📰📰📰

⭕ Найахы нэһилиэгин ытык олохтооҕо Николай Николаевич Иванов (I) 1924 сыллаахха Нам улууһун Арбын нэһилиэгэр 17 оҕолоох дьиэ кэргэҥҥэ төрөөбүтэ. Ворошилов аатынан колхуоска 1943 сыллаахха бэс ыйыгар биригээдэнэн Маамылы диэн күөлгэ балыктыы сылдьан, Кыһыл Аармыйа кэккэтигэр ытык иэһин толоро ыҥырыллыбыта. Бурятия Даурия куоратыгар 210-с дивизияҕа, 649 стрелковай пуолкаҕа 1945 сылга диэри сулууспалаабыта. Бу сылдьан минометнай атаакаҕа төбөтүгэр ыараханнык бааһыран, госпитальга сыппыта. Бу кэмҥэ фашисткай Германия үлтүрүтүллэн, Кыайыы өрөгөйдөөбүтэ. Ол эрээри, илин милитаристскай Япония бөҕөргөтүллүбүт сэриилэрэ үлтүрүтүллэ иликтэрэ.

⭕ Онон үтүөрэн тахсаат даҕаны, 1945 сыл сайыныгар саллааттар фроҥҥа киирэллэрин туһунан бирикээһи туппуттара. Онон кинилэр чаастара сатыы, массыынанан, монгуоллар пуойастарынан айаҥҥа туруммуттара. Биир кэм дьоппуоннар сөмөлүөттэрэ буомбалыыра, буулдьа төбөлөрүн оройунан ыйылаан ааһара. Олус илистиилээх, куйаас кэмнэри туораан, Кытай сиригэр Кыайыыны көрсүбүттэрэ. Салгыы Даурияҕа байыаннай сэби-сэбиргэли харабыллыыр 120-с пуолкаҕа сулууспалаабыта.

⭕ Дойдутугар 1947 сыллаахха төннөн кэлэн, колхуос, сопхуос үлэтигэр үлэлээбитэ. Бочуоттаах сынньалаҥҥа Арбын оскуолатыгар оһох оттооччунан үлэлии сылдьан тахсыбыта. Дүпсүнтэн төрүттээх Д.Н. Рожинаны кэргэн ылан, үс оҕолонон, алта сиэннэнэн, үс хос сиэни көрөр үөрүүтүн биллэ.

⭕ Николай Николаевич 97 сааһыгар Найахыга кыыһа Александра Федорова дьиэ кэргэнин тапталыгар угуттанан, уһун үйэлэнэр дьолу билэн, этэҥҥэ олорор. Ытык бэтэрээн Аҕа дойду сэриитин 2-с степеннээх уордьанынан, Жуков, Японияны кыайыы иһин, 1941-1945 сс. тыылга килбиэннээх үлэтин иһин о.д.а. үбүлүөйдээх мэтээллэринэн наҕараадаламмыта.

#уйгусирэуусалдан
#уусалданхаһыата
#мүрүсаһарҕата
#бэлиэкүн
#бэтэрээн
https://www.instagram.com/p/CPE4hMLMn2z/?utm_medium=share_sheet