#бэлиэтүгэн

💢 Педагогическай дьиэ кэргэн Рожиннар үбүлүөйдээх тэрээһини ыыттылар

Мүрү 1 №-дээх орто оскуолата Рожиннар педагогическай дьиэ кэргэни иитэн-үөрэтэн таһаарбыта. Ол туоһутунан үбүлүөйдээх тэрээһин үөрүүлээх чааһыгар дьиэ кэргэн бары кытыннылар, итиэннэ иилээн-саҕалаан ыыттылар.

СӨ үөрэҕириитин туйгуна, физическэй култуураҕа уонна успуорка туйгуна, Мүрү нэһилиэгин бочуоттаах олохтооҕо Валерий Николаевич Рожин оҕолорунаан история учуутала идэлээх, билигин улуус дьаһалтатын дьыалаларын салайааччы Валерийдыын, Дьокуускай куорат 19 №-дээх оскуолатын историяҕа учуутала Дьулустуун уонна ХИФУ математика уонна информатика институтун бэһис кууруһун устудьуона Уйгулааналыын сценаҕа тахсан долгутуулаах түгэни ыыппыттара көрөөччү биһирэбилин ылла.

Оттон ийэлэрэ учууталлар Учууталлара, СӨ үөрэҕириитин туйгуна, Мүрү 1 нүөмэрдээх оскуола нуучча тылыгар уонна литературатыгар учуутала Елена Трофимовна сценаттан түспэккэ, "Далбар" ансаамбыл кыттыылааҕын быһыытынан, ылбаҕай ырыанан эҕэрдэлээтэ.

Маны таһынан улахан кыыстара Туйаара – Бороҕоҥҥо "Мүрүчээнэ" оҕо тэрилтэтин иитээччитэ, кийииттэрэ Светлана Рожина – бу уһуйаан сэбиэдиссэйин эбээһинэһин толорооччу.

Онон Рожиннар дьиэ кэргэн кэнчээри ыччаты уһуйууга холбоон 149 сыл ыстаастаах дьиҥ-чахчы педагогическай дьиэ кэргэн буолаллар.

✍️📸 Ольга Шепелева

✅ t.iss.one/murusahargata
@ulusmedia

#бэлиэтүгэн

💢 Үбүлүөйдээх оскуолаҕа бырааһынньыктааҕы тэрээһиннэр иккис күннэригэр араас сыллардааҕы выпускниктар үөрэнээччилэри кытта истиҥ көрсүһүүлэргэ кытыннылар.

Ол курдук 1976, 2018 сыллааҕы выпусктар 4 "в" кылааска (кыл. сал. Екатерина Парникова) ыалдьыттаатылар. Үөрэнээччилэр хоһоонунан, Бартыһаан Дьөгүөрэп туһунан ырыанан көрсүбүттэрин аҕа саастаах дьон сэргээн дохсун ытыс тыаһын бэлэхтээтилэр.

Ыалдьыттар да бэрт сэргэх дьон буолан биэрдилэр. Ол курдук "Хотугу сулус" сурунаал эрэдээктэрэ СӨ култууратын үтүөлээх үлэһитэ, Духуобунас академиятын чилиэнэ Владислав Доллонов маҥнайгы кылаастан бииргэ үөрэммит кыыһынаан – медицинэ билимин доктора, Россия үтүөлээх бырааһа, РФ үтүөлээх үлэһитэ, рентгенолог быраас Лариса Шепелевалыын ыал буолбуттарын, бүгүн сиэттиспитинэн тапталлаах оскуолаларын үбүлүөйүгэр кэлэн туралларын билиһиннэрдэ. Оттон Чараҥтан төрүттээх, Амма Сатаҕайыгар олорор, спортинструктарынан үлэлиир Гаврил Орлов сирэйдиин-харахтын уларыйан олоҥхоттон сорук-боллур уол ырыатын бэрт сэргэхтик туттан толорбутун оҕолор соһуйа, кэрэхсии иһиттилэр.

Выпускниктар "Аан дойду ыччатын сүрэҕэ" диэн ырыаны күргүөмүнэн ыллаан бэлэх ууннулар. Маннык истиҥ-иһирэх, сонун көрсүһүүттэн бары да үөрэн-долгуйан тарҕастылар.

✍️ Мария Аргунова

✅ t.iss.one/murusahargata @ulusmedia

#бэлиэтүгэн

💢 Ол ааспыт оҕо сааһы санаһа

Араас көлүөнэ выпускниктар ирэ-хоро кэпсэтэн, бэйэ-бэйэни эҕэрдэлэһэн, тапталлаах оскуолаларын үбүлүөйүн олус сэргэхтик көрүстүлэр.

Кылаас чааһыгар 2 "б" кылаас үөрэнээччилэрэ, кылаас салайааччыта Наталья Портнягина кэлбит 1967, 2003 сыллаах выпускниктары көрсөн "Умники и умницы" оонньууга тургутустулар, үөрэнээччилэр эҕэрдэ хоһоонноро, ырыалара ол ааспыт кэми, тус бэйэ мэник-тэник оҕо сааһын, оттон учууталларга үөрэппит оҕолорун чуор куолаһын, билиигэ-көрүүгэ тардыһыылаах үөрэнээччилэрин санатта.

Оҕолор бэйэ оҥорбут аккырыыккаларын бэлэх уунан, бу күнү үйэ-саас өйдөбүлүнэн оҥордулар.

✍️📸 Ольга Шепелева

✅ t.iss.one/murusahargata @ulusmedia

#бэлиэтүгэн

💢 Мүрү 1-гы нүөмэрдээх оскуолатын кэлэктиибэ "Сүрэх тэбэрин тухары" испэктээги туруорда

Үбүлүөйдээх оскуола кэлэктиибэ, үөрэнээччилэрэ Софрон Данилов "Сүрэх тэбэрин тухары" романыттан быһа тардыылары оонньоон көрдөрдүлэр. Туруорааччы художник Анна Анисимова, режиссер Саргылана Федорова, режиссер көмөлөһөөччүтэ Матрена Местникова үлэлэрин түмүгүн толору саала көрөөччүлэр дохсун ытыс тыаһынан сыаналаатылар.

✍️ Мария Аргунова

✅ t.iss.one/murusahargata @ulusmedia

#бэлиэтүгэн

💢 Дүпсүҥҥэ космонавт ыалдьыттаата

Дүпсүҥҥэ бэҕэһээ эмиэ биир умнуллубат ураты түгэн буолла. Россия Геройдара, космонавт летчиктар Роман Романенко уонна Олег Кононенко 2011, 2016, 2019 сылларга кэлэн барбыт буоллахтарына, бу сырыыга үһүс сэбиэскэй космонавы Россия Геройа Сергей Авдеевы көрөр дьоллоннубут.

Кэргэнинээн Мария Аврариевналыын Саха сиригэр улахан тэрээһиҥҥэ кэлэ сылдьан, бириэмэ аттаран, Космонавтика уонна авиация музейын кэлэн көрөн бардылар. Бу тэрээһини Тулуна оскуолатын дириэктэрэ Федот Бысыин уонна бэйэбит уолбут – «Юные якутяне» РРЦ дириэктэрин солбуйааччы Данил Жирков тэрийдилэр.

Көрсүһүүнү "Дүөндү" сынньалаҥ киинин үлэһиттэрэ, «Далбар» ансаамбыл (сал. Е.П. Алексеева) алаадьылаах кымыһынан күндүлээтилэр, У.И. Босикова алгыһынан арчылаата. Дүпсүннээҕи кыраайы үөрэтэр музейга А.С. Федоров, "Дүөндү" сынньалаҥ киинин салайааччыта А.А. Стручкова экскурсияны тэрийдилэр.

Оттон экскурсовод оҕолор Айыллаана Шестакова, Михаил Егоров, Саша Ноговицына, Саша Нестерова Космонавтика уонна авиация музейын устун сэргэх экскурсияны ыыттылар. Музей попечителэ, бастакы кружковец, авиация бэтэрээнэ Николай Копырин куруһуокка сылдьан оҥорбут моделларын, хайдах дьарыктаммыттарын уонна билигин да музейыгар дууһатынан ыалдьарын туһунан кэпсээнин истэн астынныбыт, махтанныбыт.

Ыалдьыттарга дьиэлээх хаһаайын Г.Г. Кудрин технопаарка үлэтин билиһиннэрдэ, кабинеттары көрдөрдө. Улууска, республикаҕа биллэр мелодист, коллекционер Станислав Луковцев авиацияҕа сыһыаннаах коллекциятын туруорда.

✍️ Ольга Протопопова

☑️ Салгыыта комментарийдарга

✅ t.iss.one/murusahargata
@ulusmedia

#бэлиэтүгэн

💢 Сыырдаах ыччата үүнэр-сайдар кэскилэ – саҥа оскуола үлэҕэ киирдэ

И.С. Портнягин аатынан Сыырдаах орто оскуолатын 120 оҕо үөрэнэр миэстэлээх таас дьиэтин "СТК" ХЭТ (директор Анатолий Заболоцкай) тэрилтэ тутан киллэрдэ.

"Тыа сирин кэлимник сайыннарыы" федеральнай программа чэрчитинэн тутуллубут оскуолаҕа билигин 119 оҕо үөрэнэр. Дириэктэринэн Диана Неустроева таһаарыылаахтык үлэлиир.

Туруу үлэһиттэр, чулуу спортсменнар, уран уустар уутуйан үөскээбит түөлбэлэригэр кэнчээри ыччат салгыы үүнэр-сайдар кэскилэ түстэнэн, саҥа саҕахтар арыллан, үрдүк үктэллэр дабайыллан иһэллэрэ саарбахтаммат.

✍️ Ольга Шепелева

✅ t.iss.one/murusahargata @ulusmedia

#бэлиэтүгэн

💢😍👍👏Мүрүгэ үөрэхпит кыһата үөрүүлээхтик арылынна
(фоторепортаж)

📸 Ольга Шепелева

✅ t.iss.one/murusahargata @ulusmedia

#бэлиэтүгэн

💢Алта оскуолаҕа анал автобус күлүүһэ туттарылынна👏👍😍

Бүгүн Бороҕоҥҥо үөрүүлээх, бэлиэ түгэн тосхойдо. Оскуола үлэтигэр-хамнаһыгар, үөрэнээччилэр ситиһиилэригэр төһүү күүһүнэн буолар “Оскуола автобустара” федеральнай бырагырааманан анал автобустар В.А. Протордьяконов аатынан Майаҕас, Н.Н. Тарскай аатынан Баатаҕай, Өспөх орто оскуолаларыгар “Газель” массыыналар, Суотту орто оскуолатыгар “ПАЗ” автобус күлүүстэрэ туттарылынна. Оттон улууспут дьаһалтатын үбүлээһининэн “УАЗ” микроавтобустарынан Хомустаах сүрүн уонна Орто Эбэ анал коррекционнай оскуолалара хааччылыннылар.

✍️📹 Ольга Шепелева

✅ t.iss.one/murusahargata @ulusmedia

#бэлиэтүгэн

💢 Улууска олохтоох бэйэни салайыныы киирбитэ 20 сылын бэлиэтээтилэр

Дойду президенэ Владимир Путин 2012 сыл бэс ыйын 12 күнүнээҕи ыйааҕынан сыл ахсын муус устар 21 күнэ Арассыыйаҕа Бэйэни салайыныы күнүнэн бэлиэтэнэр. Бүгүн «Өркөн» киинигэр Арассыыйаҕа олохтоох бэйэни салайыныы күнүн уонна өрөспүүбүлүкэҕэ олохтоох бэйэни салайыныы киирбитэ 20 сылын үөрүүлээх быһыыга-майгыга бэлиэтээтилэр.

Уус Алдан улууһа Лөгөй тойон саҕаттан өрөспүүбүлүкэҕэ биллэр-көстөр салайааччылардааҕынан биллэр. Кинилэр үрдүк ааттарын ааттаан туран күн бүгүн улууспутугар салайар үлэҕэ сыралаһа сылдьар улууспут дьаһалтатын баһылыга Алексей Федотов, Ил Түмэн депутата Геннадий Васильев, депутаттар сэбиэттэрин салайааччыта Иван Колодезников, 2003-2012 сс. Хоро нэһилиэгин баһылыгынан үлэлэбит, муниципальнай сулууспа бэтэрээнэ Василий Бурцев, улуус бастакы ыҥырыылаах мунньаҕын депутата Алексей Заровняев, эдэр көлүөнэ салайааччыларын аатыттан Чэриктэй нэһилиэгин баһылыга Федор Карманов эҕэрдэ тылы эттилэр.

Алексей Федотов байыаннай дьайыы кыттыылаахтарыгар уонна кинилэр дьиэ кэргэннэригэр көмөҕө тус кылаатын иһин Ил Дархан Айсен Николаев махтал суругун уонна олохтоох бэйэни салайыныыга өр кэмнээх үлэтин үрдүктүк сыаналаан туран Иван Колодезниковка ытык чороону дохсун ытыс тыаһыгар бэлэх туттарда. Эмиэ байыаннай дьайыы кыттыылаахтарыгар, дьиэ кэргэттэригэр көмөҕө кылаатын иһин СӨ Бырабыытылыстыбатын махтал суругунан улуус дьаһалтатын успуорка, дьиэ кэргэн уонна ыччат дьыалаларыгар салаатын сүрүннүүр исписэлииһэ Наталья Охлопкова, өрөспүүбүлүкэ сайдыытыгар сүрүн кылаатын иһин «100-летие Якутской АССР» үбүлүөйдээх бэлиэнэн улуус дьаһалтатын социальнай үлэҕэ исписэлииһэ Елена Константинова, о.д.а наҕараадаланнылар.

✍️ Мария Аргунова

☑️ Сиһилии: https://мюрюгазета.рф/article/95622

✅ t.iss.one/murusahargata @ulusmedia

#бэлиэтүгэн

⏺ "Сомоҕолоһуу. Дьулуур. Өрөгөй" киинэ сүрэхтэннэ

Бүгүн улууспутугар эмиэ биир бэлиэ түгэн буолла. 2022 сылга Уус Алдаҥҥа ыытыллыбыт Саха Өрөспүүбүлүкэтин норуоттарын VIII спортивнай оонньууларын туһунан улуус дьаһалтатын көҕүлээһининэн оҥоһуллубут "Сомоҕолоһуу. Дьулуур. Өрөгөй" документальнай киинэ сүрэхтэннэ.

Киинэ режиссера Екатерина Бочкарева Оонньуулар түгэннэрин хаартыскаҕа, видеоҕа тиспит көрдөрөр-иһитиннэрэр эйгэ үлэһиттэригэр уонна киинэ монтаһын оҥорбут Иван Окоемовка, Нарыйа Бочкареваҕа, киинэ тиэкиһин суруйбут Ольга Шепелеваҕа махтанна итиэннэ киинэҕэ Оонньуулар тэрээһиннэригэр улууспут дьоно-сэргэтэ биир киһи курдук, биир сомоҕо буолбуттарын киэн тутта тиэрдэргэ кыһаллыбыттарын туһунан эттэ.

Чахчы да киинэ Аммаҕа буолбут VII спортивнай оонньууларга улууспут баһылыга Алексей Федотов VIII Оонньуулар биһиги улууспутугар буолалларын туоһулуур Оонньуу былааҕын туппутуттан саҕалаан улууспут дьоно хайдахтаах курдук түмсэн, бэлэмнэнэн барбыттарын, төһөлөөх түөн саҕа кыра боппуруостартан саҕалаан баараҕай тутууларга тиийэ улууспут киинэ уларыйан, киэркэйэн тахсыбыта, Оонньуулар буолар кэмнэригэр араас эйгэ үлэһиттэрэ анал эбээһинэстэрин эппиэтинэстээхтик толорбуттарын, Оонньуулар саҕаланар күннэрин эрэ иннинэ күүстээх буурҕа түһэн ытык курдук ытыйан ааспытын, ону чөлүгэр түһэрэ охсон Саха Өрөспүүбүлүкэтин норуоттарын VIII спортивнай оонньуулара арыллар тэрээһиннэрэ үрдүктэн үрдүк таһымҥа ааспытын, күрэхтэһиилэр күүрээннээх түгэннэрэ, улууспут дьоно дьулуһан туран кыайыыны ситиспиттэрэ бу балтараа чаастаах киинэҕэ бүүс-бүтүнүү түмүллэн көһүннэ. Киинэни мустубут дьон уйадыйа, долгуйа, үөрэ дохсун ытыс тыаһынан сыаналаатылар.

✍️ Мария Аргунова

☑️ https://мюрюгазета.рф/article/98043

✅ t.iss.one/murusahargata @ulusmedia

#бэлиэтүгэн

💠 Байаҕантай нэһилиэгэр архитектура пааматынньыгын сөргүтүү саҕаланна

Бу күннэргэ Байаҕантай нэһилиэгин Балаҕаннаах алааһыгар 1848-1852 сс. Байаҕантай улууһун баһылыга Савва Егоров олорбут дьиэтин сөргүтүүгэ үлэ саҕаланна. Бу үлэ өрөспүүбүлүкэ баһылыга Айсен Николаев көҕүлээбит “Пааматынньыктары харыстыахха” (“Сохраним памятники”) бырайыагын чэрчтитинэн оҥоһуллар.

Былыргы дьиэ туруга сэнэх, ис бараанын улахан өттө баар. Дьиэ таһыгар туос ураһа биир тирэҕэ бу күҥҥэ диэри туран хаалбыта сэдэх көстүү буолар.

Сөргүтүүнү “Уран” дизайн-устуудьуйа” ХЭТ ыытар. Миэстэтигэр Владимир Чахов маастардаах биригээдэ үлэлиир. Сөргүтүү үлэтин быйыл бэс ыйын бүтүүтэ ситэрэр соруктаахтар.

Бу улахан суолталаах үлэни ыытарга үп былырыын муус устар 18 күнүгэр ыытыллыбыт телемарафон көмөтүнэн хомуллубута, уопсайа 1,1 мөл. солк. киирбитэ.

Санатар буоллахха, бырайыак координатора – СӨ Бырабыыталыстыбатын бэрэссэдээтэлин солбуйааччы Сергей Местников, телемарафону култуурунай нэһилиэстибэ эбийиэктэрин хараанныыр департамент, устуоруйа пааматынньыктарын уонна култуураны хараанныыр Бүтүн Арассыыйатааҕы уопсастыба Саха сиринээҕи салаата уонна Уус Алдан улууһун дьаһалтата, “Саха” НКИХ тэрийбиттэрэ.

СӨ Баһылыгын уонна Бырабыыталыстыбатын пресс-сулууспатын матырыйаалынан

☑️ https://мюрюгазета.рф/article/98198

✅ t.iss.one/murusahargata @ulusmedia