#планерка

✅ Киинэ уонна СМИ отделын үлэтин туһунан салайааччы эбээһинэһин толорооччу Анна Гурьева иһитиннэрдэ.

Сайыҥҥы кэмҥэ, "Киновер" саала үлэһиттэрэ уочаратынан уоппускаҕа барар кэмнэригэр, бэнидиэнньик, оптуорунньук өрүүр.

"Сахафильм" киинэ театрын кытта быһаччы дуогабардаах буолан, киирбит дохуоттан 70% өрөспүүбүлүкэ киинэ тыйаатырын бюджетыгар барар.

Үлэһиттэр улуус дьаһалтатын уураахтарын, дьаһалларын "Вести" хаһыакка таһаараллар. Тохсунньуттан ыам ыйыгар диэри 5 нүөмэр тахсыбыт.

"Үөһээ Бүлүү" хаһыат

#планерка

✅ Улуустааҕы тыа хаһаайыстыбатын үлэтин туһунан тыа хаһаайыстыбатын салалтатын салайааччыта Кирилл Гаврильев иһитиннэрдэ.

Ааспыт нэдиэлэ бүтэһигэр сүөһү эбии аһылыгын оҥорон таһаарыы бырагырааматыгар кыттан, 10 нэһилиэк тэриллиилээх хаһаайыстыбалара саҥа тыраахтардары ыллылар. Бу бырагыраамаҕа олоҕуран, тыраахтар сууматын 35% улуус дьаһалтата, 35% өрөспүүбүлүкэ бюджета уйунна. Тэриллиилээх хаһаайыстыбалар 30% төлөөтүлэр.

Улууска нэһилиэнньэттэн сайаапка быһыытынан 69 сибиинньэ, 1200 куурусса кэлэн түҥэтилиннэ. Кууруссалар айаннаан кэлэр күннэригэр халлаан итиитэ бэрт буолан 86 куурусса өлөн кэлбит. Сайаапка биэрэн баран тиксибэккэ хаалбыт дьоҥҥо тыа хаһаайыстыбатын управлениета сайаапка быһыытынан аҕалан биэриэҕэ.

Үүтү тутар собуоттар нэһилиэктэринэн үлэлэрин саҕалаан эрэллэр. Далыр, Боотулуу, Харбалаах нэһилиэктэригэр бу күннэргэ арыллыахтара. Тамалакаан нэһилиэгин арыы собуотугар ааспыт сылга үс үлэһиттээх эбит буоллаҕына, быйыл "Верхневилюйск" ХЭТ соҕотох үлэһиккэ эрэ хамнаһы көрбүт. Нэһилиэк баһылыга Петр Иванов эбии үлэһит миэстэтин көрөллөрүгэр көрдөстө.

"Верхневилюйск" ХЭТ 19 мөл. солк. кэриҥэ иэскэ олорор. Ол эрэн, үүт харчытыгар нэһилиэнньэҕэ төлөммөккө турбут иэс ыам ыйыгар диэри төлөнөн тиксэриллибит.

Улуус үрдүнэн ыһыы үлэтигэр кыра хойутааһын таҕыста. Намнар сирдэрин хорутан саҕалаатылар.

"Үөһээ Бүлүү" хаһыат

#планерка

✅ «Азия оҕолоро» VIII спортивнай оонньууларга кыттыы туһунан уонна Республикатааҕы оскуола оҕолорун спартакиадатын туһунан оҕо спортивнай оскуолатын салайаачыта Павел Уйгуров кэпсээтэ.

Билиҥҥи туругунан "Азия оҕолоро" спортивнай оонньууларга 5 оҕо чуолкай кыттара биллэн турар. Хапсаҕайга - 2, мас тардыһыытыгар - 3. Алыш диэн көрүҥҥэ 1 кыыс кыттара чуолкайдаммакка турар.

Бэс ыйын 6-10 күннэригэр Дьокуускай куоракка оскуола оҕолорун спартакиадатыгар 67 оҕо кытта бараары бэлэмнэнэр. 20 спорт көрүҥүттэн 17-гэр кыттан, уопсай түмүккэ Чурапчы улууһун кэннэ иккис миэстэҕэ сылдьабыт.

Оҕо спортивнай оскуолатын быйылгы үөрэх дьылыгар 565 оҕо үөрэнэн бүтэрэн эрэр. 12 спорт көрүҥүнэн утумнаахтык дьарыктаналлар.

"Үөһээ Бүлүү" хаһыат

#планерка

✅ Үөһээ Бүлүү улууһугар сокуону, бэрээдэги кэһии туругун туһунан Үөһээ Бүлүүтээҕи ис дьыала отделын бэрээдэги бөҕөргөтөр салаатын салайааччыта, полиция майора Владислав Поскачин иһитиннэрдэ.

Ааспыт нэдиэлэ устата улуустааҕы ис дьыала отделын дьуһуурунай чааһыгар 52 араас ис хоһоонноох иһитиннэрии киирбит. Мантан 10-на араас өрүттээх эт-хаан эчэйиитэ. Ол иһигэр 4 киһи охсуһан эчэйбит. Түөкүннээһин - 7, уоруу - 3. Маны тэҥэ 2 киһини ыт ытырбыт. Ытырыык ыттар хаһаайыттара биллэллэр, үлэ бара турар.

Нэдиэлэ устата административнай эппиэккэ 7 киһи тардыллыбыт. Дьуһуурунай чааска 5 киһи тутуллан киирэ сылдьыбыт.

ГАИ үлэһиттэрэ 98 административнай ыстараап боротокуолу толорбуттар. Ол иһигэр 2 итирик суоппар уруулга олорон тутуллубут.

"Үөһээ Бүлүү" хаһыат

#планерка

✅ "Табыс" ыччат фестивалыгар 23 ыччат дьонтон састааптаах хамаанда бэс ыйын 5 күнүгэр Кэбээйи улууһугар кыттардыы айанныаҕа. 1 мөлүйүөн солкуобай бириис пуондалаах фестиваль кыайыылааҕа сүрүн бирииһи - УАЗ массыынаны ылыаҕа. Фестиваль үөрүүлээх арыллыыта бэс ыйын 6 күнүгэр буолар. Ааспыт фестиваль 2022 сыллаахха Бүлүү куоракка ыытыллыбыта. Манна уопсайа 800 ыччат дьон кыттыыны ылбыта.

✅ Бэс ыйын 7 күнүгэр Үөһээ Бүлүүгэ Оҕо искуссто оскуолатын дьиэтигэр ЗАГС - турук аакталарын толорор уорган үлэһиттэрин семинара ыытыллаары турар. Манна нэһилиэктэртэн бу үлэҕэ сыһыаннаах эппиэттээх специалистар быстах үөрэхтээһини ааһыахтара.

✅ Бэс ыйын 7-9 күннэригэр Бүлүү бөлөх аҕам саастаах дьонун спартакиадата Үс Хоһуун стадиоҥҥа буолуоҕа. Уопсайа 176 кыттааччылаах спорт бырааһынньыгар улуус олохтоохторун көрө, ыалдьа кэлэргитигэр ыҥырабыт.

✅ Бу нэдиэлэҕэ соцдесант Хоро нэһилиэгэр үлэлиэҕэ. Ол курдук, улуус баһылыгын социальнай боппуруостарга солбуйааччыта салайааччылаах десант бэс ыйын 5 күнүгэр өрүс уҥуор тахсыаҕа.

✅ Байыаннай дьайыыга хантыраагынан сулууспаҕа ыҥыра олороллор. Үөһээ Бүлүү улууһуттан тылланан хантыраак баттаһан барар баҕалаахтар Үөһээ Бүлүү улууһун аатыттан барабын дииллэрин курдук өйдөтүү үлэтин ыытар тоҕоостооҕун бэлиэтээтилэр. Оччотугар улуус дьаһалтатын өттүттэн өйөбүл оҥоһулларыгар судургу буолуох тустаах. Бүгүҥҥү күҥҥэ улуус аатыттан баҕа өттүнэн хантыраак баттаһан 16 уол баран турар.

✅ Бэс ыйын 1 күнүгэр 5 киһи Бүлүү улууһугар, 16 киһи - ойуур хаһаайыстыбатын үлэһиттэрэ Сунтаарга ойуур баһаардарыгар үлэлээтилэр. Үөһээ Бүлүү сиригэр ойуур баһаара бэлиэтэммэт.

✅ Бэс ыйын 22 күнүгэр диэри "Сад памяти" диэн акция ыытыллар. Аҕа дойду Улуу сэриитигэр 27 мөлүйүөн киһи сырдык тыына быстыбытын санаан, өйдөөн туран, дойду үрдүнэн 27 мөлүйүөн мас олордор акция Бүтүн Россия үрдүнэн бара турар. Олохтоохтору акцияҕа көхтөөх кыттыыны ыларгытыгар ыҥыраллар. Мас олордон, акцияҕа кыттыспыккытын туһунан хаартыскаҕа түһэн +79141060399 бу нүөмэргэ ыытан кэпсиэххитин сөп.

"Үөһээ Бүлүү" хаһыат