Некаторыя віды птушак звонку вельмі падобныя, а колькі скрытных птушак, якіх лягчэй пачуць, чым убачыць! 🎶 Іх голас – добрая падказка, каб вызначыць від. Таму мы пачынаем новую рубрыку #галасыптушак!

Запамінай галасы, каб сярод агульнага птушынага гоману пазнаваць хаця б некаторых знаёмых птушак. 🤗

Беларускі "папугайчык" – чаромашнік (чечевица).😍 На вочы гэтыя прыгажуны трапляюцца рэдка, бо хаваюцца ў густым лісці кустоў, лазняку каля вады. Але часта выдаюць сябе гучным і меладычным свістам (часцей за ўсё з вершаліны куста), які складаецца з чатырох альбо пяці флейтавых гукаў "чі-ві-чю-ві-чю", "ві-чі-вi-чі-вічю", падобным да фразы "Витю видел?".

❓А табе даводзілася чуць чысты і прыгожы спеў гэтай птушкі?

Сённяшняя гераіня рубрыкі #галасыптушак – перапёлка (перепел).☺️

Гэта птушка, якую вельмі цяжка ўбачыць, яна вядзе наземны лад жыцця, хаваючыся ў траве ці пасевах, узлятае выключна рэдка і вельмi добра затойваецца.

Але яе голас можна пачуць, шпацыруючы ўздоўж паплавоў ці палёў з траўня па ліпень.🌱🌾
🎶 У самца моцнае "пiт-пi-лiт". Лёгка запомніць – голас падобны да "спаць-пара, спаць-пара".

Цікава, што перапёлка не буйнейшая за дразда, але мае больш шчыльны целасклад і скарочаны хвост, якія надаюць ёй тыповае "курынае" аблічча.🐥

📷 Фота: christoph_moning, Wikimedia Commons.

Авяльга (иволга) – адна з найбольш прыгожых і ярка афарбаваных птушак нашай фаўны. 😍💛
Яна асцярожная, трымаецца верхніх ярусаў крон дрэваў. Праз гэта на вочы трапляецца нячаста.

❓Але як жа пабачыць авяльгу?
Спачатку трэба паслухаць запіс яе голасу. 🎶 Самцы выдаюць прыгожыя кароткія флейтавыя гукі "фіу-ліу, фіціу-ліу".
Калі знойдзеш авяльгу па голасе, магчыма, зможаш і ўбачыць, калі яна пералятае з дрэва на дрэва.

🌳 Да сярэдзіны жніўня спеў авяльгі можна пачуць у лісцёвых і змешаных лясах, у парку або іншых зялёных насаджэннях каля населеных пунктаў. #галасыптушак

📷 Фота: Michel Idre, Wikimedia Commons.

Спявак драч (коростель) уласнай персонай! 😍 #галасыптушак

👀 Назіраць драча ў прыродзе вельмі цяжка. Ён насяляе адкрытыя нізінныя ўчасткі з травой, хаваецца і спрытна перамяшчаецца сярод сцяблін дзякуючы выцягнутаму целу.🌾

Нягледзячы на скрытны лад жыцця, у шлюбны перыяд драч выдае гучныя крыкі, па іх можна лёгка вызначыць яго прысутнасць.
🎵 Голас драча – характэрны, шматразова паўтараны двухскладовы крык "крэк-крэк...", нібы хтосьці праводзіць зуб'ямі расчоскі па пустым карабку ад запалак.

У ліпені актыўнасць птушак паступова зніжаецца, апошнія крыкі драчоў рэгістраваліся ў сярэдзіне жніўня.

📷 Гэтага драча пашчасціла зняць Іне Шкурко ў Смалявіцкім раёне.

#галасыптушак
🥰 🐦 Адзін з самых віртуозных спевакоў у птушыным свеце – чорны дрозд. Некаторыя нават лічаць яго лепшым за салаўя спеваком.

🎶 Песня чорнага дразда гучная і прыгожая, складаецца з прыемных свіставых і флейтавых гукаў, напрыклад, "труцi-трут-цйю-цйю-сiту". Найбольш актыўна чорныя дразды спяваюць досвіткам і на заходзе, звычайна седзячы на вяршыні ці ў кроне дрэва, у гарадскіх умовах – на даху ці іншым узвышаным месцы.

Чорны дрозд любіць ціхія, зарослыя месцы з сыраватай глебай. Каб заўважыць яго, уважліва прыглядайся, і тады ты нават на фоне цёмнага падлеску зможаш убачыць, як птушка шукае на зямлі, чым бы пажывіцца.🐛

Слухаць гэтых пеўчых птушак можна з сакавіка па чэрвень, часам можна пачуць спеў у ліпені.

🎼 The Beatles уключылі ў свой "Белы альбом" трэк у гонар гэтай птушкі. У песні "Чорны дрозд" можна пачуць яго шчабятанне.

#галасыптушак
❤ Канаплянка – песню гэтай птушкі можна пачуць нават восенню і ўзімку.

🎶 Песня складаная і меладычная, складаецца з разнастайных пошчакаў, ціўканняў, свістаў, трэскаў, якія ідуць адзін за адным без пэўнага парадку, урыўкамі па некалькі секундаў.

Самец спявае, седзячы на вяршынях кустоў ці на дрэвах, на правадах, на плоце. Пры гэтым прыўздымае чубок на галаве і паварочваецца з боку на бок. Часамі ён узлятае з песняй высока ў паветра і, зрабіўшы два-тры колы, плануе назад на прысаду.

🏡 Канаплянкі – насельнікі культурнага ландшафту. Насяляюць сады, жываплоты, дрэўныя і хмызняковыя насаджэнні, хмызняковыя зарасці па паплавах і ўзлесках.

❓Можа канаплянкі і твае суседзі? Чуў_ла іх песню?

📷 Фота: Blattkaktus, commons.wikimedia.org.

🐦 Амялушка – песню гэтай зімовай госці можна пачуць з кастрычніка па травень.

🎶 Песня вельмі мілагучная, пяшчотная дрыготкая трэль, якая напамінае перазвон маленькіх званочкаў.

У халодны час года гэты характэрны спеў можна пачуць на вялікай адлегласці – значыць, недзе побач ляціць або сядзіць на дрэвах чарада амялушак. 😉

Амялушка ў палёце сілуэтам нагадвае шпака. Птушкі часта перасоўваюцца вялікімі чародамі, па некалькі сотняў асобін.

Гняздуюць амялушкі ў лесатундры.

❓ А ты ўжо чуў_ла або бачыў_ла амялушак гэтай зімой?

📷 Фота: Алёна Белка.

#галасыптушак

Дразды-спявуны вярнуліся ў Беларусь. ❤️

🐦 Дразды-спявуны (певчие дрозды) насяляюць розныя тыпы лясоў. А падчас міграцыі яны спыняюцца адпачыць і падсілкавацца амаль паўсюль.

🎶 Дрозд-спявун лічыцца добрым спеваком. Яго песня гучная, мерная і павольная, складаецца з флейтавых гукаў, гучных прыгожых посвістаў і кароткіх трэляў. Кожная фраза песні паўтараецца.

Пачуць яго можна з сярэдзіны сакавіка да пачатку ліпеня. Падчас спеву птушка часта ўсаджваецца на верхавіну дрэва. Найбольш актыўна ён спявае з раніцы і ўвечары.

❓ А ты сёлета ўжо чуў_ла дразда-спявуна?

🎥 Відэа Аляксандра Лічко з Тэлеграм-чату "Птушкі з фотастужкі" @ptushkafota

#галасыптушак

Гэтую мілую птушачку, напэўна, ведаюць усе! 😍

Малінаўка (зарянка) – адна з самых распаўсюджаных лясных птушак. Нярэдка яна сустракаецца побач з чалавекам – у лесапарках, садах, каля дарог.

🐦 Вясной малінаўка прылятае ў другой палове сакавіка – пачатку красавіка. Птушка паводзіцца даволі скрытна, але можна пачуць яе прыгожы звонкі спеў.

🎶 У спеве малінаўкі гучныя чыстыя трэлі змяняюцца прыглушаным неразборлівым шчабятаннем з “металічнымі” ноткамі ці амаль шыпячымі гукамі. Найбольш актыўна малінаўкі спяваюць у вячэрніх прыцемках. У гэты час самец пяе звычайна на вяршыні дрэва.

❓ Хочаш навучыцца адрозніваць птушак па галасах? Мы на дзікіх афлайн-сустрэчах пачалі вывучаць галасы птушак, якія ўжо прыляцелі. Гэта не так проста: галасы некаторых птушак вельмі падобныя: трэба ведаць, на што звяртаць увагу, каб адрозніць.

У мінулы раз было вельмі весела – удзельнікі вывучылі галасы 10 розных птушак і прайшлі па іх тэст.

🦡 Далучайся да “Дзікага клуба”! З радасцю прымем цябе і тваіх сяброў у нашу цёплую кампанію.

Яшчэ больш галасоў птушак можаш паслухаць па хэштэгу #галасыптушак

🎥 Дзякуем за відэа Кацярыне Хведанцэвіч.

Травень – час салаўіных канцэртаў.

🐦 Салаўя складана ўбачыць, затое лёгка пачуць. Птушка знешне “шэранькая”, зусім непрыкметная, да таго ж хаваецца сярод густой лістоты. А вось спевы яго гучныя і вельмі прыгожыя.

Салавей лічыцца найлепшым спеваком сярод нашых птушак. Яго песня складаецца з серыі флейтавых, шчаўчкоў і траскучых гукаў.

🎶 Пачуць салаўя можна з пачатку траўня і да сярэдзіны чэрвеня. Ён спявае вечарам і ноччу. Зараз у траўні ягоныя спевы можна пачуць і днём.

Каб паслухаць салаўя, адпраўляйся ў бліжэйшы парк, сквер, пажадана, каб побач быў вадаём. Шукай вільготныя месцы з густымі зараснікамі. 🌿

❓ А ты ўжо чуў_ла сёлета пошчак салаўя?

🎥 Дзякуем за відэа Уладзіміру Бондару.

#галасыптушак

Уп-уп-уп! Upupa epops (лат.). Удод – адна з найбольш яскравых беларускіх птушак.

🐦 Гэтых прыгожых птушак прасцей пачуць, чым убачыць. У разгар шлюбнага сезону, ад прылёту да пачатку ліпеня, крыкі ўдодаў чуваць ад світання да вечара.

Слухай удода ў сельскай мясцовасці: на адкрытых лугах і ўзлесках, у населеных пунктах, у садах і парках.

❓ А ты ўжо сустракаў_ла ўдода сёлета?

🎥 Дзякуем за відэа Віктару Выскварку.

Калі ты таксама хочаш дзяліцца з намі сваімі птушынымі фотаздымкамі і відэа або проста любіш разглядаць прыгожыя фота птушак, далучайся да чату "Птушкі з фотастужкі" @ptushkafota.

#галасыптушак

А што гэта за мышка? Ой, гэта птушка!

🐦 Звычайны паўзунок (обыкновенная пищуха) – невялікая і скрытная птушка, якая лазіць па кары дрэў. Да таго ж у птушкі тоненькая ціхая пазыўка, якая нагадвае мышыны піск.

#Дзікіфакт Паўзунок – выдатны дрэвалаз. У яго моцныя кіпцюры, якімі ён чапляецца за кару, і доўгі жорсткі хвост, на які ён абапіраецца, як дзяцел. Перамяшчаецца паўзунок па ствале знізу ўверх па спіралі. Але не можа лазіць уніз галавой, як папаўзень. На дрэвах паўзунок шукае насякомых, якіх выцягвае з трэшчын у кары сваёй тоненькай выгнутай дзюбай.

🌲 Птушка насяляе розныя тыпы лясоў, любіць старыя дрэвастоі, дзе за адсталай карой можна зладзіць гняздо. Увосень і ўзімку паўзункоў можна сустрэць нават у гарадах. Часта яны трымаюцца разам з сініцамі.

А ты сустракаў_ла звычайнага паўзунка?

📷 Дзякуем за фота Данатасу Відуцісу.

Любіш фатаграфаваць птушак ці любіш разглядаць іх – далучайся да чату "Птушкі з фотастужкі" @ptushkafota

#галасыптушак

Крумкач – прыгожая і велічная птушка, якая часцей за ўсё асацыюецца з містыкай і тым светам. Сёння людзі ў свеце святкуюць Хэлаўін! 🎃

#Дзікіфакт Інтэлект крумкачоў – адзін з самых выдатных сярод жывёл. Крумкачы могуць карыстацца прыладамі, адрозніваць сябе ў люстэрку, маюць прасторавае мысленне, здольныя падманваць, запамінаюць добрыя і злыя ўчынкі, якія ім зрабілі, і могуць помсціць або падзякаваць у адказ.

📷 Дзякуем за фота Паўлу Лычкоўскаму, чат “Птушкі з фотастужкі” @ptushkafota

#галасыптушак

Міф: гілі (снегири) прылятаюць да нас толькі ўзімку з поўначы.

Факт: гілі жывуць у Беларусі круглы год, а ў халодны сезон, калі кармавая база ў лесе скарачаецца, пералятаюць бліжэй да чалавека.

🐦 Гілі – птушкі даволі скрытныя. Ты сотні разоў зімой можаш праходзіць каля гілей і не заўважыць іх, нават яркіх самцоў. Як жа знайсці гіля?

🎶 Даем падказку: спярша яго трэба пачуць. Паслухай уважліва пазыўку гіля, пастарайся яе запомніць, знайсці нейкую аналогію: цю...цю… На вуліцы прыслухоўвайся да падобных гукаў і шукай птушак, калі ўпэўнішся, што крычыць гіль.

Звяртай увагу на наступныя кусты і дрэвы – каліну, абляпіху, бэз, рабіну, ясені, клёны, іх насеннем харчуюцца гілі.

Падзяліся гэтым допісам, каб іншыя таксама даведаліся як знайсці гілей узімку! 🤗

📷 Дзякуем за фота Іне Шкурко.

#галасыптушак