Салгыы медицинскэй кылаас үөрэнээччитэ Никита Николаев эмчит үрдүк аатын сүктэҕинэ дьоһунун, ырааһын хаһан да түһэн биэриэм суоҕа диэн тылын биэрдэ.

Тэрээһин кыттыылаахтарыгар "Золотой фонд СВФУ: наш профессор" документальнай киинэ сериятыттан быһа тардан көрдөрдүлэр.

СӨ үтүөлээх бырааһа, Прокопий Андреевич Петров аатынан государственнай бириэмийэ лауреатыгар, Михалкин Сергей Осипович аатынан бириэмийэ хаһаайына, Үөһээ Бүлүү улууһун бочуоттаах олохтооҕо, үрдүк категориялаах быраас Пантелеймон Александрович Семенов Ахмед Романовичка өрөгөйдөөх үбүлүөйүнэн истиҥ эҕэрдэтин тиэрдэн туран, медик идэтин талбыт оҕолорго бу идэ уустугуттан чаҕыйбаттарыгар, киһилии сиэрдэрин хаһан да ыһыктыбаттарыгар кэс тылын эттэ.

Медицинскэй наука билимин доктора, профессор, суһал көмө департаменын салайааччыта Дьулустан Анатольевич Чычахов Ахмед Романовичка дириҥ ытыктабылын тиэрдэн туран, оҕолорго талбыт идэлэригэр бэриниини, уустуктартан чаҕыйбаттарыгар баҕа санаатын тиэртэ.

"Үөһээ Бүлүү" хаһыат

Онтон бу күн ытык-мааны ыалдьыта, бары сүгүрүйэр киһибит Ахмед Романович тоҕо хирург уустук идэтин талбытын туһунан кэпсээн туран, үөрэнээччилэргэ эмчит идэтэ олохторун салайар ытык идэ буолуохтааҕын, онуоха киһиттэн ураты тулуур, дьулуур уонна идэҕэ бэриниилээх буолуу булгуччу ирдэнэллэрин тоһоҕолоон бэлиэтээтэ.

Салгыы кини тылы улуус бэтэрээннэрин Сэбиэтин бэрэссэдээтэлэ Иван Егорович Чычаховка туһаайда. Кини бу ураты суолталаах күнүнэн оҕолору эҕэрдэлээн туран, ытык идэлэрин өрүү үрдүктүк туталларыгар алгыһын тириэртэ. Итиэннэ Ахмед Романович Варфоломеев аатынан медицинскэй кылаас вывескатын кылаас салайааччыта Альбина Романовна Кривошапкинаҕа туттарда.

Бу ураты күн бэйэлэрин иһирэх эҕэрдэлэрин уонна ыллыктаах тылларын историческай наука билимин доктора Никита Архипов, Үөһээ Бүлүү улууһун баһылыгын бастакы солбуйааччыта Егор Иванов, лицей-интернат директора Туяра Блинова, английскай тыл учуутала Светлана Ильина уонна Балаҕаннаах нэһилиэгин баһылыга Степан Дмитриев эттилэр.


"Үөһээ Бүлүү" хаһыат

Туяра Васильевна эҕэрдэ тылыгар оруобуна бу үөрүүлээх чааска улуус баһылыга Валерий Валерьевич Николаев аатыгар СӨ доруобуйатын харыстабылын министерствотын аатыттан сурук кэлбитин иһитиннэрдэ. Манна этиллэринэн, лицей-интернат базатыгар медицинскэй кылаас оҕолоро фелдьдшер идэтин баһылыылларыгар "В.А. Вонгродскай аатынан Дьокуускайдааҕы медицинскэй колледж" отделениетын арыйарга туһааннаах министерство көмөнү оҥоруоҕа. Билигин бу этии олоххо киирэригэр юридическай боппуруостара быһаарыллара наадатын туһунан Туяра Васильевна эттэ.

"Үөһээ Бүлүү" хаһыат