Бүгүн, сэтинньи 14 күнүгэр анал байыаннай дьайыы кыттыылаахтарын дьиэ кэргэттэрин кытта көрүстүм.

Судаарыстыбаттан, өрөспүүбүлүкэттэн, улуустан көрүллэр көмө көрүҥнэрин туһунан социальнай фонда салайааччыта Альбина Ивановна Николаева уонна Үөһээ Бүлүүтээҕи нэһилиэнньэ социальнай харысхаллаах буолуутун киинин салайааччытын эбээһинэһин толорооччу Егомина Зоя Валентиновна иһитиннэрдилэр.

Анал байыаннай дьайыы кыттыылаахтарыгар туһуламмыт реабилитационнай бырагырааммалары Үөһээ Бүлүүтээҕи киин балыыһа сүрүн бырааһа Сардана Николаевна Павлова билиһиннэрдэ.

Үөһээ Бүлүүтээҕи нэһилиэнньэ дьарыктаах буолуутун киинин инспектора Обоева Наталья Николаевна анал байыаннай дьайыы кыттыылаахтарыгар ананан үлэлиир бырагырааммалары сырдатта, чуолаан үлэни булууга уонна профориентационнай курстарга үөрэнии туһунан кэпсээтэ.
Быйыл Үөһээ Бүлүү улууһугар дьарыктаах буолуу киин көмөтүнэн 8 анал байыаннай дьайыы кыттыылааҕа үлэҕэ киирбит, 3 киһи профкурстарга үөрэммит.

Төгүрүк остуол кыттыылаахтарыгар Үөһээ Бүлүү улууһун делегацията ДНР, ЛНР, Запорожье уобалаһыгар быйылгы икки гуманитарнай сырыыбыт туһунан сырдаттым. Ону тэҥэ, бу ый бүтүүтэ үһүс сырыыбытыгар бэлэмнэнии хайдах бара турарын кэпсээтим.

Хас биирдии байыас Аҕа дойдубут туһугар сүҥкэн кылаатын сыаналаан, өйдөөн тураммыт анал байыаннай дьайыы кыттыылаахтарыгар кинилэр дьиэ кэргэттэригэр болҕомто уурар, көмө, өйөбүл буолар ытык эбээһинэспит.

Кыайыыга - бары бииргэ!

#СВОихНеБросаем

t.iss.one/ValeriNikolaev

Биир дойдулаах анал байыаннай дьайыы байыастарыгар гуманитарнай көмө Үөһээ Бүлүү улууһун олохтоохторуттан, урбаанньыттарыттан, тэриллиилээх хаһаайыстыбаларыттан күннэтэ киирэ турар.

Ол курдук, Үөһээ Бүлүү улууһун Кэнтик нэһилиэгин урбаанньытыттан, МУП "Булунское" тэрилтэ дириэктэриттэн Лукин Руслан Семеновичтан анал фондаҕа Тикситтэн: 3 хатыыс 3 сордоҥ уонна 3 куул уомул балык киирдэ.

Киирбит балыктары Үөһээ Бүлүү улууһун дьаһалтатын үлэһиттэрэ тоҥорон, астаан айаҥҥа бэлэмнээтилэр.

Руслан Семеновичка кыайыыга кылаатын, биир дойдулаах уолаттарбытыгар өйөбүлүҥ иһин ис сүрэхтэн махтанабыт!

Гуманитарнай көмөнү хомуйуу салҕанар.

#СВОихНеБросаем

t.iss.one/ValeriNikolaev

Мэдисиинэ билимин доктора, бэрэпиэссэр, академик, Саха Өрөспүүбүлүкэтин үтүөлээх бырааһа, Российскай Федерация үрдүк анал үөрэхтээһиҥҥэ бочуоттаах үлэһитэ, Үөһээ Бүлүү улууһун Бочуоттаах олохтооҕо Ахмед Романович Варфоломеев 85 өрөгөйдөөх сааһын Үөһээ Бүлүү улууһугар бэлиэтиир дьоро тэрээһиннэртэн биирдэстэринэн бүгүн, сэтинньи 15 күнүгэр, М. А. Алексеев аатынан өрөспүүбүлүкэтээҕи лиссиэй-интэринээккэ Ахмед Романович Варфоломеев аатынан медицинскэй кылаас арыллыыта буолла.

Үөрүүлээх, ытык чааска илиилэригэр үрүҥ халааты туппут медицинскэй кылаас үөрэнээччилэрэ сэлэлии хааман киирэн, мустубут ыалдьыттарга анаан эҕэрдэ хоһооннорун аахтылар.

Улуустааҕы киин балыыһа кылаабынай бырааһа Сардаана Николаевна Павлова бу үөрүүлээх түгэнинэн истиҥ эҕэрдэтин анаан туран, эмчиттэр гимнэрин доҕуһуолугар биир үөрэнээччигэ үрүҥ халааты кэтэрдибитэ ураты долгутта, уйадытта.

"Үөһээ Бүлүү" хаһыат

Салгыы медицинскэй кылаас үөрэнээччитэ Никита Николаев эмчит үрдүк аатын сүктэҕинэ дьоһунун, ырааһын хаһан да түһэн биэриэм суоҕа диэн тылын биэрдэ.

Тэрээһин кыттыылаахтарыгар "Золотой фонд СВФУ: наш профессор" документальнай киинэ сериятыттан быһа тардан көрдөрдүлэр.

СӨ үтүөлээх бырааһа, Прокопий Андреевич Петров аатынан государственнай бириэмийэ лауреатыгар, Михалкин Сергей Осипович аатынан бириэмийэ хаһаайына, Үөһээ Бүлүү улууһун бочуоттаах олохтооҕо, үрдүк категориялаах быраас Пантелеймон Александрович Семенов Ахмед Романовичка өрөгөйдөөх үбүлүөйүнэн истиҥ эҕэрдэтин тиэрдэн туран, медик идэтин талбыт оҕолорго бу идэ уустугуттан чаҕыйбаттарыгар, киһилии сиэрдэрин хаһан да ыһыктыбаттарыгар кэс тылын эттэ.

Медицинскэй наука билимин доктора, профессор, суһал көмө департаменын салайааччыта Дьулустан Анатольевич Чычахов Ахмед Романовичка дириҥ ытыктабылын тиэрдэн туран, оҕолорго талбыт идэлэригэр бэриниини, уустуктартан чаҕыйбаттарыгар баҕа санаатын тиэртэ.

"Үөһээ Бүлүү" хаһыат