#Кыайыыкүнэ

⭐️Икки фронт кыттыылааҕа Иннокентьев Иван Иванович - фронтовик ахтыыта

1941 сыллаахха атырдьах ыйын 28 күнүгэр Өргүөт нэһилиэгэр Энгельс колхоз Арбаҕастаах учаастагар, бурдук быһа сырыттахпына, бэбиэскэ туттарбыттара. 8 буолан барбыппыт: Таракатов Федор Саввич, Николаев Никита Игнатьевич, Матаяров Баһыкка Касьянович, Алексеев Михаил Данилович, Харлампьев Афанасий Егорович, Сиикээйэп Варлам Спиридонович, Дороохой Григорий Васильевич уонна мин. Бары мин барыллааларым, бары биир көлүөнэлэр. Онтон Үөһээ Бүлүүгэ киирэн, комиссияҕа киирэн, балаҕан ыйын 3 күнүгэр Үөһээ Бүлүү буоруттан арахпыппыт. Биһигини кытта маннык ааттаах дьон барбыттара: Толбонноохоп диэн Хоро киһитэ, Иванов Тихон, Васильев Василий - Мордьонноохоп, Василий Степанов - Буучугурас, Бытыакап уола Егоров Яков Васильевич о.д.а.

Якутскайтан Коминтерн борокуотунан 5 хонук айаннаан Усть-Кутка тиийдибит. Онтон Ангараҕа массыынанан куйаардаан бардыбыт. Иркутскайтан Маалта куоракка үөрэнэн баран, тохсунньу 1 күнүгэр 1942 сыллаахха фроҥҥа барбытым. Биир ый айаннаан, Калининскай область Ржев куоракка тиийдибит. Олунньу 3 күнүгэр сарсыарда 5 чааска, тоҥуу хаарга чопчу түһэн утуйан туран баран, наступлениеҕа киирдибит.

Сахалартан Чолбон колхоз председателэ Иванов Павел киирэн геройдуу өлбүтэ, Үөһээ Аһыкай киһитэ Васильев Кирилл, Ороһу киһитэ Павлов Хандараас, Кыһыл үлэһит колхоз киһитэ Александров Кииччэ уонна Ороһу нэһилиэгин киһитэ Николаев Михаил Иванович, Томскай Гаврил диэн Кыадаҥда киһитэ, Кынньаахырап Өлөксөөн II Ботулуу киһитэ ити сарсыарда өлбүттэрэ, араанньы буолбуттара: Илларионов Спиридон, Захаров Калиннин,Корякин Федор, Николаев Николай, Ойуров Андрей, Васильев Константин.

Аҕыс хонук устата сэриилэстибит. Олунньу 11 күнүгэр сарсыарда араанньы буолбутум, командирым Бакулин диэн киһи этэ. Ивановскай область Владимиров куоракка госпиталга киирдим. Ый кэриҥэ сытан, наһаа үчүгэйдик эмтэнэн, үөрдүм. Онтон Башкирияҕа Уфа куоракка салгыы эмтэнним. Атырдьах ыйыттан айаннаан дойдубар балаҕан ыйын 24 күнүгэр кэлбитим.

Салҕыыта комментарийга