#планерка

✅ Үөһээ Бүлүүтээҕи нэһилиэнньэ социальнай харысхаллаах буолуутун киинин үлэтин туһунан салайааччы эбээһинэһин толорооччу Зоя Егомина иһитиннэрдэ.

Улуус үрдүнэн социальнай көмөнөн 14027 киһи туһанар. Ол иһигэр Аҕа дойду Улуу сэриитин бэтэрээнин огдообото - 2, тыыл бэтэрээнэ 31 эрэ киһи, сулууспалыы сылдьан эмсэҕэлээһин ылан инбэлиит буолбут 1 киһи баар.

42 Афганистан уонна Чечня сэриилэрин кыттыылаахтара бааллар. Маны тэҥэ билиҥҥи байыаннай дьайыыга сулууспалыы сылдьааччылар биирдиилээн учуокка туран эрэллэр.

Улууска 1245 доруобуйатынан хаарчахтаах киһи биэнсийэ ылар. Ол иһигэр 206 оҕо, итиэннэ 1-кы группалааҕа - 190, 2-с группалааҕа - 343, 3-с группалааҕа - 513.

РФ таһымнаах үлэ бэтэрээнэ - 1202, СӨ үлэ бэтэрээнэ - 1530.

Харахтарынан көрбөт 21 инбэлиит учуоттаах.

38 киһи РФ донора дастабырыанньатынан көмөнү туһанар.

Кыаммат ыалларга субсидия көмөтүнэн дьиэлэрин газтааһыҥҥа 150 тыһ. солк. көрүллэр. Кииннэммит ититэр ситимҥэ холбонорго 125 тыһ. ананыан сөп. Быйылгы сылга газтааһыҥҥа уопсайа 9 мөл. 900 тыһ. солк., оттон кииннэммит ититэр ситимҥэ холбонууга 5 мөл. 250 тыһ. солк. анаммыта. Ол эрэн бу үп ситэри туһаныллыбакка сорох чааһа судаарыстыба бюджетыгар төннөрүллүбүт.

Социальнай хантыраак бырагырааматынан 26 мөл. 430 тыһ. солк. көрүллүбүтэ. Манна 102 кыаммат ыал уонна соҕотох олорор дьон туһаннылар. Ол курдук, бэйэ дьыалатын арыныыга - 24, үлэ буларга - 14, кэтэх хаһаайыстыба тэриниитигэр - 13, олох ыарахан, уустук балаһыанньатыттан тахсарга анаммыт көмө быһыытынан 40, соҕотох олорор 15 киһиэхэ үбүнэн көмө оҥоһулунна.

Үлэлиир саастаах инбэлииттэргэ анал бырагыраама чэрчитинэн 2 мөл. 762 тыһ. солк. 7 хантыраак оҥоһуллубут.

Оҕолоох ыаллары өйүүр бырагыраамалар күүскэ үлэлииллэр. Ол курдук, Өрөспүүбүлүкэтээҕи Ийэ хапытаала 300 тыһ. солк. суумалаах, регионнааҕы Ийэ хапытаала - 249 тыһ. солк.

"Дети столетия" хапытаал бүгүҥҥү күҥҥэ 110 тыһ. солк. тэҥнэһэн турар.

Элбэх оҕолоох ыаллар босхо сир учаастагын ыларга уочаракка тураллар. Улууска уһаайба сирэ суох буолан уочарат сүнньүнэн хамсыы илик. Ол уочаракка турааччылартан 94 ыал уһаайба ылартан аккаастанан, харчынан көрүллэр биир кэмнээх төлөбүр туһаммыт. Бу суума 200 тыһыынча солкуобайга тэҥнэһэр.

"Үөһээ Бүлүү" хаһыат

#планерка

✅ Спорт тэрээһиннэрин туһунан управление салайааччыта Егор Николаев кэпсээтэ.

23-гэр диэри саастаах ыччаттарга 30 хапсаҕайдьыт кыттыбытыттан Үөһээ Бүлүү хамаандата бастаан кубок хаһаайына буолла.

Бу күннэргэ ыытыллыбыт остуол тенниһин өрөспүүбүлүкэтээҕи чемпионатыгар 16 улуустан 200-тэн тахса спортсмен кыттыыны ылла. Улуус аатыттан кыттыбыт уолаттар хамаандалара 10-с миэстэни ылла, оттон кыргыттар хамаандалара үһүс бириистээх миэстэни ылары ситистэ. Пааранан күрэхтэһиигэ кыргыттарбыт Диана Пахомова уонна Эмилия Аввакумова үһүс миэстэни ыллылар.

Бырааттыы Ноговицыннар бириистэригэр хапсаҕайдаһан тустуу күрэҕэр 20-тэн тахса киһилээх Үөһээ Бүлүү хамаандата 6 ыйааһынынан күрэхтэстэ. Федерация Кубогар эрэнэр уолаттарбыт бириистээх миэстэлэри ыллылар.

Өрөбүллэргэ ыччат спартакиадата буолан ааста. 21 нэһилиэктэн 7 эрэ нэһилиэк кыттыыны ылла. Кыра нэһилиэктэргэ Хомустаах нэһилиэгин эрэ хамаандата кытынна уонна бастакы миэстэни ылан таҕыста. 35-гэр диэри саастаах 70-тан тахса ыччат дьон күрэхтэһэн, билсэн-көрсөн, алтыһан тарҕастылар.

Нэһилиэктэр икки ардыларыгар ыытыллар спартакиада 23 көрүҥүнэн ыытыллар. Мантан үгүс нэһилиэктэр 5-тии, 6-лыы көрүҥҥэ кыттыбакка олороллор эбит. 6 нэһилиэк 100% кыттан олорор.

Нам уонна Хоро нэһилиэктэрэ туох-баар көрүҥҥэ барытыгар кыттан инники күөҥҥэ иһэллэр. Киирсии тыҥааһыннаах. Итиэннэ бу бөлөххө Дүллүкү уонна Үөдүгэй нэһилиэктэрэ биир очукуонан быысаһан, тилэх баттаһан иһэллэр.

Тамалакаан нэһилиэгэ орто нэһилиэктэргэ инникилээн иһэр. Тамалакаан кэнниттэн Боотулуу уонна Харбалаах нэһилиэктэрэ тэбис-тэҥ очукуолаах иһэллэр.

Үһүс, кыра нэһилиэктэр бөлөхтөрүгэр Быракаан бастаан иһэр. Кини кэннэ Хомустаах нэһилиэгэ аҕыйах очукуонан хаалан иһэр.

Билигин спартакиадаҕа биир, быһаарыылаах көрүҥ хаалан турар. Ол курдук, кырдьаҕастар спартакиадалара бу бээтинсэ, субуота ыытыллаары турар. Аҕам саастаах дьон көхтөөхтүк кыттан, нэһилиэктэригэр быһаарыылаах очукуолары биэриэхтэрэ.

Санатар буоллахха, үс бөлөҕүнэн кыайыылаах нэһилиэктэргэ улахан суумалаах харчынан бириистэр туттарыллыахтаахтар.

"Үөһээ Бүлүү" хаһыат

#планерка

✅ Үөһээ Бүлүү улууһугар сокуону, бэрээдэги кэһии туругун туһунан Ис дьыала отделын бэрээдэги бөҕөргөтөр салаатын салайааччыта, полиция майора Владислав Поскачин иһитиннэрдэ.

Ааспыт нэдиэлэ устата Ис дьыала дьуһуурунай чааһыгар 26 иһитиннэрии киирбит. Мантан араас өрүттээх эт-хаан эчэйиитэ - 5, онтон үһэ охсуһуу түмүгэр кыра өрүттээх эчэйии буолар. Административнай боротокуолунан муҥурданыахтара.

6 түөкүннээһин, өлөрүүнэн куттааһын түбэлтэтэ - 1, элбэх квартиралаах дьиэҕэ киэһээҥи өттүгэр чуумпуну аймааһын - 4.

Дьуһуурунай чааска 3 киһи тутуллан киирэн тахсыбыт.

Уопсайа нэдиэлэ устата 20 административнай боротокуол оҥоһуллубут. ГАИ үлэһиттэринэн 107 боротокуол толоруллубут.

❗️Арыгы испит туруктаах икки суоппар уруулга олорон тутуллубут. Бу дьон 30 тыһыынча солкуобай ыстараабы төлүүллэрин таһынан балтараа сылга уруулга олорор, массыына ыытар бырааптара сокуонунан быһыллар.

"Үөһээ Бүлүү" хаһыат