#БиһирэмТылКүнэ #ДапсыДьыктаана #ИйэТыл

⭐️ Бүгүн О.Д.Федорова аатынан киин бибилэтиэкэҕэ төрөөбүт ийэ тылбыт хараанньыта, сахалыы саҥабыт дорҕоонун эмчитэ, лиҥкибиис-учуонай Дапсы – Мэхээлэ Бөтүрүөбүс Өлөксүөйэп төрөөбүт күнүн чэрчитинэн Дапсы дьыктаанын суруйуута буолла.

Улуус оскуолаларын, техникумун үөрэнээччилэрин, учууталларын, редакция үлэһиттэрин уонна биирдиилээн ааҕааччылары холбоон барыта 32 киһи кыттыыны ылла.

«Үрүҥ кэрэ сырдык» диэн сүүсчэ тыллаах тиэкиһи Исидор Барахов аатынан оскуола алын сүһүөх учуутала Варвара Петрова ааҕан суруттарда. Дьыктаан түмүгүнэн хас биирдии кыттааччыга туоһу суруктар туттарылыннылар. Түмүк сарсын киин бибилэтиэкэ саайтыгар тахсыаҕа.

Маны сэргэ бибилэтиэкэҕэ Дапсы кинигэлэрин быыстапката үгүс дьон болҕомтотун тарта.

Санатан эттэххэ, бэҕэһээ улуус дьаһалтатын сүбэ-мунньаҕын кэмигэр ыытыллыбыт дьыктааҥҥа барыта 34 салайааччы дьыктааны суруйбута.

«Үөһээ Бүлүү» хаһыат

#форум

❗️❗️❗️ Фашизмы утарабыт!

Өрөспүүбүлүкэтээҕи фашизмы утары охсуһуу идеяларын тула иккис төгүлүн ыытыллар форум иитинэн сэтинньи 5 күнүгэр Дьокуускай куоракка төгүрүк остуол буолан ааста. Манна нацизмы утарар санааны өрө тутар дойдубут патриоттара, Россия дьоруойдара — анал байыаннай дьайыы кыттыылаахтара, бэтэрээннэрэ, ыччат дьон, волонтердар, дьахталлар уонна төрөөбүт дойдуларын эҥкилэ суох таптыыр олохтоохтор кыттыыны ыллылар.

Оттон бүгүн, сэтинньи 6 күнүгэр, Үөһээ Бүлүү "Киновер" киинэ саалатыгар мустубут олохтоохтор, тэрилтэ салайааччылара фашизмы утарар санааны өрө тутар форум сүрүн тэрээһинигэр быһа холбонон кыттыыны ыллыбыт.

"1945 сыллааҕы ыам ыйыгар ситиһиллибит Улуу Кыайыы хаһан да хааннаах сэриини таһаарбаттыы кэлбит курдуга да, күн баччаҕа диэри фашизм саһан сытан иитиллэн - иитийэхтэнэн тахсан кэллэ. Анал байыаннай дьайыыга, иллээх-эйэлээх олохтоох нэһилиэнньэлэри босхолуур сыаллаах кыргыһыыга, бүтүн аан дойду инники кэскилэ быһаарыллыаҕа. Бу икки аҥаар сыл устата дойду үрдүнэн олохпут укулаата төрдүттэн уларыйбытын бэлиэтиир тоҕоостоох. Билигин ыччаттарбытын патриоттуу тыыҥҥа иитэн таһаарар сүрүн сорук турар. Атын тас дойду угаайылаах хараҥа санаатыгар сыстыбакка, сырдык, фашизмы төрдүттэн утарар үтүө санаалаах дьон буолан тахсалларыгар сүрүн күүһү ууруохтаахпыт. Бу туһугар оҕолору, ыччаты патриоттуу иитиигэ болҕомто күүскэ ууруллар. Ол курдук, сөптөөх дьарыктар, эр санааны иитэр уруоктар, кылаас таһынан тэрээһиннэр ыытыллаллар, киэн туттар биир дойдулаахтарбыт ааттара үйэтитиллэр. 130-тан тахса араас омук олохсуйан олорор Сахабыт сиригэр омугунан арахсыбакка, биир сомоҕо буолан, бары бииргэ иллээх-эйэлээх олохтоох буоларбыт туһугар, фашизм биһиги олохпутугар хаһан да күөрэйэн тахсыбатын ситиһэрдии, Улуу Кыайыы туһугар олохторун толук уурбут эһэлэрбит үтүө ааттарын үйэтитэн, Кыайыы туһугар үлэлиэххэ-хамсыахха", - диэн СӨ Ил Дархана Айсен Николаев төлөннөөх тылларынан куйаар ситимигэр быһалыы холбоммут тэрээһини саҕалаата.

Үөрүүлээх тэрээһиҥҥэ Ил Дархан үрдүкү судаарыстыбаннай наҕараадалары - анал байыаннай дьайыы кыттыылаахтарыгар мэтээллэри туттарда. Бу форум ураты түгэнинэн буолла.

#АнтифашистскийФорум
"Үөһээ Бүлүү" хаһыат

#уһуйаан

🏃‍♂️ "Аленушка" уһуйааҥҥа төрөппүттэр уопсай мунньахтара

Үөһээ Бүлүү улууһун Сэбиэтин дьокутаата Александра Михайлова сэбиэдиссэйдээх 1989 сылтан тэриллэн үлэлиир "Аленушка" оҕо сайдар киинэ 52 үлэһиттээх. Сэттэ бөлөҕүнэн 22 педагог үлэлиир, ол иһигэр логопед, психолог курдук сэдэх идэлээх педагогтар логопедическай бөлөххө мөлтөх саҥалаах оҕолору кытта ыкса дьарыктаналлар. Илиитигэр дьоҕурдаах оҕолору көрөн ылан туой буорунан дьарыктыыр улууска ураты эбии дьарык куруһуога үлэлиир. Ааптар бырагыраамата оҥоһуллан бу сыл бүтэһигэр күн сирин көрүөҕэ.

"Оҕо быраабын туһунан кэпсэтиэххэ" диэн тиэмэлээх сэтинньи 6 күнүгэр тэриллибит төрөппүт уопсай мунньаҕар 2022 сылтан саҥа ананан үлэлээн эрэр Үөһээ Бүлүү улууһугар оҕо быраабын боломуочуйалааҕа, бу уһуйааҥҥа иитиллэн тахсыбыт Гаврил Волков "Оҕо бырааба - төрөппүт эбээһинэһэ" диэн тиэмэнэн кыттыыны ылла.

Иитиллээччилэр уйулҕа өттүнэн чөл туруктарыгар анаммыт ыйга ыытыллар тэрээһиннэр чэрчилэринэн үөрэх управлениетын психолого-педагогическай сулууспатын сэбиэдиссэйэ, эмиэ бу уһуйааҥҥа иитиллибит, билигин бу уһуйааҥҥа иитиллэр оҕолордоох элбэх оҕолоох ыал ийэтэ Мария Спиридонова "Педагогтар уонна төрөппүттэр түмсүүлэрэ бииргэ үлэлэһии түмүгэр уйулҕа өттүнэн куттала суох эйгэни хааччыйыы" туһунан бэсиэдэлээтэ.

Оттон үөрэх управлениетын логопедическай арыаллааһынын сүрүн специалиһа Любовь Алексеева "Оҕо саҥарар саҥатыгар, тылын сайдыытыгар кэһиллии" диэн аныгы гаджет үйэтигэр иитиллэн тахсан эрэр оҕолор ортолоругар сытыытык турар боппуруоска кэпсэтиини ыытта.

Төрөппүттэргэ оҕо сааһынан уратыларын, хайа сааһыгар туох-ханнык хамсаныылары оҥоруохтааҕын, ханнык тыллары саҥарыахтааҕын, хайа өйдөбүллэри билиэхтээҕин быһаарда.

3 сааһыгар кэлэн оҕо чуолкайдык саҥарбат, тыл оннугар илиитин-атаҕын, хамсаныы көмөтүнэн туһанан бэйэтин наадатын быһаарсар буоллаҕына, саҥарар эрээри өйдөммөт буоллаҕына төрөппүт долгуйара тоҕоостоох. Маннык түгэҥҥэ логопед көмөтө быһаччы наадатын умнумаҥ.

Төрөппүт оҕотун кытта сахалыы чуолкайдык саҥаран кэпсэтиэхтээх, күннээҕи олоҕу токкоолоһон сэһэргэһиэхтээх. Оҕону кытта күннэтэ дьарыктаныахтаах. Кинигэтэ ааҕыҥ, остуоруйата кэпсэтиҥ, бииргэ оонньоһуҥ.

Статистика быһаарбытынан, 4 саастаах оҕолор гаджеты туттуулара, 7 саастаах оҕолор тус телефоннаахтара уопсай көрдөрүүттэн 35% ылар эбит. Оттон оскуолаҕа киирэр саастаах оҕолор өйгө тутар дьоҕурдара мөлтөөбүтэ бэлиэтэммит.

Өр телефоҥҥа олорор оҕо 10 тылтан 6 эрэ тылын өйдөөн хаалыан сөп. Оҕо сирэйин былчыҥнара ситэри сайдыбакка хаалыахтарын сөп. Киһи саҥатын кыайан өйдөөн истибэттэр. Хорутуулаах ураты толкуйа, оҥорон көрөр дьоҕура ситэ сайдыбат. Атын оҕону кытары бодоруһарыгар, бииргэ алтыһарыгар уустуктары көрсөр.

Онон, төрөппүттэр, оҕо төрөөбүт сахалыы тылынан саҥарар саҥата сайдарыгар күннэтэ төрөппүт ыкса алтыһыыта, көмөтө, дьарыга ирдэнэрин төрүт умнумаҥ.

"Үөһээ Бүлүү" хаһыат