#планерка

✅ Алтынньы 23 күнүнээҕи улуус дьаһалтатын нэдиэлэтээҕи былаанныр сүбэ-мунньаҕа Үлэ, социальнай харысхал управлениетын салайааччыта Екатерина Николаева иһитиннэриититтэн саҕаланна.

2023 сыл от ыйын 23 күнүнээҕи сокуоҥҥа киирбит уларыйыыга олоҕуран, 4 уонна онтон элбэх оҕолоох ийэлэр уонна "Дьоруой-ийэ", "Материнская слава", "Знак Высшей благодарности Матери" наҕараадалаахтар Үлэ бэтэрээнэ ааты ылалларыгар 10 эрэ сыллаах үлэ ыстааһа ирдэнэр буолла.

Маннык саҥа уларыйыыны туһанан, 9 ый устата Үөһээ Бүлүү улууһун үрдүнэн уопсайа 47 дьахтар Үлэ бэтэрээнэ уонна 2 киһи "РФ Үлэ бэтэрээнэ" ааты сүктүлэр.

Бу ирдэбилгэ хапсыбат дьахталларга 35 сыл үлэ уопсай ыстааһа ирдэнэр. Оттон эр киһи Үлэ бэтэрээнэ буоларын наадатыгар уопсай үлэ ыстааһа 40 сыл буолуохтаах. Бу ыстааска аармыйаҕа сулууспалыыр кэм, күнүскү үөрэххэ үөрэнэр сыллар, 3-гэр диэри саастаах кыра оҕону көрөн олорор кэм уонна Дьарыктаах буолуу киинигэр учуокка турар сыллар ааҕвллаллар.

"Гражданскай килбиэн" уонна "Хотугу Сулус" түөскэ кэтэр бэлиэнэн наҕараадаланар эр киһиэхэ 25 сыллаах үлэ ыстааһа, оттон дьахталларга 20 сыл ирдэнэр.

Үлэ бэтэрээнигэр биэнсиэйэҕэ эбии көрүллэр ыйдааҕы төлөбүр (ЕДВ) 1162 солкуобайга тэҥ. ОДьКХ төлөбүрүгэр көрүллэр ыйдааҕы төлөбүр (ЕДВ) суумата 1604 солк. тэҥнэһэр.

Улууска 40 тыыл бэтэрээнэ, 2 сэрии бэтэрээнин огдообото, 40 байыаннай дьайыы бэтэрээнэ олороллор.

Быйылгы дьылга 16 тыыл бэтэрээнигэр дьиэлэрин өрөмүөннэнэллэригэр анаан 30-туу тыһ.солк. көмө быһыытынан оҥоһуллубут.

Үлэлээбэккэ олорор 13 үлэ бэтэрээнигэр Саха сирин санаторийдарыгар сынньанан, эмтэнэн, доруобуйаларын чэбдигирдэн кэлэллэригэр анаан путевкаларын төлөбүрүн 80% төлөммүтүн кэннэ ороскуоттара сабылынна.

Бу иннинэ маннык өҥөнөн 60-тан үөһэ саастаах бэтэрээннэр эрэ үс сылга биирдэ туһаналлара. Оттон бу сылтан эмтэнии төлөбүрүн ороскуотун төннөрүүнү дьахталлар 50, эр дьон 55 саастарыттан саҕалаан туһанар кыахтаннылар.

Бүгүҥҥү күҥҥэ Россия Донора таһымнаах 38 киһи баар. Кинилэр сылга биирдэ 16 578,10 солк. төлөбүрү ылаллар.

"Үөһээ Бүлүү" хаһыат

#планерка

✅ Территориальнай быыбардыыр хамыыһыйа бэрэссэдээтэлэ Семен Миронов сэтинньи 19 күнүгэр буолаары турар улуус баһылыгын быыбарын туһунан иһитиннэрдэ.

Кылгатыллыбыт болдьохтоох быыбар буолаары турар. Бүгүҥҥү күҥҥэ 4 хандьыдаат докумуонун туттаран турар. Ол курдук, улуус баһылыгын эбээһинэһин толорооччу Семен Анатольевич, улуус дьокутааттарын Сэбиэтин бэрэссэдээтэлэ Николай Николаевич Николаев, улуус мунньаҕын дьокутаата Василий Иванович Алексеев, Кэнтик нэһилиэгин баһылыга Валерий Валерьевич Николаев.

Алтынньы 22 күнүгэр хандьыдааттар туруорунар, докумуоннарын туттарар болдьохторо түмүктэннэ.

"Үөһээ Бүлүү" хаһыат

#планерка

✅ Пенсионнай уонна социальнай страховкалааһын пуондатын салайааччыта Альбина Николаева.

Клиеннэри кытта үлэҕэ электроннай үлэ ирдэбилэ олохтонон турар. Күн бүгүн сайабылыанньа 92,7% электроннай ньыманан туттарыллар буолла, ол эбэтэр 2047 киһи клиент сулууспатыгар сайабылыанньа киллэрбит.

Госуслуга порталыгар 44 өҥө, 116 сервис киирэн турар.

Сайабылыанньалары көрүү муҥутаан 5 үлэ күнүн иһигэр толору оҥоһуллан, боппуруос быһаарыллар буолла.

Үлэлиир киһи маннык өҥөлөрү туһанар:
- больничнай төлөбүрэ
- хат дьахтар оҕолонуор диэри
- оҕо төрөөтөҕүнэ төлөнөр биир кэмнээх төлөбүр
- балтараа сааһыгар диэри оҕону көрөн олоруу иһин төлөбүр
- үлэ бириэмэтигэр эчэйиини ылбыт үлэһиккэ төлөнөр төлөбүр
- олохтон туораабыт киһини атаарыыга көрүллэр төлөбүр
- медицинэ эйгэтигэр ыарыһахтары кытта быһаччы үлэлиир үлэһиттэргэ 2568 нүөмэрдээх РФ Бырабыыталыстыбатын Уурааҕар олоҕуран ананар анал төлөбүр.

Сиһилии хаһыат кэлэр нүөмэригэр ааҕыҥ. Сурутуу Почта дьиэтигэр ыытыллар. Редакцияттан тиийэн ыларга эмиэ суруттарыахха сөп.

"Үөһээ Бүлүү" хаһыат

#планерка

✅ Үөрэх управлениетын салайааччыта Спиридон Борбуев үөрэнээччилэр күһүҥҥү сынньалаҥнарын, сынньалаҥ кэмигэр ыытыллар тэрээһиннэр туһунан иһитиннэрдэ.

Алтынньы 27 күнүттэн сэтинньи 4 күнүгэр диэри күһүҥҥү сынньалаҥ буолар. Бу кэмҥэ оскуолаларынан үгэс курдук ыытыллар тэрээһиннэр былаан быһыытынан барыахтара.

Ааспыт нэдиэлэҕэ учууталларга куурус буолан ааста. Быйылгыттан саҥардыллыбыт ФГОС киирдэ, учебниктар уларыйдылар. Маныаха учууталлар бэлэм буолалларын наадатыгар туһаайыллыбыт кууруска учууталлар көхтөөх кыттыыны ыллылар.

Оттон иитээччилэргэ ФОП (федеральнай үөрэхтээһин бырагыраамата) олоххо киирдэ.

"Үөһээ Бүлүү" хаһыат

#планерка

✅ Спорт уонна физическэй култуура салаатын салайааччыта Егор Николаев тэрилтэлэр икки ардыларыгар ыытыллыбыт күрэзтэр түмүктэрин билиһиннэрдэ.

Бильярд уонна городовой спорт күрэхтэригэр миэстэлэспит хамаанда бэрэстэбиитэллэригэр грамоталары, мэтээллэри туттарда. Хаартыскалары комментарийга киирэн көрүөххүтүн сөп.

Бу нэдиэлэҕэ мини-футбол уонна гиирэни анньыы күрэхтэһиилэрэ буолаллара былааннанан турар.

Боотулуу кыргыттарын хамаандата Дьокуускайга ыытыллыбыт волейбол өрөспүүбүлүкэтээҕи күрэҕэр иккис бочуоттаах миэстэни ылан кэллилэр.

"Үөһээ Бүлүү" хаһыат

#планерка

✅ Үөһээ Бүлүүтээҕи полиция отделын бэрээдэги бөҕөргөтөр салаа салайааччыта, полиция майора Владислав Поскачин сокуону, бэрээдэги кэһии туһунан иһитиннэриини оҥордо.

Нэдиэлэ устата ис дьыала отделын дьуһуурунай чааһыгар 37 араас ис хоһоонноох иһитиннэрии киирбит.

Мантан 4-дэ чэпчэки өрүттээх эт-хаан эчэйиитэ, 2-тэ дьиэҕэ сокуоннайа суохтук өтөн киирии, 264 ыст. холуобунай эппиэтинэскэ итирик туруктаах суоппар тардыллыбыт. Уоруу - 1, өлөрүүнэн куттааһын - 1.

Новая уулуссаҕа сарсыарда аһаҕас турар массыынаны сокуоннайа суох илдьэ бараннар, биир угон бэлиэтэммит. Суоппардар, массыынаҕытын дьиэҕит таһыгар аһаҕас көрүүтэ-истиитэ суох хаалларбаккытыгар көрдөһөбүт.

Административнай эппиэтинэскэ 11 киһи тардыллыбыт, дьуһуурунай чааска 3 итирик киһи тутуллубутуттан биирдэрэ хаайыллыбыт.

ГАИ сотрудниктара 84 административнай боротокуолу толорбуттар. Мантан 2 суоппар арыгы испит туруктаах сылдьан уруулга олорон тутуллубут. 1 суоппар итирик туруктаах сылдьан иккис төгүлүн тутуллубут.

"Үөһээ Бүлүү" хаһыат