг кулфатида сен.

Сени суйган кўнгил бўлибдир осмон,
Осмон бўлиб яшаш эмасдир осон,
Сени суйганларнинг қанчаси қурбон,
Ўзбегим сабрида, тоқатида сен.

Сен элимга Хақнинг берган инъоми,
Кун сари тўлару тўкилмас жоми
Ярашиқ сифотинг Давлат мақоми,
Сўзондил сандувоч сувратида сен.

Сен-ей, мулки жоним, ҳуқуқим, ҳаддим,
Зебигардоним деб манглайга тақдим,
Борсанки бор эрур сафларда қаддим,
Дунёмизнинг мумтоз рўйхатида сен.

Замираман десам овозим - тилим
Субҳичоғ мадҳиям, парвозим - тилим,
Боламга қолдиргич меросим - тилим,
Мангусан мангулик хилқатида сен.

Замира Рўзиева

#ona_tilim_faxrim

ЎЗБЕК ТИЛИМ

Кўп қадимман,
Карвон билан замонлар кечдим,
Нор туянинг норлиги ҳам афсона экан.
Бир кун туя айронини шифо деб ичдим,
Она туя номи эса арвона экан.

Давронимни сурганман ҳам оқ отга миниб,
Ҳай-ҳай, унинг қўлтиғида бор эди қанот.
Вақти келиб, шон-шуҳратдан хаёлим тиниб,
Билсам, ўша оқ отимни дерканлар — бўз от.

Юксак Ҳисор тоғларининг бағрида қат-қат
Тошни ёриб ўсиб ётган наъматак эди.
Устоз Ойбек шеърин эслаб шоир Холмамат,
— Бизнинг жойда унинг номи “Ҳулулу”, деди.

Сен туганмас чашмадирсан, оҳ, она тилим,
Етмиш икки томиримга мавжларинг борди.
Бир кун тиниб қолган эди боғда булбулим,
— Сандулочим! — деган эдим сайраб юборди.

Инсон деган қутлуғ сўзнинг тенги йўқ ҳеч бир,
У танҳодир, фалакларнинг қуёши мисол.
Лекин манов болакайдир, буниси ўсмир,
Бу йигитдир, бу зот эса бобо, оқсоқол.

Абдулла Орипов,
Ўзбекистон Қаҳрамони, халқ шоири

#ona_tilim_faxrim

"Она тилим"

Муҳаммад Юсуф шеъри

Исъҳоқхон Ибрат номидаги ижод мактаби ўқувчиси Ифора Олимжонова ўқиди

#ona_tilim_faxrim

АҚЛ ЧАРХЛАНДИ

Бугун Ўзбекистон Ёзувчилар уюшмасида “Ўзбек тили байрами куни" муносабати билан ижодкорлар ўртасида шахмат мусобақаси ўтказилди.
Унда ўттизга яқин ижод аҳли иштирок этди. Мусобақага уюшманинг шахмат клуби раҳбари Абдураззоқ Обрўй ҳакамлик қилди.
– Ижодкорлар азалдан шахмат ўйнаб келишади, - дейди Хуршид Дўстмуҳаммад. - Мен Ўзбекистон Қаҳрамони Озод Шарафиддинов, Ўзбекистон халқ шоири Эркин Воҳидов, Ўзбекистон халқ ёзувчиси Одил Ёқубовлар билан дона суришиш бахтига муяссар бўлганман. Шахмат ҳам ижод ҳам, ақлни чархлайди.
Ўйин жараёнлари жуда кескин курашлар остида ўтди. Ҳаммадан кўп очко тўплаган уюшма аъзоси Асрор Мўмин биринчи, “Адабиёт” газетаси бош муҳаррири Бахтиёр Карим иккинчи, спорт шарҳловчиси Мурод Ризаев учинчи ўринни эгаллади.
Шунингдек, ёзувчилар Хуршид Дўстмуҳаммад, Ҳабиб Темиров, Маъмура Зоҳидовага рағбатлантирувчи мукофотлар топиширилди.
– Кейинги пайтда ижодкорлар ўртасида тез-тез шахмат мусобақалари ўтказилаётганидан беҳад миннатдормиз, - дейди Ҳабиб Темиров. - Бунинг учун уюшма раҳбариятига катта раҳмат. Бу эса, бугунги авлод устозлар анъаналарини давом эттиришаётганидан далолатдир.
Ғолибларга қимматбаҳо совға ва китоблар жамланмасини уюшма раиси ўринбосари Ботир Эргашев топширди.

Зулайҳо Аҳмаджонова тайёрлади

#ona_tilim_faxrim

ONA TILIM

Onam allasi-la chiqdi zabonim,
Otam o‘giti-la ulg‘aydi jonim.
O‘zbek nomi bilan tug‘ildim shukr
Millatimning tili – sha’nim, vijdonim.

Yassaviy hikmati turkona edi,
Xos Hojib aytarin shu tilda dedi.
Ming yillar avvalroq tug‘ilgan doston,
Alpomishning tili o‘zbekcha edi.

Titrab na’rasidan nazmiy qasrlar,
Tugamas xazina necha asrlar.
Navoiy turkiyda tengi yo‘q edi,
Unga tan berdilar xonlar, amirlar.

Qancha yil yog‘iyning zanjirlarida,
Misoli bandi qush bo‘ldi qafasda.
Erkinlik istasa o‘sha kunlarda,
Qanotlar qirqildi, bo‘ldilar hasta.

Orzular ushaldi, bitdi alamlar,
Oʻz tilida erkin so‘zlar odamlar.
Armonlar, zug‘umlar topdi nihoya,
O‘zbekcha yozmoqda rangin qalamlar.

Navoiyning tili – men so‘zlagan til,
Mirzo Bobur dili – men so‘zlagan til.
O‘zbek tili yashar, millat bardavom,
Turkiy tillar guli – men so‘zlagan til.

✍️Hayotjon Abdullayev

@yoshlikjurnali

#ona_tilim_faxrim

ОНА ТИЛИМ СЎЗЛАГАЙ

Кимки менинг миллатимнинг
Илдизини излагай.
Кўҳна дунё гувоҳ бўлгай,
Она тилим сўзлагай.

Қара менинг яноғимга,
Бодом қовоқ кўзимга.
Қара менинг қароғимга,
Сўзимга боқ, сўзимга.

Оқ сут билан она тилим
Меҳр берган дилимга.
Ё қут билан она тилим
Сеҳр берган қўлимга.

Нишон олиб камон отсам,
Юлдузларга қадалгай.
Дунёдаги қанча номлар
Тилим билан аталгай.

Бола бўлиб Тешиктошда
Ўчоқ ўйиб ўт ёққан.
Ботир бўлиб Боботоғда
Қўриқ қўйиб от боққан.

Тангритоғда чўнг чўққини
“Жамолунгма?” деб айтган.
Тангрига: “Бу буюк тоғлар –
Камолингма?” – деб айтган.

Кунчиқишдан Кунботишга
Уюр-уюр от сурган.
Музденгизга елка тираб,
Кунга қараб уй қурган.

Сув ер кечиб Туман жойда
Ўнгирлари ҳўл бўлган.
Тошиб-тошиб Энасойда,
Бойкўл, Иссиқкўл бўлган.

Қўрғон қуриб, макон қилган
Қанча қиру қияни.
Устюрт узра ҳайдаб юрган
Гала-гала туяни.

Қор қамашиб кўз ўнгингда,
Мангу тоғ кўкдан боққан.
Қорасувга Безенгидан
Музлар эриб сув оққан.

Болтиқ асли балчиқ бўлур,
Балчиқ бўлган Балатон.
Чирчиқ асли сирчиқ эрур,
Сирдарёга болажон.

Берунийни ўғлоним деб,
Суйиб юрган эркалаб.
Улуғбекни султоним деб,
Билим берган эркалаб.

Амир Темур юрагига
Арслондек зўр дов берган.
Жалолиддин билагига
Қиличу бедов берган.

Элим ерга ҳаёт берган,
Тупроғим деб жон берган.
Она тилим ер юзининг
Томирига қон берган.

Ерга буюк шажарамнинг
Теран ботган илдизи.
Кенг осмонда мангу порлар
Она тилим юлдузи.

Рустам Мусурмон,
Қорақалпоғистон халқ шоири