#бэлиэкүн

⭐️Үтүөлээх быраас Яков Егоров төрөөбүтэ 110 сылын бэлиэтээн...

Саха АССР уонна РСФСР үтүөлээх бырааһа, доруобуйа харыстабылын туйгуна, Ленин уордьанын кавалера ЯКОВ ПЕТРОВИЧ ЕГОРОВ төрөөбүтэ 110 сылыгар анаммыт мунньах улуус аактабай саалатыгар тэрилиннэ.

Яков Егоров улахан кыыһа РФ доруобуйатын харыстабылын туйгуна, үрдүкү категориялаах акушер-гинеколог, СӨ үтүөлээх бырааһа, Ньурба оройуонун бочуоттаах олохтооҕо, Егорова - Жиркова Вера Яковлевна кэргэнинээн СӨ үтүөлээх бырааһа, үрдүкү категориялаах хирург-онколог, Ньурба улууһун бочуоттаах олохтооҕо Жирков Руслан Захариевичтыын итиэннэ кинилэр кыыстара Айталина Данилова уонна уоллара Айсен Жирков бу бэлиэ күҥҥэ тэрээһиҥҥэ кыттыыны ыла кэллилэр.

Төгүрүк остуолга тэрилтэ салайааччылара, уопсастыбаннас, нэһилиэк аҕам саастаах дьоно-сэргэтэ, Кэнтик нэһилиэгин олохтоохторо уонна М.А.Алексеев аатынан лиссиэй-интэринээт уонна М.Т. Егоров аатынан 2-с нүөмэрдээх орто оскуола медицинскэй кылаастарын үөрэнээччилэрэ кыттыыны ыллылар.

Социальнай боппуруостарга уонна дьиэ кэргэн политикатыгар улуус баһылыгын солбуйааччыта Анна Уларова улуус салалтатын аатыттан эҕэрдэ киирии тылын анаата. Итиэннэ улуус баһылыга Валерий Николаев аатыттан эҕэрдэ суругу Яков Егоров төрөппүт улахан кыыһыгар, доруобуйа харыстабылыгар 50 сылы анаабыт, күн бүгүн Дьокуускайдааҕы клиническэй балыыһаҕа үлэлии-хамсыы сылдьар Вера Яковлевна Егорова-Жирковаҕа уонна Кэнтик нэһилиэгин бочуоттаах олохтооҕор, өр сылларга салайар үлэҕэ сылдьыбыт ытык кырдьаҕас Федор Лазаревич Николаевка туттарда.

Кэнтик нэһилиэгин баһылыга Сергей Федотов эҕэрдэ тылын анаата. "Чап уустарын түмэлин" пуондатын харайааччы Любовь Васильева Яков Егоров олорон ааспыт олоҕун, үлэтин туһунан мунньах кыттыылаахтарыгар билиһиннэрдэ.

Вера Яковлевна олус долгутуулаах, умнуллубат бэлиэ түгэн тосхойбутуттан долгуйан туран бииргэ төрөөбүттэрин, сиэннэр, хос сиэннэр ааттарыттан аҕаларын, эһэлэрин, хос эһэлэрин Яков Петрович Егоров аата үйэтитиллибитигэр Кэнтик нэһилиэгин олохтоохторугар, Үөһээ Бүлүү улууһун салалтатыгар барҕа махтал тылларын анаата.

Бэлиэ күҥҥэ Үөһээ Бүлүү улууһун киин балыыһатын комплексыгар медицинэ эйгэтигэр бэйэтин дьулуурунан, бэриниилээх үлэтинэн ыарахан ыарыһахтары эмтээн, бу дьыалаҕа бу олохтон букатынныы барыар диэри бүтүн олоҕун анаабыт, үтүмэн дьон олоҕун быыһаабыт уһулуччулаах быраас Яков Петрович Егоров үтүө аата иҥэрилиннэ.

"Үөһээ Бүлүү" хаһыат