🎄Саҥа дьыллааҕы Харыйабыт уота сандааран, үтүө сылы түстээтин!

“Кыһын Саха сириттэн саҕаланар” фестиваль ыытыллыбыта 12-с сыла буолла. Бу Россияҕа туризм сайдыытыгар биир саамай тутаах, дьону түмэр улахан суолталаах тэрээһин.

Фестиваль чэрчитинэн ыытыллар сүрүн тэрээһин – Саҥа дьыллааҕы харыйа уотун үөрүүлээхтик уматыы. Үгэс быһыытынан ыытыллар үөрүүлээх түгэн ахсынньы 1 күнүгэр өрөспүүбүлүкэбит үрдүнэн бүттүүн буолар.

Бу күн улууспут киинигэр Лөгөй аатынан болуоссакка туруоруллубут 11 миэтэрэттэн тахса уһуннаах лаглайбыт Харыйа уота үөрүүлээх быһыыга-майгыга сандаара умайда. Моруос оҕонньор Хаарчаанатынаан уонна үүнэр сыл бэлиэтэ, остуоруйа дьикти кыыла – уотунан уһуутуур Моҕой улуус олохтоохторун эҕэрдэлии көрүстүлэр.

Сыл ахсын бу кэрэ көстүүнү биһиги киэн туттар дэгиттэр ууспут Геннадий Оллонов иилээн-саҕалаан оҥорор. Быйыл бырааттарынаан Николай Оллоновтуун уонна Николай Басыгысовтыын түүннэри үлэлээн болдьоммут күнүгэр бүтэрэннэр, Бороҕоммут олохтоохторугар кэрэ көстүүнү бэлэхтээтилэр.

Бырааһынньыктааҕы киэһэ улуус дьаһалтатын баһылыгын Василий Аммосов, Мүрү нэһилиэгин баһылыгын солбуйааччы Вероника Сивцева, нэһилиэк депутаттарын сэбиэтин бэрэссэдээтэлэ Олег Федоров үтүөнү түстүүр эҕэрдэлээх кэс тылларынан арыалланна. Үүнэр сылы уруйдуу, үтүөнү түстэһэ Хаарчаана уонна Чысхаан эҕэрдэлэрэ, үҥкүү-битии, ырыа-тойук салалынна, дьэрэкээн уоттаах фейерверк халлааҥҥа сандаарда. 

Үөрүүлээх тэрээһининэн сибээстээн, “Өркөн” киинэ театрыгар 15 чаастан оҕолорго ойуулуктар босхо көрдөрүлүннүлэр. Бу күнтэн саҕалаан ахсынньы 20 күнүгэр диэри оҕолорго “Мин баҕа санаам харыйата” диэн уруһуй күрэһэ саҕаланна. Маны тэҥэ “Оҕолорго минньигэс бэлэх” аахсыйа, олох ыарахан түгэнигэр түбэспит дьиэ кэргэттэр, байыаннай дьайыы кыттыылаахтарын оҕолоругар аналлаах утренниктар ыытыллыахтара.

✍️ Ольга Шепелева

✅ @uamurusahargata @ulusmedia