#кыһа

⭐️Ил Дархан үөрэх тэрилтэлэригэр саҥа массыыналар күлүүстэрин туттарда

Айсен Николаев өрөспүүбүлүкэ оскуолаларыгар уонна орто үөрэх кыһаларыгар уопсайа 44 оптуобус күлүүһүн туттарда. Ол иһигэр 27 газель улуустарга, үс массыына Дьокуускай куорат оскуолаларыгар уонна 13 оптуобус идэни биэрэр орто үөрэх тэрилтэлэригэр ананна.

Бу барыта оҕолор үүнэллэригэр, сайдалларыгар туһуланар бырагыраама үлэтэ. Хас биирдии оскуола тиэхиньикэлээх буоллаҕына, оҕолор баран-кэлэн, араас күрэхтэһиилэргэ кыттар, олимпиадаларга ситиһиилэнэр кыахтаналлар. Биир этиинэн эттэххэ, оптуобустаах оскуола ыыра кэҥиир.

Оттон биһиги улууспутугар бүгүн эбии 4 остуолум ананна. Ол курдук, Нам, Мэйик, Тамалакаан нэһилиэктэрин оскуолалара уонна Үөһээ Бүлүүтээҕи Техникум саҥа газель массыыналаннылар.

Саҥа оптуобустар күлүүстэрин оскуолалар выпускниктара, Үөһээ Бүлүү улууһун бэрэстэбиитэлистибэтин салайааччыта Анатолий Иванов уонна Техникум дириэктэрэ Мотрена Осипова Ил Дархан Айсен Николаев илиититтэн туттулар.

Быйылгы сылга РФ Бырабыыталыстыбатын дьаһалынан, "Үөрэҕирии" национальнай бырайыак чэрчитинэн, Саха сиригэр уопсайа 121 мөл.солк. тахса суумалаах тиэхиньикэ бэриллибит.

Тимир көлөлөр этэҥҥэ сулууспалаатыннар🙌 күөх уоту, көнө суолу🙌🙌🙌

"Үөһээ Бүлүү" хаһыат

#спорт

⭐️ Бүгүн тэрилтэлэр икки ардыларыгар буулдьанан ытыы күрэҕэ буолла.

Тэрилтэлэр икки ардыларыгар ыытыллар спартакиада бу көрүҥүгэр 14 хамаандаттан 12 холбоһуктаах хамаанда кытынна.

Балаһыанньа быһыытынан 1 салайааччы, 2 дьахтар, 2 эр киһи кыттар. Үс бэрэбиэркэлиир ытыы кэннэ 5 ытыы зачекка ааҕыллар.

Тыҥааһыннаах киирсии түмүгүнэн:

141 очкону ылары ситиһэн, 1-кы миэстэҕэ Ю.Н.Прокопьев аатынан спортивнай оскуола, Үөрэх управлениета, 4-с N-дээх "Сардаана" оҕо уһуйаана, "Якутлесресурс" ГАТ холбоһуктаах хамаандата таҕыста.

2-с бочуоттаах миэстэни 133 очкону ылбыт Баһаарынай этэрээт, Көрдүүр-быыһыыр сулууспа, ГИМС, "Үөһээ Бүлүү" хаһыат редакцията, 6-с N-дээх "Солнышко" уһуйаана, Госпожнадзор хамаандалара ылла.

3-с миэстэҕэ 129 очколаах ОДьКХ, "Коммунтеплосбыт", "Водоканал" уонна 1-кы N-дээх "Ньургуһун" уһуйаан холбоһуктаах хамаандалара тигистэ.

"Үөһээ Бүлүү" хаһыат

#бэлиэкүн #үбүлүөй

⭐️Алтынньы 13 күнүгэр Нам сынньалаҥ киинигэр норуот суруйааччыта Миитэрэй Наумов 75 сааһын бэлиэтиир дьоро киэһэ истиҥ быһыыга-майгыга буолан ааста.

Суруйааччы хайдах биһиги нэһилиэккэ күтүөт буолан кэлиэҕиттэн, республика үрдүкү уорганыгар тахсыар диэри үлэлээбит кэмнэрин олус өрө көтөҕүллэн истиҥник аҕынна, кэпсээтэ.

Барахов совхозка бииргэ үлэлээбит дьоно Ороһуттан,Тамалакаантан, Балаҕаннаахтан кэлбиттэриттэн Дмитрий Федосеевич олус астынна, үөрдэ-көттө. Дэлэҕэ, сорох тыл этээччилэр урукку совхоз аппаратыгар кэлэн олорор курдукпут диэхтэрэ дуо. Эҕэрдэлэргэ дьон сүргэтин көтөҕөр ырыалар ылланнылар.

Суруйааччы Намҥа кэлэн нэһилиэк историятын көрдөрөр музейы тэрийбит биир үтүөтүн көрдөрөр быыстапканы Тобуруокап түмэлин үлэһиттэрэ туруорбуттара болҕомтону тарта. Маны сэргэ суруйааччы киһи быһыытынан биир өттүн кэргэн ,аҕа ,эһээ буоларын көрдөрөр хаартыскаларынан быыстапка туруорулунна.

Олохтоох библиотека сэбиэдиссэйэ Уруйдаана Юриевна Саввинова туруорбут баай ис хоһоонноох суруйааччы айымньыларынан турбут быыстапканы кэлбит дьон сэҥээрэ көрдө.

Дмитрий Федосеевичка бэйэтигэр библиографическай ыйынньык оҥорон бэлэхтээбитигэр суруйааччы улаханнык махтанна.

Бу дьоро киэһэҕэ кэлбит ыалдьыттарга барыларыгар кэнники тахсыбыт буруолуу сылдьар кинигэлэрин бэлэх уунна.

Тыа сирин олоҕун, дьонун бар дьоҥҥо лаппа чугастык кэпсиир биир бастыҥ суруйааччы буолара бу киэһэ өссө биһэргэннэ.

Галина Саввинова

"Үөһээ Бүлүү" хаһыат

#спорт

⭐️Алтынньы 13 күнүгэр остуол тенниһигэр тэрилтэлэр икки ардыларыгар күрэхтэһии буолан ааста.

Уопсай түмүгүнэн
1 ракетка
1м Иванов Александр, Оҕо спортивнай оскуолата
2м Поскачин Алексей, дьаһалта
3м Стручков Стас, Лесхоз
2 ракетка
1м Богачанов Альфред, дьаһалта
2м Алексеев Айаал, электростанция
3м Татаринов Леонид, Оҕо дьиэтэ
3 ракетка
1м Юмшанова Юля, оҕо спортивнай оскуолата
2м Буртахова Сайыына, өрөспүүбүлүкэтээҕи лиссиэй-интэринээт
3м Хобусарова Антонина, Лесхоз тэрилтэтиттэн оонньоото.

@uoheebuluu