#биирбастыҥхолобур

💢 “Түмэр эйгэ”: киин балыыһа эдэр исписэлиистэргэ уопуттаах үлэһиттэр настаабынньыктыыр холобурдарын билиһиннэрдэ

“Түмэр эйгэ” гражданскай форумҥа улуус киин балыыһатын кэлэктиибэ Педагог уонна Настаабынньык сылыгар сыһыаран уопуттаах уонна эдэр медиктэр икки ардыларыгар үлэ сыһыаннаһыыта баарын билиһиннэрдэ.

Ол курдук, эмп тэрилтэтин бары салааларыгар үлэлии киирэр эдэр исписэлиистэргэ уопуттаах үлэһиттэртэн настаабынньыктар сыһыарыллан, эдэрдэр үлэ хаамыытыгар уонна кэлэктиип уопсастыбаннай олоҕор түргэнник киирэллэригэр, идэлэригэр уопуту ылыылара түргэтииригэр, үлэҕэ бастакы хардыыларыгар көмө, сүбэ-ама буолалларын сиһилии кэпсээтилэр.

Маннык дьаһаныы улуус киин балыыһатын улахан кэлэктиибигэр 2017 сылтан саҕаламмытын этэллэр. Ити сыл 30-тан тахса сыл уопуттаах, улууска доруобуйа харыстабылын эйгэтигэр улахан кылааттарын киллэрбит быраастар “Народное признание” өрөспүүбүлүкэтээҕи куонкуруска ситиһиилээхтик кыттыбыттара. Кинилэр истэригэр Кэптэни учаастактааҕы балыыһатын терапевт-бырааһа Раиса Петухова – “Мин таптыыр бырааһым”, Бороҕон сэл. учаастактааҕы педиатр-бырааһа Варвара Находкина – “Оҕолорго сүрэхпин аныыбын”, доруобуйа харыстабылын эйгэтигэр тэрийээччи Алексей Заровняев “Медицина туһугар” хайысхаларга кыайыылаах буолбуттара.

Аҕа кэллиэгэлэрин холобурдарынан, СӨ доруобуйа харыстабылыгар министиэристибэтэ эдэр исписэлиистэргэ анаан ыытар улахан таһымнаах “Профессия жизнь” куонкуруһугар 2022 сыллаахха фтизиатр-быраас Ньургуяна Ширяева, лаборатория технигэ Валентина Бечеканова, Арыылаах бөһ. фельдшерэ Айталина Ховрова идэлэринэн хайысхаларга өрөспүүбүлүкэҕэ бастыҥ аатын ылбыттара, “Суһал көмө” сулууспатыттан медбыраат Эдуард Захаров доруобуйа харыстабылын үлэһиттэрин идэлээх сойуустарын бастыҥ актыбыыһынан ааттаммыта.

Бу курдук үлэҕэ, уопсастыбаннай олоххо көхтөөх кэлэктиип салайааччыларыгар кылаабынай быраас Анна Петроваҕа эдэрдэргэ настаабынньыктары сыһыарыы үлэтин тэрийбитин, тус бэйэтэ эмиэ өрүү сүбэ-ама буоларын бэлиэтээн махталларын тиэртилэр.

✅ t.iss.one/murusahargata