ОДьКХ Далырдааҕы филиалын үлэһиттэрэ СВО-ҕа сылдьар буойуттар дьонноругар биирдии массыына оттук мас бэлэмнээн,киллэрэн биэрдилэр

Бырааттыы Боескоровтар ааттарын сүгэр Сургуулук оскуолатыгар үөрэнээччилэргэ Аҕа дойду Улуу сэриитин толоонуттан эргиллибэтэх буойун офицер Артамон Дадасовка аналлаах өйдөбүнньүк күн ыытылынна,оҕолор буойун олоҕун кэпсиир киинэни көрдүлэр.Артамон Дадасов фронтан суруйбут буорах сыттаах суруктарын,туттубут бартыбыалын чугас дьонноро кичэллээхтик харайа сылдьыбыттар,кэлин музейга биэрбиттэр.

🌟Төһө да сыл-хонук аастар, Улуу Кыайыы суолтата өлбөөдүйбэт, өссө күндүтүйэн, үрдээн иһэр. Ийэ дойду көҥүлүн иһин сырдык тыыннарын толук уурбут, бэйэлэрин харыстаабакка охсуспут, түүннэри-күнүстэри үлэлээбит дьоммутугар сүгүрүйэр, махтанар ытык иэстээхпит.

❤️🎁👏🏻👏🏻👏🏻"Көмүс сүүтүк" иистэнньэҥнэр түмсүүлэрэ Улуу Кыайыы 78 сылын көрсө, икки бэтэрээннэригэр, дьоллоох оҕо сааһы билбэккэ тыылга үлэлээбит сэрии кэмин оҕолоругар, аҕа сүбэһиттэригэр сылдьан, ытыктабылларын биллэрэн, эҕэрдэлээн, дойдуларын аһын бэлэх ууннулар.

🥰🙌🏻Ол курдук, маҥнай «Ийэҕэ Албан аат» II истиэпэннээх уордьан, «Ийэ Албан аата" бэлиэлэрдээх элбэх оҕолоох ийэҕэ, «ССРС тыыл бэтэрээнэ», «Ударник социалистического труда СССР» бэлиэлэрдээх Үөһээ Бүлүү бөһүөлэгин бочуоттаах олохтооҕор, доруобуйа харыстабылын бочуоттаах бэтэрээнигэр, оскуола иннинээҕи саастаах үөрэхтээһин бэтэрээнигэр Лукина Екатерина Егоровнаҕа ыалдьыттаатылар.

🫶🏻Екатерина Егоровна бэйэтэ Сунтаар Хаданыттан төрүттээх. Сэрии суостаах сылларыгар кини 4 бииргэ төрөөбүттэрин кытта тулаайах буоланнар, эһээлэрэ Мөрөөкөп
оҕонньор көрүүтүгэр сылдьыбыттар. Эһээлэрэ сэрии кэмигэр биригэдьиирдээн, оҕуруот аһын олордон, балыктаан, бар дьонун өлөр өлүүттэн быыһаабыт.

😔🕯️🙏🏻"Эһэм түөрт уола уоттаах сэриигэ, биир уола үлэ фронугар кыттыбыттара, олортон үс уола сэрии хонуутуттан эргиллибэтэхтэрэ..." - диэн Екатерина Егоровна ол ыар кэмнэри ахтар.

❤️Эдэр сааһыттан сыралаах үлэҕэ сылдьыбыт, үгүс көлүөнэни минньигэс, тотоойу аһынан күндүлээбит асчыт идэлээх Екатерина Егоровна билигин да, ытык сааһыгар сылдьан,
"бокуойданнахпына иистэнэбин" диэн сэмэйдик этэрин истэҥҥин үөрэҕин, кини олоххо дьулууругар, күүстээх, модун санаатыгар махтанаҕын, холобур оҥостоҕун.

👵🏻🧵🪡Екатерина Егоровна, бэйэтэ этэринэн, кэлин иистэнэн саҕалаабыт. Тапталлаах кэргэнэ эрдэ олохтон туораан, 9 оҕотун, тулаайах балтыларын соҕотоҕун бэйэтэ атаҕар туруортаан, иистэнэр бокуой суоҕа диир. Билигин дьиэтин
ис бараанын ытык кырдьаҕас илиитинэн уонна иистэнэр массыынан тикпит олбохторо киэргэтэллэр.

🥰🙌🏻Улууспутугар ыытыллыбыт XV Олонхо ыһыаҕар былыргы сахалыы таҥаска анаан алта куобах тириитин имиппит. Дьиэҕэ олорон тирии имитиитигэр видеонан маастар-кылаас ыыппыт. Былыр эһэтэ кэппит куобах тириититтэн истээх түһүлүгүн тигэн бэлэмнээбит. Ыһыахха анаан олбохтору тигэн аймахтарыгар бэлэхтээбит. Билигин да иистэн илиитин араарбакка олороро үөрдэр.

🥰🙌🏻Салгыы "Көмүс сүүтүктэр" педагогическай үлэ бэтэрээнигэр, Үөһээ Бүлүү улууһун норуотун маастарыгар Долгунова Раиса Семёновнаҕа бэлэхтэрин илдьэн туттардылар.

🫶🏻Раиса Семёновна 7 хонуктаах оҕо эрдэҕинэ аҕата Долгунов Семён Данилович 1943 сыллаахха Ильмень күөлгэ кыргыһа киирбит. 7 күн сэриилэспитин кэннэ, бааһыран, билиэҥҥэ түбэһэ сылдьыбыт. Онтон босхолонон, салгыы Улуу Кыайыы олохтонуор дылы Германияҕа тиийэ сэриилэспит. Сэрии урусхалларын чөлүгэр түһэриигэ үлэлэспит.

🕯️🙏🏻Раиса Семёновна аҕам кыргыспыт сиригэр тиийэ сылдьар ыра санаалаах этим диир. Ол баҕа санаатын быйыл, 80 сааһыгар кэлэн толорбутуттан үөрэн олорор. Ол курдук, олунньу ыйга кыыһын уонна быраатын кытта Ильмень күөлгэ тиийэннэр, аал уоту оттон, алаадьынан айах тутан, хорсуннук охтубут буойуттары кэриэстээн кэлбиттэр.

❤️ Ийэ дойдуларын көмүскээн, сэриигэ дьоруойдуу охтубут буойуттары чиэстиир маннык үтүө быһыы атыттарга холобур буолара саарбахтаммат🙌🙌