«Үлэ кыбаарталын» дьиэтигэр «САХА» НКИХ хамаандата тэрийбит «TO:KU FEST» аан бастакы сахалыы ойуулуктар бэстибээллэрэ буолла.

«TO:KU FEST» сыала-соруга —сахалыы ойуулуктары киэҥ араҥаҕа таһаарыы, сахалыы тылынан тахсар ойуулуктары элбэтии, үгүс дьону анимация эйгэтигэр угуйуу. Хас биирдии бырайыакка «Саха» НКИХ улахан хамаандата үлэлиир, хас биирдиилэрэ энтузиастар, үлэлэригэр бэриниилээх дьон. Бүгүн ойуулук эйгэтигэр үлэлэһэр хамаанданы, аниматордары кытта инники үлэбитин торумнаатыбыт, былааннаатыбыт — маннык тэрээһиннэртэн элбэх идея тахсар 👍🏻

Тэрээһин Үлэ кыбаарталын дьиэтигэр 4 сиринэн ыытылынна, ол курдук, маҥнайгы этээскэ улахан саалаҕа ойуулуктар сүрэхтэниилэрэ, бэстибээл чэрчитинэн ыытыллыбыт 5 күрэх наҕараадалааһына ыытылынна, ону таһынан ырыалаах-тойуктаах, үҥкүүлээх-битиилээх кэнсиэр киэргэттэ. Онтон быыстапка саалатыгар оҕолорго аналлаах маастар-кылаастар, дьарыктар, саха төрүт оонньуулара, квест оонньуу ыытылыннылар.

Иккис этээскэ «TO:KU FEST» чэрчитинэн, Петр Николаев, Вячеслав Егоров, Маайа Пестерева, Үүнэр көлүөнэ паарката уонна Смарт-бибилэтиэкэ анимацияҕа маастар-кылаастары ыыттылар.

Үһүс этээскэ анимацияҕа сыһыаннаах, бу эйгэҕэ көстөр-биллэр дьоннордоох тэттик лиэксийэлэрэ буоллулар.

Тэрээһиҥҥэ уопсайа 800 тахса киһи ыалдьыттаата, онтон үөрэх муодулугар 300-тэн тахса киһи сырытта.

Үгүс дьон тэрээһин үрдүк таһымнаах ааспытын бэлиэтээтилэр, сахалыы ойуулук эйгэтэ хаҥаан иһэрин хайҕаатылар. Мин хас биирдии тэрийээччигэ уонна өйөбүл буолбут дьоҥҥо, хампаанньаларга, партнердарбытыгар махталбын тиэрдэбин.

Инникитин эһиилтэн эһиил маннык бэстибээл сылын аайы ыытылларын былаанныыбыт. Салгыы «Саха» НКИХ бырайыактарын манна сиһилии сырдата туруом.

#НВКСАХА #ТООКУФЕСТ #САХАЛЫЫОЙУУЛУК