#планерка

✅ Улуус дьаһалтатын үлэ нэдиэлэтин саҕалыыр сүбэ-мунньаҕы улуус баһылыгын үпкэ уонна экономикаҕа солбуйааччыта Саргылана Васильевна Афанасьева салайан ыытар.

Улууска бүгүҥҥү күҥҥэ бэлиэтэнэн турар 5 ойуур баһаарын бохсор үлэлэр туһунан уонна тэрилтэлэр, биирдиилээн дьон кыттыыларын туһунан ойуур хаһаайыстыбатын управлениетын салайааччыта Павел Викторович Тимофеев иһитиннэрдэ.

Быракаан нэһилиэгиттэн 6 км, Өргүөт нэһилиэгиттэн 7 км тэйиччи Даҥха диэн сиргэ турбут ойуур баһаарын иэнэ номнуо 10900 гектарга тиийдэ. Манна Тюмень куораттан 25 баһаарынай эбии көмөҕө кэлбитэ, инньэ гынан уопсайа 113 киһи үлэлии сылдьар.

Үөдүгэй нэһилиэгин Муҥур үрэх сиригэр турбут ойуур уота нэһилиэктэн 10 км тэйиччи сытар, 2326 га иэннээх ойууру ылла. Манна 60 киһи үлэлиир. Тюменьтан Авиалесоохрана үлэһиттэрэ көмөҕө кэлбиттэрэ. Үөдүгэй нэһилиэгин олохтоохторугар мобилизация биллэрэн, дьону таһаартыыр ирдэнэр.

Сургуулук Түҥүгэр от ыйын 13 күнүгэр тахсыбыт ойуур баһаарын умуруорууга 23 киһи үлэлиир. Бу баһаар иэнэ 5353 гектарга тиийдэ. Манна эргэ тыраахтыр үлэлиир. Сургуулукка тиийэрэ 19 км, Көтөрдөөхтөн 22 км хаалла. Тыала соҕурууттан үрдэҕинэ нэһилиэккэ кэлэр кутталлаах. Онон бу икки нэһилиэк дьонун мобилизациялыыр ирдэнэр.

От ыйын 14 күннэригэр Өргүөт нэһилиэгиттэн 14 км чугас Тарыҥ сиригэр турбут ойуур уота уопсайа 5727 га иэннээх ойууру сиэтэ. Билигин Өргүөт нэһилиэгэр 8 км чугаһаата. Бу баһаарга 48 киһи үлэлиир. Эбии куораттан Якутлесресурс үлэһиттэрэ кэллилэр. Дьон көмөтө олус наада, үлэһит дьон тиийбэт. Булууктаах тыраахтыр көмө тахсара наада. Манна ойуур уота соҕуруу өттүнэн уот ситимин ылан уоттара арахса сылдьыбыта, оптоволоконнай сибээс ситимин сиэн, билигин Өргүөт, Быракаан нэһилиэктэригэр суотабай сибээһэ суох. Өрөмүөннүүр биригээдэ барбыта да, сибээс суох буолан ханна тиийбиттэрэ биллибэккэ турар. Билигин 10 чааска бөртөлүөт көтөрө былааннанан турар.

Харбалаах нэһилиэгин Ныкакы үрэҕэр от ыйын 16 күнүгэр тахсыбыт ойуур баһаара 2588 га иэннээх ойууру ылла. Билигин бу баһаары умуруоруу үлэтигэр 29 киһи үлэлиир. Нэһилиэктэн 41 км, Быракаантан 40 км тэйиччи турар.

Бу 5 ойуур баһаарыгар уопсайа 274 киһи үлэлиир, Ол эрэн балаһыанньа кытаанах, уоту бохсууга үлэлии тахсар дьон тиийбэтэ улахан кыһалҕа буолла. Куорат баһаарынайдара кэлэллэрин күүтэбит. Үөдүгэй быһаарыгар ыытардыы бэлэм олороллор.

"Үөһээ Бүлүү" хаһыат

#планерка

✅ Бүгүҥҥү планеркаҕа СӨ Бырабыыталыстыбатын бэрэссэдээтэлин солбуйааччы, ыксаллаах быһыыны-майгыны сэрэтэр, туоратар, баһаартан сэрэхтээх буолууну хааччыйар хамыыһыйа бэрэссэдээтэлэ Виктор Омуков ыалдьыттыыр.

- Ыам ыйын 6 күнүттэн баһаартан сэрэхтээх буолуу сезона саҕаланыаҕыттан сокуоннайа суох өртөөһүнтэн саҕалаан ойуур баһаара олус элбээтэ. Өрөспүүбүлүкэ үрдүнэн 47 баһаарга дьон үлэлии сылдьар.

Үөһээ Бүлүү улууһугар билигин үлэни өссө күүһүрдэр, дьон көмөҕө тахсыыта ирдэнэр. Бүгүн 42-с нүөмэрдээх баһаарга Бурятия Өрөспүүбүлүкэтин баһаарынайдара көмөҕө кэлэн эрэллэр.

Мобилизованнай дьонтон докумуоннарын тутан, баһаарга үлэлэспит өҥөлөрүн иһин дуогабар түһэрсэбит. Манна 1 үлэ чааһа 290 солкуобайга тэҥнээх. Киһи хас чаас үлэлээбитинэн өҥөтө төлөнүөхтээх. Онон баһаарга үлэлиир баҕалаах дьон өҥөнү оҥорууга дуогабар түһэрсэргэ тиэтэйиҥ. Лесничество тэрилтэтигэр тиийэн испииһэккэ суруттарар, баһаартан сэрэхтээх буолуу инструкциятын ааһан, илии баттаан баран биирдэ ойуур баһаарыгар тахсыахтаахтар. Тиэхиньикэҕэ туһунан тариф, онон тиэхиньикэлээх дьон тахсара эмиэ ирдэнэр.

Улууска ыксаллаах быһыы-майгы биллэриллэн турар буолан, хамыыһыйа быһаарыыта тахсыбыт буоллаҕына, тэрилтэлэртэн үлэһиттэр үлэлэрин быыһыгар дьуһуурустубанан тахсаллара ирдэнэр. Бу быһаарыыны толорботох тэрилтэ салайааччыта эппиэккэ тардылларын санатабыт. Прокуратура хонтуруолга ылан олорор. Хас биирдии тэрилтэттэн кырата 5-тии киһи үлэлии тахсыан наада.

Улууска ойуур баһаардарын бохсор үлэлэр уонна ойуур баһаарын умуруоруу үлэтигэр тэрилтэлэр уонна биирдиилээн дьон кыттыыларын туһунан ойуур хаһаайыстыбатын тэрилтэтин салайааччытын солбуйааччы Мичил Егоров иһитиннэрдэ.

- Ойуур баһаардарын үлэтигэр дьон көмөҕө тахсара мөлтөх. Ону таһынан лесхоз тэрилтэтигэр бэлиэтэммэккэ эрэ тиийэн үлэлиир дьон баара бэлиэтэннэ. Хамнас аахсар саҕана ойуур хаһаайыстыбатын тэрилтэтигэр бэлиэтэммэтэх дьон харчы ылара уустук буолар. Ону өйдөөн, эрдэттэн тэринэн, тустаах тэрилтэҕэ тиийэн испииһэккэ суруттарар булгуччулаахтык ирдэнэр. Ону тэҥэ ойуур баһаарыгар үлэлии барар дьон туттар тэриллээх, утуйар мөһөөччүктээх, үс күҥҥэ аһыыр астаах, утары иһэр уулаах бараллара наада.

Бүгүҥҥү күҥҥэ Маҥаас нэһилиэгин диэки ардах түспэккэ турар. Бүгүн Бүлүү уонна Үөһээ Бүлүү территориятыгар зондировщик сөмөлүөт кэлэн үлэлээн барда. Быракаан нэһилиэгин диэки 20-тэн тахса км уһуннаах үөһэнэн ааһар оптоволокно ситимэ умайан турар буолан Быракаан, Өргүөт нэһилиэктэрэ интернет ситимэ суох олороллор. Баһаар уота уҕарыйдаҕына биирдэ өрөмүөн үлэтэ барыахтаах.

"Үөһээ Бүлүү" хаһыат