Shu kunlarda o‘tkaziladigan agrotexnik tadbirlar paxta hosildorligini oshirishda muhim ahamiyatga ega

📍Qishloq xo‘jaligi vaziri Ibrohim Abdurahmonov hududlardagi islohotlar izchilligini ta’minlash, ekin maydonlarida olib borilayotgan agrotexnik tadbirlar jarayoni bilan yaqindan tanishish maqsadida Toshkent viloyati tumanlarini aylanmoqda. Dastlab vazir Toshkent viloyatining O‘rtachirchiq tumanidagi “Istiqlol” fermer xo‘jaligi dala maydonida bo‘lib, g‘o‘zalarning vegetativ holati bilan tanishdi.

🌱Fermer xo‘jaligining umumiy yer maydoni 200 gektar bo‘lib, shundan 30 gektariga g‘o‘zaning mahalliy “Sulton” navi odatdagi usul – 90 sxemada ekilgan. Odatda dalaga bu usulda chigit ekilganida gektariga o‘rtacha 100 ming dona ko‘chat joylashtiriladi.

💬G‘o‘za qator oralarini ko‘zdan kechirar ekan vazir Ibrohim Abdurahmonov ushbu dala maydonida hasharot va zararkunandalarga qarshi o‘z vaqtida ishlov berilgani bois ular zarar yetkazmaganini e’tirof etar ekan, me’yoridan ortiq suv qo‘yilgani sababli daladagi g‘o‘zalarda g‘ovlashga moyillik kuchli ekanligini ilmiy asoslangan fikrlar bilan tushuntirib berdi.

💬Shu bois, qator oralaridan namlikni qochirish va bor kuchni hosilga yo‘naltirish uchun “Entojen” preparati bilan ishlov berish bo‘yicha o‘z tavsiyalarini berdi. Bundan tashqari, paxtachilik sohasi mutaxassislari tomonidan kuchli g‘ovlagan g‘o‘zalarni yengilgina chekanka qilish bo‘yicha ham takliflar o‘rtaga tashlandi.

✅O‘z o‘rnida vazir Ibrohim Abdurahmonov paxtachilikda hosildorlikni karrasiga oshirish uchun ayrim odatiy uslublar o‘rniga xorijiy tajribani qo‘llashning vaqti kelgani va buning ahamiyati haqida so‘z yuritar ekan, agar mana shu dalaga chigitlar 90 sxema o‘rniga 76 sxemada qo‘shqator qilib ekilganida hosildorlik kutilganidan ham ortiq bo‘lishi mumkinligini ta’kidlab o‘tdi. Shuningdek viloyat mutasaddilariga g‘o‘zalarga mana shu oylarda ko‘rsatiladigan agrotexnik tadbirlar paxta hosildorligini oshirishda hal qiluvchi ahamiyatga ega ekanligi tushuntirilib, tegishli ko‘rsatmalar berildi.

🌐Website 💬Telegram 💬Facebook 📺YouTube 📷Instagram