#улууска

⏺ Үрэхтэр уулара таһымнаата

Быйыл өтөрүнэн билбэтэх-көрбөтөх, олус халыҥ хаардаах кыһын “бэлиэтин” хаалларан барда. Күһүҥҥү уһун ардахтартан нүөл тоҥмут үрэхтэр хаар уутуттан эбиллэннэр, хааларыттан тахсаннар элбэх хоромньуну таһаарар буоллулар.

Улуустааҕы ыксаллаах быһыы-майгы хамыыһыйатын сэкирэтээрэ Николай Лугинов иһитиннэрбитинэн, ыам ыйын 10 күнүнээҕи туругунан Бороҕон, Танда икки ардынааҕы суол икки сиринэн быстыбыт. Оттон Танда үрэх сүнньүгэр олорор Байаҕантай, II Байаҕантай, Бээрийэ, Түүлээх нэһилиэктэрин сүрүн айанныыр суоллара үрэх уута таһымнааһыныттан хастыы да сиринэн быстыбыттар.

Курбуһах үрэхтэрэ эмиэ уунан туолан эрэллэр. Ол түмүгэр Бороҕон – Уус Күөлэ хайысханан айан суолун икки сиринэн уу алдьаппыт. Итини таһынан Найахы уонна Өспөх икки ардынааҕы суолу эмиэ хас да сиринэн уу хайа сүүрбүт. Уу бөһүөлэктэргэ киирдэ эрээри, кэмигэр сөптөөх дьаһаллар ылылланнар, биир да социальнай эбийиэк, олорор дьиэ ууга былдьаммата.

Өрүстэргэ балаһыанньа этэҥҥэ. Өлүөнэ өрүс мууһун алдьаныыта Саха сирин кыраныыссатыгар кэлиэ билигин да 100-чэкэ км баар. Оттон дохсун сүүрүктээх Алдан өрүс хамсаан аллараа кирбиитэ Уус Маайа улууһугар сылдьар. Маны тэҥэ ыам ыйын 9 күнүгэр Томпо улууһун киинэ Хаандыга бөһүөлэгин аннынан эмиэ муус хамсааһына бэлиэтэммит. Онон халааны утары үлэлэһэр түбүктээх күннэр үүннүлэр.

✍️ Афанасий Сектяев

✅ t.iss.one/murusahargata @ulusmedia

#санааситимэ

💢Кусчут, байанайыҥ төһөнү тосхойдо?

Артур Сокорутов, Лөгөй нэһилиэгин олохтооҕо:

– Кэтэһиилээх күннэрбит дьэ кэлэннэр, сиргэ бараары олох бэлэм олоробун. Мончуук куһум суох буолан, уопсай көҥүлү кэтэстим. Биирдии­лээн да буоллар, мончуук кус­таахтар бултуйбуттарын истэ-истэбин ымсыыран аҕай биэрдим. Дьэ, онон байанайбыттан көрдөһөн баран, хомунан барабын. Уу дэлэй, онон кус да баара буолуо, Ньукуолуҥҥа амсайар гына бэриһиннэрэр инибин.

Иннокентий Борисов, Уһун Күөл бөһүөлэгин олохтооҕо:

– Быйыл куһу көрө илик­пин, дьон кэпсииринэн син баар курдук эбит. Илин Чабычах диэн алааска үүтээннээхпит, онно сааскы, кү­һүҥҥү сезоҥҥа сыл аайы кус­туубут. Былырыын 20-тэн тахса кус­таах этим.

Саргылана Афанасьева,
Уһун Күөл орто оскуолатын учуутала:

– Мин кыра эрдэхпиттэн кус­туубун, аҕам урут кустуу барарыгар суоска эмэ сылдьар оҕолору илдьэ барар этэ, арааһа, ийэбин сынньатаары буолуо. Икки оҕону илдьэ барааччы. Күһүн кус кэтииригэр олбох оҥорон олордооччу.

Салгыы комментарийдарга⏬⏬⏬

✍️ Афанасий Копырин,
Светлана Сивцева,
Мария Аргунова

✅ t.iss.one/murusahargata @ulusmedia

#нэһилиэктэргэ

💢 Тумулга ытык дьоммутун ахтан-санаан үйэтиттибит

Тумулга А.Р. Халдеева аатынан модельнай олохтоох бибилэтиэкэҕэ Кыайыы күнүгэр сэрии, тыыл бэтэрээннэрин оҕолоро ахтыы тэрээһинигэр кыттыыны ыллылар.

Cэрии бэтэрээнэ, Европаны босхолоспут Петр Аржаков кыыһа Галина Аржакова аҕатын туһунан истиҥник-иһирэхтик ахтан кэпсээтэ. Петр 18 сааһын туола илигинэ сэриигэ ыҥырыллан барбыт, күүстээх санаатынан, чиэһинэй көнө майгытынан хорсуннук сэриилэһэн, элбэх мэтээллээх дойдутугар эргиллэн, сөбүлүүр идэтинэн кылаабынай бухгалтерынан үйэ чиэппэрин устата үтүө суобастаахтык үлэлээбитэ. Элбэх оҕолонон, сиэннэнэн дьоһун олоҕу олорбута. Сэрии сылларыгар “Көрдүгэннээх”, “Ворошилов”, ”Кылаайы”, ”Кыһыл Союз” холкуостарга бэрэссэдээтэлинэн үлэлээбит.

Сут кураан, аас-туор олоххо хоргуйууну, өлүүнү таһаарбатах, дьаһаллаах салайааччы Петр Васильев, тыыл, үлэ бэтэрээнэ Митрофан Васильев тустарынан сиэнэ, кыыһа Татьяна Неустроева-Васильева сырдатан кэпсээтэ. Аҕатын бииргэ төрөөбүт убайдара Кирилл – Украинаҕа, Гаврил – Смоленскайга, Бүөтүр– Старай Руссаҕа, Михаил Берлин таһыгар охтубуттар. Кинилэр Кыайыы туһугар олохторун толук биэрбит, хорсун быһыыларын, үйэтитэн планшет оҥотторон, үүнэр кэнчээри ыччакка сылын аайы билиһиннэрэр, сырдатар.

Тыыл бэтэрээннэрэ Татьяна, Иннокентий Васильевтар тустарынан кыыстара Ирина Черкашина сырдатта. Ийэтэ сэрии кэмигэр үлэ фронугар сылдьыбыт, аҕата уус талааннаах буолан, Бээрийэ урукку дьиэлэрин, тутууларын тутуспут киһи буолар.

Сэрии бэтэрээнэ Петр Васильев туһунан быыстапканы кыыһа Надежда Павлова-Васильева сырдатта.

✍️ Светлана Прудецкая, бибилэтиэкэр, уопсас. кэрэсп. С

Салгыы комментарийдарга⬇️⬇️⬇️

✅ t.iss.one/murusahargata @ulusmedia