#ийэтыл #сахатыла

⭐️ Ахсынньы 1 күнүгэр Нам нэһилиэгэр "Чоргуй, чобуо чабырҕах" диэн улуустааҕы чабырҕах күрэҕин тэрийдилэр.

Уһуйаан иитиллээччилэрэ, оскуола оҕолоро, улахан дьон, түмсүүлэр көхтөөхтүк кытыннылар. Бастыҥнар ааспыт үйэ аатырбыт чабырҕахсыттара Петр Николаев, Иона Николаев, Мария Алексеева, Александр Тойтонов дьиэ кэргэттэрэ туруорбут бириистэрин тутан үөрдүлэр- көттүлэр. Олохтоох тэрилтэлэр, түмсүүлэр, биирдиилээн дьон спонсордаан бириис бөҕө туруордулар. Тэрээһиҥҥэ саха норуодунай суруйааччыта Дмитрий Наумов кыттыыны ылан, бииргэ үлэлээбит П.И.Николаев туһунан ахтыы оҥордо, "Чаҥый Чаҕаан чабырҕахсыкка" диэн анал бирииһин И.Барахов аатынан оскуола "Үнүгэсчээн" бөлөҕөр туттарда уонна кинигэтин бэлэхтээтэ.

Чабырҕахсыт Николаевтар тустарынан слайд көрдөрдүлэр, уус-уран самодеятельноска ситиһиилэри кэпсиир быыстапканы туруордулар, республика фестивалыгар аахпыт чабырҕахтарын радиофондаттан ыыппыттарын иһитиннэрдилэр, "Тобуруокап чабырҕахтара"диэн брошюра түҥэтилиннэ. Норуот маастара Розалия Бурнашева тикпит сахалыы таҥастарын, Л Егорова салайааччылаах бөлөх түүнү хатайдаан оҥорбут соннорун, норуот маастара Лука Николаев мас оҥоһуктарын, "Ситим" түмсүү сиэл олбохторун, "Уран иэйии" түмсүү кэрэ киэргэллэрин көрдөрдүлэр. Киэҥ программалаах тэрээһинтэн дьон-сэргэ астынан тарҕаста.

Бары кыттыбыт, өйөөбүт, спонсордаабыт дьоммутугар, тэрилтэлэргэ, түмсүүлэргэ барҕа махталбытын тиэрдэбит. Биһиги күүспүт- түмсүүгэ!!!

Сонуннарга анаан Нина Саввинова

"Үөһээ Бүлүү" хаһыат

#ийэтыл #оҥхой

⭐️ Оҥхой нэһилиэгин С.П.Федотов аатынан сүрүн оскуола "Ийэ тыл уонна сурук-бичик күнүгэр "Хомоҕой хоһоон туонатын түһүлгэтэ" буолла.

Тэрээһин арыллыытыгар "Кэскиллэр" театр-студия Семен Данилов "Төрөөбүт тыл" хоһоонуттан композиция көрдөрдүлэр, учууталлар Симон Федотов "Өбүгэм тыла" хоһоонунан монтаж аахтылар.

Икки сүһүөҕүнэн арахсан 2-9 кылаас үөрэнээччилэрэ "Иитиллибит ийэ тылбыт биһиги сүрэхпитигэр" диэн дорҕоонноохтук, талан ылбыт суруйааччыларын хоһооннорун ааҕан күрэхтэстилэр. Кыайыылаахтар добун суругунан, көхтөөхтүк кыттыбыттар туоһу суругунан наҕараадаланнылар.

5-9 кылаастар дьиэ кэргэнинэн "Тыл оонньуута" интеллектуальнай оонньууга кытыннылар. Оонньууну саха тылын уонна литературатын учуутала Марина Илларионова тэрийдэ.

Оскуолабытыгар бүгүҥҥү күҥҥэ үөрэнээччилэр ийэ тыл кэрэтин, сүмэтин иҥэриннилэр. Сахалыы саҥарарга, саха тылынан киэн туттарга үөрэннилэр.

"Үөһээ Бүлүү" хаһыат

#ийэтыл

⭐️Бүгүн, олунньу 13 күнүгэр, Исиидэр Бараахап аатынан орто оскуола "Ийэ тыл, сурук-бичик" күнүгэр аналлаах нэдиэлэтин саҕалаата.

Бу тэрээһини оскуола уопсай илиниэйкэтиттэн, "Бараахап тыыннаахтан тыыннааххын" диэн ырыанан саҕаланна.

Эбиэттэн киэһэ «Күн оҕолоро» түмсүү кыттыылаахтара оһуокай күрэҕин тэрийэн ыыттылар. Нэдиэлэ устата элбэх тэрээһин, күрэх, өбүгэ оонньуулара, араас маастар кылаастара ыытыллыахтара.

"Үөһээ Бүлүү" хаһыат

#ийэтыл #олоҥхо

⭐️ Оҕолорго - Олоҥхо күнэ

Бүгүн Кыырт Далыгар улахан балаҕаҥҥа оҕолор олоҥхо истэр күннэрэ үүннэ.

Д.С.Спиридонов аатынан 4- нүөмэрдээх орто оскуола "Удьуор утума" бырайыага бу оскуола саҥа дьиэҕэ киириэҕиттэн үлэлиир. Бүгүн Валентина Владимировна Семенова суруйбут "Куоппат-куойбат, куттаҕаһа суох Күн Дибилитэр бухатыыр" олоҥхотун  Д.С.Спиридонов аатынан № 4 оскуола үөрэнээччилэрэ толороллор. Уос аһыллыытыгар тойук туойдулар.

"Олоҥхо - уус тыл, уран өй улуу айымньыта" кинигэ быыстапкатын О.Д.Федорова аатынан кииннэммит бибилэтиэкэ ситимэ туруорда.

"Үөһээ Бүлүү" хаһыат

#тэрээһин #ийэтыл

⭐️ "ЭЙГЭ" КСЭК МАТ уонна Үөһээ Бүлүү улууһун устуоруктарын уонна кыраайы үөрэтээччилэрин түмсүүтэ эһигини бу кэлэр бээтинсэҕэ, о.э. кулун тутар 22 күнүгэр Түгэхтэй сирин Кыырт Далын улахан балаҕаныгар күнүс 2 чаастан төрүччүнү үөрэтэргэ, оҥорорго анаммыт тэрээһиҥҥэ ыҥыраллар.

Кэлиҥ, көрүҥ, тускутугар туһаныҥ.

"Үөһээ Бүлүү" хаһыат

#БиһирэмТылКүнэ #ДапсыДьыктаана #ИйэТыл

⭐️ Бүгүн О.Д.Федорова аатынан киин бибилэтиэкэҕэ төрөөбүт ийэ тылбыт хараанньыта, сахалыы саҥабыт дорҕоонун эмчитэ, лиҥкибиис-учуонай Дапсы – Мэхээлэ Бөтүрүөбүс Өлөксүөйэп төрөөбүт күнүн чэрчитинэн Дапсы дьыктаанын суруйуута буолла.

Улуус оскуолаларын, техникумун үөрэнээччилэрин, учууталларын, редакция үлэһиттэрин уонна биирдиилээн ааҕааччылары холбоон барыта 32 киһи кыттыыны ылла.

«Үрүҥ кэрэ сырдык» диэн сүүсчэ тыллаах тиэкиһи Исидор Барахов аатынан оскуола алын сүһүөх учуутала Варвара Петрова ааҕан суруттарда. Дьыктаан түмүгүнэн хас биирдии кыттааччыга туоһу суруктар туттарылыннылар. Түмүк сарсын киин бибилэтиэкэ саайтыгар тахсыаҕа.

Маны сэргэ бибилэтиэкэҕэ Дапсы кинигэлэрин быыстапката үгүс дьон болҕомтотун тарта.

Санатан эттэххэ, бэҕэһээ улуус дьаһалтатын сүбэ-мунньаҕын кэмигэр ыытыллыбыт дьыктааҥҥа барыта 34 салайааччы дьыктааны суруйбута.

«Үөһээ Бүлүү» хаһыат