#кэрээйгэтэ

Бүгүн Күлүмнүүр аатынан "Тойон Мүрү" култуура дыбарыаһыгар биир дойдулаахпыт, бэйиэт, Арассыыйа суруйааччыларын уонна суруналыыстарын сойууһун чилиэнэ,
Саха Өрөспүүбүлүкэтин култууратын үтүөлээх үлэһитэ,
Түүлээх, Бээрийэ, Байаҕантай,
2-с Байаҕантай нэһилиэктэрин,
Уус Алдан улууһун бочуоттаах олохтооҕо Анатолий Старостин – Сиэн Кынат "Дьылҕам дьикти бэлэҕэ" айар киэһэтэ буолла.

Бэйиэт айар үлэтин ХИФУ философия кафедратын сэбиэдиссэйэ, СӨ наукаларын үтүөлээх диэйэтэлэ Андрей Саввинов билиһиннэрдэ. Сиэн Кынат дириҥ түгэхтээх, таайтарыылаах хоһооннорун Ульяна Бурнашева – Уйана, Александр Гоголев, "Уран тыл алыба" түмсүү кыттыылаахтара ааҕан иһитиннэрдилэр.
Оттон кини ырыа буолбут хоһооннорун СӨ норуодунай артыыстара Клавдия, Герман Хатылаевтар,
Опера уонна балет тыйаатырын артыыстара: РФ уонна СӨ үтүөлээх артыыската Анна Дьячковская, СӨ култууратын туйгуннара Зинаида Колодезникова, Екатерина Захарова, “Үрдэл” 2019, 2021 сыллар лауреаттара Леонид Готовцев, Алита Мигалкина ыллаатылар. Биир дойдулаахтарбыт Иван Васильев, Александра Сивцева, Константин Иванов, Бээрийэ нэһилиэгин уус-уран самодеятельноһын кыттыылаахтара эҕэрдэлээтилэр.

Дьоро киэһэ улахан чааһа бэйиэт музата, Намылыйа Хотуна, олоҕун аргыһа СӨ култууратын туйгуна, Бээрийэ нэһилиэгин бочуоттаах олохтооҕо Люция Петровналыын Сиэн Кынат улахан тапталларыгар ананна.

Бэйиэт таптал туһунан 150-тан тахса хоһоонноохпун диэн туран, тапталыгар анаабыт биир хоһоонун ааҕан иһитиннэрдэ. Күндү кэргэнигэр анаабыт хоһоонноро ырыа буолан айар киэһэни киэргэттилэр.

✍️ Мария Аргунова

✅ t.iss.one/murusahargata @ulusmedia

#кэрээйгэтэ

💢 Бороҕон нэһилиэгин устуоруйата оскуола түмэлигэр үйэтитиллэр

"Бороҕон нэһилиэгин устуоруйата" оскуолатааҕы түмэл 1980 сылтан үлэлиир. Түмэли бэтэрээн учуутал Акулина Сокольникова иилээн-саҕалаан үлэлэтэр.

Түмэлгэ олох былыргы щвейцарскай эти эрийэр массыына, “Зингер” иистэнэр массыына, неолит үйэтин саҕанааҕы кыһыах, кыргыс үйэтигэр хоһуун ытыллыбыт муос оноҕоһо, олоҥхоһут Ефим Барашков тус бэйэтэ туттубут мала-сала, оскуола бастакы учуутала, биллиилээх советскай-партийнай үлэһит Дмитрий Шепелевтан саҕалаан, учууталлар үөрэтэр-көрдөрөр посуобуйа оҥорор бэчээтинэй буукубалара харалла сыталлара устуоруйа олус күндү кэрэһиттэрэ буолаллар.

📹 Ольга Шепелева

✅ t.iss.one/murusahargata @ulusmedia

#кэрээйгэтэ

Муус устар 25-26 күннэригэр Мүрү 1-гы №-дээх орто оскуолатыгар сыл аайы ыытыллар "Ыллаа-үҥкүүлээ, оҕо саас!" фестиваль ыытылла турар. Быйылгы фестиваль оскуолабыт 150, Россия образцовай "Кэнчээри" ансаамбыла Киин телевидениеҕа уһуллубута 40 сылларыгар ананар.

Бэҕэһээ алын сүһүөх кылаастар бары кэнсиэрдээн бүттүлэр. Бүгүн орто сүһүөх уонна 10-с кылаастар кэнсиэрдэрэ буола турар.

Кылаастар кэлэктииптэрэ бары кыһаллан бэлэмнэммиттэрэ тута харахха быраҕыллар. Көстүүм бөҕө тигиллибит. Ордук кыра сүһүөх кылаастар төрөппүттэрэ оҕолоругар саҥа таҥастары тэрийбиттэр. Саҥа нүөмэрдэр, үҥкүү, ырыа, саҥа ааттар иһилиннилэр. Оскуола боруогун саҥа атыллаабыт 1-кы кылаастар кэнсиэрдэрэ бэрт тэрээһиннээхтик буоллулар.

Оскуола салалтата кылаас салайааччыларыгар, үөрэнэччилэргэ, төрөппүттэргэ бэртээхэй сааскы бырааһынньыгы бэлэхтээбиттэригэр махтанар.

✍️ Мария Аммосова, уопсас. кэрэсп.

✅ t.iss.one/murusahargata @ulusmedia

#кэрээйгэтэ

💠 «Кэнчээрилэр» кэрэ кэнсиэри бэлэхтээтибит

Бу күннэргэ Арассыыйа үтүөлээх образцовай «Кэнчээри» народнай ансаамбыла 51-с сылын отчуоттуур кэнсиэрин оҥордо. Кэнсиэргэ хор, үҥкүү, ВИА бөлөхтөр кытыннылар. Ону таһынан, кыра солистар – Петя Черкашин учууталларыгар махтанан, Ксюша Охлопкова «Күн бытархайын» уонна өрөспүүбүлүкэтээҕи куонкурустар лауреттара Вика Терехова нуучча классикатын «Родина» ырыаны, Виолетта Колесова доҕотторун кытта Алябьев «Соловейын», Виолетта Омукчанова К. Герасимов «Саха сирин халлаана» ырыатын, Света Пермякова Д. Кабалевскай классика буолбут «Школьные годы» ырыатын ыллаан көрөөччүлэри долгуттулар.

Араас элбэх тэрээһин, эксээмэннэргэ бэлэм, сарсыҥҥытыгар оскуолалар ыһыахтара буолар ыктарыылаах уонна федеральнай стандарт киирдэ диэн ансаамбылга урукку курдук дьарыктанар чаас бэриллибэтэҕин үрдүнэн оҕолор син быыс булан кэнсиэрдээн дьон-сэргэ биһирэбилин ыллылар.

Быйылгы үөрэх дьылын 16 оҕо бүтэрэн барарынан бэлэх-туһах бэрсэн, ырыанан-үҥкүүнэн эҕэрдэлэһэн выпускниктары алҕаан атаардыбыт. Олортон хас да оҕо култуура хайысхалаах үөрэххэ баралларын биллэрдилэр.

Вероника Гоголева РФ, СӨ үтүөлээх артыыһа Анна Дьячковская анал стипендиятын тутан үөрдэ-көттө. Настя Рожина, Виолетта Местникова, Айыына Рожина, Дьулус Сивцев, Ньургуйаана Турантаева уо.д.а. "Бүтэһик чуорааҥҥа" араас таһымнаах стипендиялары тутаннар үөрүүлэрэ үксээн үрдүккэ кынаттаннылар.

Ансаамбыл бу күннэргэ министиэристибэ ыҥырыытынан 17 сыл устата ыытыллыбатах өрөспүүбүлүкэ оҕолорун спартакиадатын Ил Дархан кыттыылаах аһыллыытыгар РФ, СӨ Гимнэрин ыллыы бараары сылдьарын бэлиэтиибин. Итини таһынан оскуолалар хордарын Бүтүн Арассыыйатааҕы куонкурустарыгар, эһиил сайын буолар "Азия оҕолоро" 8-с спортивнай оонньуулар култуурунай бырагыраамаларыгар бэлэмнэнэр сыалтан бэс ыйын 5-25 күннэригэр музыкальнай лааҕыры үлэлэтэр былааннаахпыт. Лааҕырга сылдьыан баҕалаахтар 89841018966 нүөмэргэ билсэргитигэр.

✍️ Василий Парников, ансаамбыл салайааччыта

☑️ https://мюрюгазета.рф/article/98607

✅ t.iss.one/murusahargata @ulusmedia

#кэрээйгэтэ

💠 "Уһуктуу" түмсүү "Күөххэ үктэннибит" литературнай марафона түмүктэннэ

Бүгүн С.Васильев-Борогонскай аатынан киин бибилэтиэкэҕэ улуустааҕы "Уһуктуу" литературнай түмсүү иһинэн ыытыллыбыт "Күөххэ үктэннибит" диэн ааттаах литературнай марафон түмүгүнэн кыайыылаахтары эҕэрдэлээһин буолла. Күрэх ыам ыйын 15-26 күннэригэр алта түһүмэҕинэн ыытыллыбыта. Бүгүн кыайыылаахтары эҕэрдэлиир тэрээһин буолла.

☑️ Сиһилии: https://мюрюгазета.рф/article/98741

✅ t.iss.one/murusahargata @ulusmedia

#кэрээйгэтэ

💠Охонооһой Буурсап аҕыс нэһилиэккэ олоҥхо түһүлгэтин түстүөҕэ

Хоро нэһилиэгин олохтооҕо, олоҥхону толорооччу, оһуохайдьыт Охонооһой Буурсап – Бөскөй Бөҕө, олоҥхоһут Дмитрий Михайлович Говоров – Олоҥхоһут Миитэрэй төрөөбүтэ 175 сылынан, улуус аҕыс нэһилиэгэр норуот тылынан уус-уран айымньытын чыпчаалын – олоҥхону киэҥ араҥаҕа тарҕатар, өбүгэбит төрүт үгэстэрин билиһиннэрэр сыалтан “Оҕустаах Охонооһой олоҥхолоох айана” бырайыагынан алгыстаах айаҥҥа турунна.

Бүгүн Афанасий Петрович Уолчаанын миинэн Хомустаах бөһүөлэгэр тиийиэҕэ, 19 чаастан олоҥхо түһүлгэтэ түстэниэҕэ.

Салгыы бэс ыйын 6 күнэ – Элэһин (Хардыы), Тумул, 7 күнэ – Саһылыкаан, 8 күнэ – Сыырдаах, 10 күнэ – Окоемовка, 11 күнэ – Уус Күөлэ. Тиһэх сир – бэс ыйын 20 күнүгэр олоҥхоһут Миитэрэй үбүлүөйүгэр анаммыт улуустааҕы Үрүҥ тунах ыһыахха Бэйдиҥэҕэ тиийэннэр бырайыактарын түмүктүүр былааннаахтар.

Онон олоҥхоһуппутугар Охонооһой Буурсапка айанын аартыктара аһаҕас, ылыммыт соруга этэҥҥэ туоларыгар, ситиһиилэх буоларыгар баҕарабыт.

✍️ Ольга Шепелева

✅ t.iss.one/murusahargata @ulusmedia

#кэрээйгэтэ

💠 “Удьуор утум ситимэ. Уус Алдан” кинигэ сүрэхтэннэ

Айылҕаттан анатыылаах, Үрдүкү Айыылартан айдарыылаах норуот уус-уран оҥоһуктарын сөргүтүүнэн дьарыктанар маастардары билиһиннэрэр кинигэ бүгүн С. Васильев – Борогонскай аатынан Уус Алданнааҕы кииннэммит бибилэтиэкэҕэ сүрэхтэннэ.

Кинигэ күн сирин көрөрүгэр сыратын биэрбит, саха омук үйэттэн-үйэҕэ илдьэ кэлбит сиэрин-туомун аныгы дьоҥҥо, үүнэр көлүөнэҕэ бэйэтин тылынан тиэрдибит ааптар – Саха Өрөспүүбүлүкэтин норуотун маастара, Арассыыйа айар худуоһунньуктарын сойууһун чилиэнэ, “Мындыр” түмсүү чилиэнэ, кылдьыттар “Удьуор утум” түмсүүлэрин салайар Мария Петрова – Лөгөй Кыыһа маннык кинигэ туох санааттан саҕыллан баар буолбутун билиһиннэрэн, онуоха күүс-көмө, өйөбүл буолбут дьоҥҥо барыларыгар уонна ордук чорботон улуус салалтатыгар (баһылык Алексей Федотов), Олоҥхо улуустааҕы ассоциациятыгар (бэрэсс. Михаил Борисов), “Мындыр” түмсүүгэ (сал. Иннокентий Аммосов) махтал тылларын эттэ. Оттон улуус баһылыга Алексей Федотов, улуус култуураҕа управлениетын начаалынньыга Иннокентий Аммосов норуот үгэстэрин, сиэри-туому билиһиннэрэр, талааннаах дьоммутун, кинилэр үлэлэрин үйэтитэр кинигэ кэнчээри ыччакка анаммыт дьоһун бэлэх буолбутун, кэм-кэрдии ааһан истэҕин ахсын суолтата өссө дириҥээн иһиэҕин бэлиэтээтилэр.

Салгыы кинигэ тутулунан, ол курдук улууспут сиригэр-уотугар төрөөн-үөскээн, үлэлээн-хамсаан ааспыт норуот маастардарын ыччаттарын ааттарыттан Аким Бурцев кыыһа Саргылана Бурцева, тимир уустарын ааттарыттан Роман Готовцев – Мындыр уус, Илларион Попов, мас уустарын ааттарыттан Евгений Пестряков, иистэнньэҥнэртэн Мария Атласова – Иис Маарыйа, Ольга Колодезникова – Айыллаана Иис, Харитина Гоголева, туосчуттартан Варвара Васильева кинигэ туһунан санааларын эттилэр, ааптарга, матырыйаалы хомуйууга көмөлөспүт “Олоҥхо дьиэтэ” этно-култуурунай киин норуот айымньытын сүрүннүүр исписэлииһэ Матрена Герасимоваҕа, өйөбүл буолбут дьоҥҥо барыларыгар махталларын тиэртилэр.

✅ t.iss.one/murusahargata @ulusmedia

#кэрээйгэтэ

💠 “Кэнчээри” ансаамбыл 51-с отчуоттуур кэнсиэрэ

Соторутааҕыта Арассыыйа үтүөлээх, образцовай “Кэнчээри” норуодунай ансаамбыл 51-с сылын отчуоттуур кэнсиэрин көрдөрдө.

Кэнсиэргэ кыра, орто, улахан оҕолор хордара, кыра, орто, улахан бөлөх үҥкүүһүттэрэ, орто, улахан ВИА бөлөхтөрө, кыра, орто, улахан саастаах солистара эксээмэннэргэ бэлэм, араас тэрээһиннэр быыстарыгар быыс булан эрчиллэн кытыннылар.

Ону таһынан “Сайыны көрсө” диэн өрөспүүбүлүкэтээҕи куонкуруска “Сайын” диэн норуот ырыатын В. Птицын хорга анаан оҥорбут ырыатын толорон 1 ст. лауреат буоллубут.

Быйыл "Азия оҕолорун" кыһыҥҥы иккис оонньууларыгар Кузбасстан ыҥырыы тутан 10 буолан ыллаан хайҕанан кэлбиппит.

Аны 50 сылбытын сыл буо­лан баран да буоллар, Опе­ра, балет тыйаатырыгар выпускниктарбытын кытта нацио­наль­най оркестр тыыннаах доҕуһуолунан хаһан да буолбатах улахан кэнсиэри тэрийэн үрдүк сыанабылы ылан кэлбиппит.

✍️ Василий Парников

Сиһилии саайтка ааҕыҥ
⏬️⏬️⏬️
https://мюрюгазета.рф/article/100077

✅ t.iss.one/murusahargata @ulusmedia

#кэрээйгэтэ

💠 Талба талааннаах иистэнньэҥ Ульяна Ушницкая

Биһиги улууспутугар уран тарбахтаахтар, талба талааннаахтар, иис дьикти абылаҥар ылларбыт кэрэ аҥаардар элбэхтэр. Олортон биирдэстэрэ Мындааба бөһүөлэгин олохтооҕо Ульяна Ушницкая буолар. Кини Мындааба бөһүөлэгин «Күнчээнэ» уһуйаанын иитээччитэ.

Ульяна Анатольевна дэгиттэр талааннаах. Ылсыбыт үлэтин тиһэҕэр тиэрдэр, сонунтан сонун, кэрэттэн кэрэ, киһи сөҕүөх олус сиэдэрэй, кыраһыабай оҥоһуктары оҥорор.

Ульяна Анатольевна оҕо сааһын ахтан кэпсиир: «Мин кыра эрдэхпиттэн ийэм иистэнэр этэ. Ол иһин ийэбин көрөн наһаа ымсыырарым. Онон маҥнайгы көстүүммүн, сэлиэччиктээх ыстааммын оскуолабын бүтэрбит сылбар ийэм быһан биэрбитинэн тиктибитим. Тигэн баран олус да астыммытым. Кэлин оҕолонон баран, ити 1997 сылларга, хамнас, харчы диэн кэлбэт, суох кэмэ этэ.

⏬⏬⏬
Салгыыта комментарийга

✍️ Сайыына Черкашина, ХИФУ литэрэтиирэҕэ салаатын 3 кууруһун устудьуона

✅ t.iss.one/murusahargata @ulusmedia

#кэрээйгэтэ

💠 Полина Сыроватская – коллекция абылаҥар

– Биһиги аттыбытыгар араас дьарыктаах дьон элбэхтэр. Кэпсиэхпин баҕарабын Полина Ивановна Сыроватскаяны. Кини дьарыга бэйэтэ эмиэ туспа эйгэ. Кэрэни кэрэхсиир, оҕо эрдэҕиттэн сөбүлээн, умсугуйан туран аккырыыкка уонна кэмпиэт суутун мунньар эбит. Полина Ивановна улуус «Умсулҕан» коллекционердарын түмсүүтүн чилиэнэ. Мунньар эйгэтэ араас хайысхалаах.

Ордук «Арассыыйа почтата» тиэмэтигэр: массыыналары, самолёттары, вертолеттары, поездтары, араас бланкалары мунньар.

– Хаһааҥҥыттан бу тиэмэнэн мунньан саҕалаабыккыный?

– Почтаҕа үлэлии сылдьан 2019 сылтан саҕалаабытым. Бастаан тимир массыыналары, онтон куукулалары, брелоктары, сакылааттары кытта мунньан барбытым.

⏬⏬⏬
Салгыыта комментарийга

✍️ Сайыына Черкашина, ХИФУ литэрэтиирэҕэ салаатын 3 кууруһун устудьуона

✅ t.iss.one/murusahargata @ulusmedia

#кэрээйгэтэ

⏺ Кулантай мусуойа быыстапкаҕа ыҥырар

Балаҕан ыйын 14-с күнүттэн көмүс дуйунан сууламмыт хатыҥ чараҥ суугунун быыһыгар турар Кулантай аатынан литературнай мусуой төрүттэммитэ 30 сылыгар анаммыт, ааcпыт кэмнэри санатар хаартысканан быыстапканы кэлэн көрөргүтүгэр ыҥырар. Быыстапка литератураны таптааччыларга, мусуой үлэтин сэҥээрээччилэргэ бэрт интэриэһинэй буолуоҕа.

Мария Аргунова

☑️ https://мюрюгазета.рф/kulantaj-musuoja-byystapka5a-ynyrar/

✅ t.iss.one/murusahargata @ulusmedia

#кэрээйгэтэ

😍 Улууспут айылҕата "чэгиэннэр" харахтарынан өссө кэрэтийэр, киэркэйэр

Кустук өҥүнэн симэммит былыттар, хаарынан сууламмыт отон, күнү кытта тэҥҥэ утуйар ньээм от, сири-дойдуну араҥаччылыыр кынат-былыттар, маска кытта ыттыбыт отоннор, о.д.а. киһи хараҕын сымнатар, сөхтөрөр улууспут кэрэ айылҕатын дьүһүйүүлэрэ Бороҕоҥҥо В.В. Никифоров аатынан "Тойон Мүрү" култуура дыбарыаһын дьоҕус саалатыгар быыстапка буолан кэккэлии турбуттарын сэргии-сэҥээрэ 👍👏көрдүбүт.

Бу, эмтээх оту хомуйар, үөрэтэр соруктаах 2022 сыллаахха, "Тойон Мүрү" култуура дьиэтин иһинэн, тэриллибит "Чэгиэн" түмсүү кыттыылаахтарын төрөөбүт улууспут айылҕатын кэрэ көстүүтүн, айылҕабыт чочуйан оҥорор умнуллубат түгэннэрин хаартыскаҕа түһэрэн үйэтитэр үтүө дьарыктарын түмүгэ.

✍Ольга Шепелева

🏃 Сиһилии манна аах👈

✅ @uamurusahargata @ulusmedia