Бүгүн биһиги оскуолабытыгар боксаҕа Европа икки төгүллээх чемпиона (2015, 2017), Аан дойду чемпионатын үрүҥ көмүс призера (2015), Арассыыйа биэс төгүллээх чемпиона (2014, 2016, 2018, 2020, 2022) Василий Егоров кэргэнин кытта ыалдьыттаатылар.

Көрсүһүүнэн үрдүкү кылаас уолаттарын хабар былаан баара да, сыр-мыр кыра уолаттар, кыргыттар, учууталлар киирэн көрсүһүү ортолуута залы толору киһи буолла. Спортсмен олоҕун суолун, олоххо сыалын, талаһыытын кэпсээтэ. Василий холобуругар күүстээх санаа, киэҥ билии, эт-сиин кыаҕа, диссипилиинэ тэҥҥэ дьүөрэлэстэхтэринэ олоххо ситиһии хайаан да кэлэр эбит диэн оҕолор өйдөөтүлэр. Саамай үтүөтэ, спортсмены киһи хараҕар үрдэтэрэ диэн баар – кини МАХТАЛА. Саханы аан дойдуга аатырдыбыт күүстээх спортсмен махтанар, истиҥ тыллары аныыр ийэтигэр, кэргэнигэр, учууталларыгар, төрөөбүт оскуолатыгар, төрөөбүт дойдутугар. Дьиэ кэргэн сыла буоларынан, бу тиэмэни эмиэ интэриэһиргээн ыйыттыбыт. Василий уонна кэргэнэ сахалыы сиэри тутуһар ыал эбит. Оҕолорун сахалыы тылынан иитэллэр, төрүт үгэстэргэ тирэҕирэн олохторун тэринэллэр.

#CОШ38

@yaguo_official