#история

🚞Сыырдаах үөрэнээччилэрэ «Кыайыы поеһа» быыстапка-түмэли олус сэргээтилэр

Балаҕан ыйын 26-28 күннэригэр Аллараа Бэстээххэ көһө сылдьар «Кыайыы поеһа» быыстапка-түмэл үлэлиир диэн истэн химия, биология учуутала, 8 кылаас салайааччыта Лариса Черкашина билиэт булан, төрөппүттэр өйөбүллэринэн массыына кэпсэтэн, үөрэнээччилэрин илдьэ баран илэ-бодо көрөн-истэн кэллилэр.

Бу «Кыайыы поезда» аан бастакытын Саха сиригэр кэлбит. Быыстапка-түмэл тимир суол вокзалыгар турбут. Араас тиэмэлэринэн арахсыбыт Аҕа дойду Улуу сэриитин кэмнэрин кэрэһэлиир быыстапканы уон вагон устун көрөҕүн-истэҕин эбит.

Оҕолор кэпсииллэринэн, кыайыы поеһын бастакы вагонугар эйэлээх 1941 сыл бэс ыйын дьоллоох күннэрэ ойууланар, кэпсэнэр. Иккис вагоҥҥа саа-саадах туппут дьон уот кутаа ортотугар сэриилэһэ сылдьаллара көстөр.

Оҕолор сүрдээҕин сэргээн, кыайыы хайдах курдук ыараханнык кэлбитин илэ харахтарынан көрөн, итэҕэйэн кэлбиттэрэ кэпсээннэриттэн көстөр. Cалгыы өссө ыар көстүү арыллар, билиэҥҥэ түбэспит дьону биир вагон олоччу көрдөрбүт.

Ол курдук ырыган, кубархай дьүһүннээх-бодолоох дьон уобарастарын ыар-санньыар тыас-уус ситэрэн, көрөөччүлэри ордук итэҕэтэр турукка киллэрэр, ол иэдээн кэмнэри эргитэр диэн сонньуйбуттуу туттан олорон оҕолор кэпсииллэр уонна сэрии ыар кэмин көрдөрөр экспозициялары саас-сааһынан аттаран, аудио-кэпсээн ситэрэн биэрэр дииллэр.
Хас биирдии вагоҥҥа Аҕа дойду Улуу сэриитин кэрчик кэмнэрин көрдөрөр экспозициялардаах, ол курдук эпэрээссийэлии турар дьон, окуопалар, Ленинград блокадата уо.д.а. көстүү барыта баар.

Музейга түмүллүбүт экспозициялары И.С. Портнягин аатынан Сыырдаах орто оскуолатын 8 кылааһын оҕолоро сүрдээҕин диэн сэҥээрэн, хаан тохтуулаах сэрии хаалларбыт дьулаан суолун-ииһин курутуйа көрөн кэлбиттэр.

✍Ньургуйаана Хорунова, иитэр үлэҕэ дириэктэри солбуйааччы

✅ t.iss.one/murusahargata @ulusmedia