Бүгүн нэһилиэк дьаһалтатын тэрийиитинэн эр дьон субуотунньуктара буолан ааста. Сарсыардаттан субуотунньукка Ленин аатынан уулусса 7 нүөмэригэр турар кладовка көтүрүүтүгэр Альберт Гаврильев салайааччылаах Олох-дьаһах, коммунальнай хаһаайыстыба тэрилтэтэ Үөһээ Бүлүүтээҕи филиалын уолланнарын биригээдэтэ биир погрузчик уонна Урал массыына техникалаах таһаарыылаахтык үлэлээтилэр.

Эбиэт кэннэ "Саханефтегазсбыт" Үөһээ Бүлүүтээҕи филиалын, Исидор Барахов аатынан орто оскуола, үөрэх управлениетын, улуус дьаһалтатын ЕДДС сулууспатын, П.Н.Тобуруокап аатынан норуот айымньытын киинин, ветеринарнай станция, нэһилиэк дьаһалтатын тэрилтэлэрин бэрэстэбиитэллэрэ - 16 эр бэрдиттэн турар биригээдэ Ленин аатынан уулусса 6/1 аадырыһыгар баар кладовканы көтүрүүгэ куйааһы, быылы аахсыбакка күүстээхтик үлэлээтилэр.