#бэлиэкүн

👏 Өрөспүүбүлүкэбит Ил Дарханыгар Айсен Николаевка истиҥ эҕэрдэ!

Бүгүн өрөспүүбүлүкэбитигэр икки төгүл үөрүүлээх бэлиэ күн. Саха Өрөспүүбүлүкэтин Судаарыстыбаннаһын уонна аҕа баһылык Айсен Николаев дуоһунаһыгар киирэр күнэ өрөспүүбүлүкэ олохтоохторун бүттүүн биир сомоҕо күүс оҥорор, инникигэ эрэли саҕар, балысхан сайдыыга түстүүр.

Уус Алдан улууһун олохтоохторун ааттарыттан Мүрү нэһилиэгин олохтоохторо Иван Тордуянов, Изабелла Аманатова, Найахы нэһилиэгин олохтооҕо Василий Федоров ис сүрэхтэриттэн эҕэрдэлэрин уонна баҕа санаа бастыҥын аныыллар.

Маны сэргэ, Г.В. Егоров аатынан Мүрү 1№-дээх орто оскуолатын 8 "а" кылааһын үөрэнээччитэ Айсен Николаевы кытта сирэй көрсөн билсибит Айхал Неустроев үөрүүтүн сэмэйдик үллэстэр, долгуйар.

Айхал былырыын сэттис кылааска үөрэнэ сылдьан Ил Дарханы Айсен Николаевы кытта көрсүөн, билсиэн баҕарарын туһунан сурук суруйан турар. Улуус биир бастыҥ үөрэхтээх, актыыбынай ыччатын баҕа санаатын толорон, Айсен Сергеевич Уус Алдан улууһугар Бороҕоҥҥо ыытыллыбыт Саха сирин норуоттарын VIII спортивнай оонньууларын үөрүүлээх арыллыытыгар ыҥырыы ыытан көрсүбүтэ. Бу Айхал саамай долгутуулаах уонна умнуллубат бэлиэ түгэнэ буолбута. Итиэннэ хайаатар да эҕэрдэтин тиэрдэр соруктааҕа хайҕаллаах.

🎥 ✍️Ольга Шепелева

✅ t.iss.one/murusahargata @ulusmedia

#бэлиэкүн

🙏Алтынньы 22 күнэ – Ийэ дойдуларын иһин Аҕа дойду сэриитин хонуутугар охтубут буойуннар сырдык ааттарыгар анаммыт ҮРҮҤ ТУРУЙА күнэ.

Бу бэлиэ күн олохтонуутугар Дагестан норуодунай суруйааччыта Расул Гамзатов оруоллаах. Кини ''Журавли'' диэн ырыа буолбут хоһоон ааптарын быһыытынан биллэр. Кавказка орто дойдуттан арахпыт дьон үрүҥ туруйаларга кубулуйалларын туһунан өйдөбүл баар. Ол иһин духуобунас, поэзия үрдүк аатыгар, ону тэҥэ сэриигэ өлбүт буойуттар сырдык кэриэстэригэр 2009 сыллаахха ЮНЕСКО Үрүҥ туруйа аан дойдутааҕы күнүн олохтообута.

Бу көтөр элбэх норуокка эйэни, сырдыгы кытта ситимнээх.
Холобур, Японияҕа үрүҥ туруйа уһун үйэни, Кытайга – өлбөт үөһү, христианскай итэҕэлгэ үтүө быһыыны кэрэһилиир.

Айылҕа маанылаах көтөрүн – үрүҥ туруйаны – харыстааҥ! Кинини түбэһэн көрүүнү сырдыгы, кэрэни, үйэлээх олоҕу кытта ситимнээҥ.

✍️ Уйаара КУСТУК

✅ @uamurusahargata @ulusmedia

#бэлиэкүн

🕯Алтынньы 30 күнэ – политическай репрессия сиэртибэлэрин кэриэстиир күн.

Бу күнү сымыйа балыыртан хаайыы дьылҕаламмыттар бэйэлэрэ туруорсубуттара. 1991 сыл алтынньы 18 күнүгэр РСФСР Үрдүкү Сэбиэтин Ыйааҕынан анал күн бигэргэммитэ. ХХ үйэ бастакы аҥаарыгар дойду үрдүнэн ыытыллыбыт политическай хамсааһыннар мөлүйүөнүнэн киһини ''норуот өстөөҕө'' оҥорон, хаайыыга умса аспыттара, быстах дьылҕалаабыттара. Ити долгуҥҥа салайааччылартан, айар интеллигенцияттан саҕалаан, боростуой колхуостаахха тиийэ араас араҥа түбэһэн, кинилэр дьиэ кэргэттэрэ эмиэ олох дьолун билбэтэхтэрэ. Репрессия тыына бүтүн норуоттары хаарыйбыта. Өлүү-сүтүү кэмэ суох элбэҕэ, үүрүү-үтүрүйүү улахана. Ол бааһа күн бүгүн даҕаны оһо, дьарҕата ааһа илик.

Саха сиригэр репрессия хаарыйбыт ыала, аймаҕа аҕыйаҕа суох. Бүгүн – бу ыар дьайыы сиэртибэлэрин кэриэстиир күн. Устуоруйа суураллыбат, киһи умнуллубат!

✅ @uamurusahargata @ulusmedia

#бэлиэкүн

🚩 Сэтинньи 7️⃣ күнэ сэбиэскэй кэм дьонун өйүгэр-санаатыгар бэлиэ күнүнэн дириҥник иҥэн сылдьар.

🚩 ''Сэтинньи сэттистиир күүрээннээх күнүгэр...'' диэн ырыа тылыгар этиллэринии, 1917 сыл сэтинньи 7 күнүгэр үлэһит норуот революцияҕа турунан, ыраахтааҕылаах былаас суулларыллан, саҥа олох өрөгөйдөөбүтэ.

🚩 1918 сылтан Өктөөп революциятын күнэ бүттүүн сэбиэскэй норуот бырааһынньыгынан биллэриллибитэ. Бу күн дьон-сэргэ өрө көтөҕүллэн, миитиҥҥэ мустара, парааттаан хаамара. Маҕаһыыҥҥа ас мааныта атыыга тахсан, дьиэ аайы бырааһынньык остуола тардыллара.

🚩 1992 с. союз ыһыллыытыгар ити күн Байыаннай Албан Аат, 1995 сыл Сомоҕолоһуу күнүнэн биллэриллибитэ. Ол да буоллар, аҕа саастаах көлүөнэ дьон Өктөөп бырааһынньыгын син биир бэлиэтииллэр.

🚩 Улуу Өктөөп революциятыгар ураа, табаарыстар!

✅ @uamurusahargata @ulusmedia