#планерка

✅ Кулун тутар 24 күнүгэр 4-с нүөмэрдээх орто оскуолаҕа тэриллибит "Омук күүһэ - өйүгэр, өйүн күүһэ - тылыгар" нэһилиэнньэ сугулаанын туһунан улуус баһылыгын социальнай боппуруостарга солбуйааччыта Люция ТОЙТОНОВА иһитиннэрии оҥордо.

Саха тылын харааннааһыҥҥа, оҕолору сахалыы тыыны иҥэрэр туһугар сахалыы эйгэни олохтооһуҥҥа нэһилиэктэр бырайыактарын күрэҕэ ыытыллыбыта. Манна 1-кы миэстэни Үөдүгэй нэһилиэгин бибилэтиэкэрэ Тамара Саввинова көмүскээбит нэһилиэк бырайыага ылла. Иккис миэстэҕэ Харбалаах нэһилиэгэ, үһүскэ Өргүөт нэһилиэктэрэ таҕыстылар.

"Үөһээ Бүлүү" хаһыат

#планерка

✅ Үөрэх управлениетын салайааччыта Спиридон Борбуев киирии тылыгар кутурҕан тылтан саҕалаата.

Ол курдук, Үөһээ Бүлүү улууһун үөрэҕин салалтата, педагогическай общественноһа, улууспут биир ытык-мааны Киһитэ, РФ уопсай үөрэхтээһинин Бочуоттаах үлэһитэ, Саха республикатын үөрэҕириитин туйгуна, методиһа, улахан дьиэ кэргэн күн күбэй Ийэтэ, Эбээтэ Лазарева Мария Ильинична ыарахан ыарыыттан орто дойду олоҕуттан барбытынан, тапталлаах кэргэнигэр Леонид Гаврильевичка, оҕолоругар, сиэннэригэр, бары аймахтарыгар, доҕотторугар дириҥ кутурҕаммытын тиэрдэбит.
Мария Ильинична үрдүк библиотечнай үөрэҕи бүтэрэн, ССКП Үөһээ Бүлүүтээҕи райкомун партийнай библиотекатын сэбиэдиссэйинэн, кэлин улуустааҕы үөрэх салалтатыгар методист библиотекарынан үлэлээн, коллегаларын, үөрэх тэрилтэлэрин салайааччыларын истиҥ махталларын ылара. Мария Ильинична манна үлэлиир кэмигэр улуус үөрэҕин үлэһиттэрин туһунан таһааттарбыт "Живая нить" 3 чаастаах дьоһуннаах кинигэтин үгүс киһи үтүө махталынан ахтар.
Мария Ильинична
үтүө аата үйэлэргэ умнуллубат.

✅ Итиэннэ тэрээһин боппуруостарыгар тохтоото. Үөрэх эйгэтигэр үлэһиттэр, оҕолор улуус таһыгар араас быһыылаах тэрээһиннэргэ кытталларын туһугар 68 айан сырыыта оҥоһуллубут.

Бу нэдиэлэҕэ бары оскуолаларга сааскы сынньалаҥ күннэрэ. Бу да күннэргэ туһалаах тэрээһиннэр ыытыллаллар. Сааскы сынньалаҥ кэмигэр тэриллэр оскуола нэһилиэктэр оскуолаларын оҕолоро бэйэ-бэйэлэрин кытта билсэллэрин туһугар тэриллэр.

Сарсыҥҥаттан Бүлүү улууһугар Бүлүү бөлөх улуустарын дириэктэрдэригэр, солбуйааччыларыгар анаммыт "Хаачыстыба форума" быстах куурус саҕаланар.

Кулун тутар 30 күнүгэр 26-с төгүлүн, быйыл Үөһээ Бүлүүгэ М.А.Алексеев аатынан ааҕыылар ыытыллыахтара. Бу иннигэр Дьокуускай куоракка эрэ буолара.

Кулун тутар 31, муус устар 1 күннэригэр Н.Г.Чернышевскай аатынан Бүлүүтээҕи педагогическай колледж 100 сыллаах үбүлүөйүн бэлиэтээри олорор. Бу орто үөрэх кыһатыгар бастакы укулаат таастыы ууруллубут дириҥ, чиҥ билиини ылбыт учууталлары, иитээччилэри барыларын Бүлүүгэ күүтэллэр. Үбүлүөйгэ көхтөөх кыттыыны ылыҥ.

Дьарыктаах буолуу киинин нөҥүө 14-17 саастаах оҕолор 6 тыһыынча солкуобай хамнастаах үлэҕэ сыһыарыллыахтарын сөп. Манна оскуолалар бэйэлэрин үптэриттэн эбии харчы көрөн, хамнастаан үлэлэтиэхтээхтэр. Үгүс оскуола үбүлээһиҥҥэ ыарырҕатар буолан, сыллааҕы былаан туолбат. Оттон быйылгы былаан 140 оҕо. Бу боппуруоска Дьарыктаах буолуу киинин салайааччыта Николай Петров быйыл агро-оскуолалары кытта үлэлииргэ бэлэмин биллэрдэ.

Быйыл сайыҥҥы оҕо саада үлэлиирэ былааннанар.

"Үөһээ Бүлүү" хаһыат

#иһитиннэрии

✅ Кулун тутар 27 күнүттэн бу ый бүтүөр диэри, ол эбэтэр муус устар 1 күнүгэр диэри сарсыарда 10:00 чаастан киэһэ 20:00 чааска диэри улуус үрдүнэн уот ситимин арааран, өрөмүөн үлэтэ ыытыллар. Улуус киинигэр систиэмэлээн дизель холбонуоҕа. Нэһилиэктэргэ киэһээҥэ диэри уот суох буолар.

#спорт

✅ Улуустааҕы спорт управлениетын салайааччыта Егор Николаев нэдиэлэ устата ыытыллыбыт күрэхтэри сырдатта.

⭐️ Уфа куоракка мас тардыһыытыгар биирдиилээн бастыыр иһин күрэххэ Наталья Черноградская бастаата, Эрчим Баппаҕай саамай улахан ыйааһыҥҥа иккис миэстэни ылла. Уонна Ариан Григорьев үһүс бириистээх миэстэҕэ тигистэ.

Россия чемпионатыгар 5 иһигэр киирэри ситиһэн, сумо тустууга 2 спортсмен маастар нуорматын толордо.

Остуол тенниһигэр "Азия оҕолоро" күрэҕэр кыттыахтаах кыыспыт соҕуруу сбордана барбыта.

"Көтөр мээчик" оҕолорго күрэҕэр Боотулуу нэһилиэгин оҕолоро иккис миэстэни ыллылар.

Александр Варламов бильярд күрэҕэр 45 киһиттэн үһүс миэстэни ылан, үһүс төгүлүн өрөспүүбүлүкэ призера буолла.

Хампаҕа өрөспүүбүлүкэтээҕи мас тардыһыытын күрэҕэр Үөһээ Бүлүүттэн 10 оҕо барбытыттан 9-һа мэтээллээх кэллэ.

Гиирэ спордугар оҕолор ортолоругар эмиэ кэккэ ситиһиилэр бааллар. Манна абсолютнай кыайыылааҕынан Үөһээ Бүлүүттэн Виталий Николаев буолла.

Нэһилиэктэр икки ардыларыгар спартакиада чэрчитинэн мини-футбол күрэхтэһиитэ буолан ааста. Бастакы миэстэни Хоро нэһилиэгэ ылла, иккис - Үөһээ Бүлүү, үһүс миэстэ - Кэнтик.

Кыра нэһилиэктэргэ Өргүөт, Быракаан, Харбалаах үс миэстэни бу бэрээдэгинэн үллэһиннилэр.

Остуол тенниһигэр Үөһээ Бүлүүгэ ыытыллыбыт күрэххэ 114 спортсмен кытынна.

"Эрчимэн Бэргэн" күрэххэ Үөһээ Бүлүү оҕолоро хамаанданан иккис миэстэ буоллулар.

Күүстээх Ылдьыын бирииһигэр хамаанданан күрэххэ Үөһээ Бүлүү оҕолоро бэһис миэстэҕэ тигистилэр. Биир эрэ ыйааһыҥҥа чемпион баар буолла.