Велень эрь кудсь – азоронц лаца.

Тя видекс тяфта. Молят велева, ванат куттнень лангс и, нльне кда аф содасайть азорхнень, шарьхкодьсак, кодапт синь. Финцне уряднайхть, омбонцне аф пяк, колмонцнень уторсост (Зубуса тяфта мярьгихть кудперьфти) улихть нюряпт, улема, шабасна. Кой-конатнень кудсна шавф пластикса – аф шарьхкодихть мазышиса. Лиятнень – стама мазыхть вальмяашкоркссна, ингольденнет. И вов ни содасак, кодама ломань эряй тя кудса. А кда лия вели поват, куттнень колга шарьхкодьсак, кодама марнек велесь. Эрь велеть сонцень коец. Няйсак – тяса ули вайме.

Лиякс тевсь ащи ошень частнай куттнень мархта. Тядязе сидеста корхнесь тейне: «Вов улель пара, кда Саранскяйса улель тонцень кудце. Роди ошса эрят и тяка пингть велеса».
Лама квартираса кудозень ваксса оцю частнай сектор. Мон сидеста яксян тоса и арьсян: а кда тяса улель кудозе. Ванан ня куттнень лангс, и аф шарьхкодьса, кодапт азорсна. Аф шарьхкодеви ваймось. Вестевок аф няендян уторстост ломатть, тишесь аф лятьф, да и кати-кодапт аф мазыхть…
Виде, улихть и пяк мазыхть. Шикарнайхть. Кяшфт айгоронь серьса перьф фталу. Арьсят, нятне пелихть, кие-бди сай и сивсыне. Кинди синь эрявсть.

Веляземса тя кизоня пяшксе марьда! Афи мяляфтан тяфтама марю киза. Велева ётат, фкя бабанясь, омбоцесь пшкяди: «Пади, саят кочкасайть перьфкастон марьхнень эстейнть, или хуш жуватантенди». А тейнек тиендемс синь аш ков. Минцень пяшксе.
Велень эрь кудть инголе марлют, марьхне утясазь тараттнень. Якстерьхть, пижет, ёмланят, оцюфт… Тядде изезь кола синь маень якшапне, кирдсть.

Миньге кирттяма.

#Велязем #ЭсьПачкан