#уһуйааннарга

💢 Бээрийэ уһуйаанын иитиллээччилэрэ ситиһиилэринэн үөрдэллэр

Бээрийэ нэһилиэгин "Үрүччэ" уһуйааныттан икки күннээх XII-с өрөспүүбүлүкэтээҕи фольклор фестивалыгар кыттан, олус астынан, ситиһиилэнэн кэллибит. Икки иитээччи, 6 оҕо уонна 10 төрөппүт кытынныбыт.

Биирдиилээн чабырҕахсыттарга Оля Турантаева "Мэник оҕо" чабырҕаҕы ааҕан I таһымнаах лауреат буолла (салайааччы Екатерина Васильева). Бөлөҕүнэн чабырҕах ааҕыытыгар Дайаана Васильева, Мичийээнэ Иннокентьева, Эрэл Васильев, Степа Кривошапкин, Жанна Турантаева (салайааччы Прасковья Васильева) "Кэрэхсэбиллээх ааҕааччылар" анал ааты ыллылар.

Оттон Екатерина Васильева салайааччылаах "Саадьаҕай оҕус" норуот ырыатын толорбут Дайаана Васильева, Мичийээнэ Иннокентьева, Эрэл Васильев, Степа Кривошапкин, Жанна Турантаева, Оля Турантаева II таһымнаах лауреат аатын ситиһэн үөрүүбүтүн үксэттилэр.

✍️ Екатерина Васильева, “Үрүччэ” уһуйаан иитээччитэ

✅ @murusahargata

#уһуйааннарга

💢 Новатор иитээччи Лидия Петрова туһалаах семинары ыытта

Бүгүн Педагог уонна аҕа сүбэһит сылын чэрчитинэн "Мүрүчээнэ" оҕо тэрилтэтигэр новатор иитээччибит Лидия Петрова оҕо өйүгэр түргэнник суоттуур, 10-20 чыыһыла иһинэн эбэр-көҕүрэтэр сатабылын сайыннарар сыаллаах "Нивал" математическай-интеллектуальнай оонньууну билиһиннэриигэ иитээччилэргэ үөрэтэр семинары ыытта.

Калькуляторга үөрэммит оҕо өйүгэр суоттуур үөрүйэҕэ бытаарар, бэл төгүл табылыыссатын умнар диэн ахсаан учууталлара этэллэр.
Оттон Лидия Александровна "Нивал" өйү сытыырхатар, болҕомто, долоҕой, тулуур, сиэр-майгы курдук хаачыстыбалары эрчийэн сайыннарар диэн санаанан салайтаран бу оонньууну олоххо киллэрбитэ ыраатта.

Былырыын бэйэбит испитинэн иитээччилэри үөрэтэн, быйыл оҕолорго турнир буолбута. Үлэ үтүө түмүктээҕиттэн астынныбыт. Оҕолорбут 20 иһинэн өйдөрүгэр лабырҕаччы суоттууллар.

Лидия Александровна оскуолаҕа атаарар оҕолоро бу оонньуу көмөтүнэн 100 иһинэн суоттуур, ону таһынан грамотаҕа кытта туһанан, сүһүөхтэри холбуур буолан киирэллэр. Уопуттаах иитээччи бэйэтин күннээҕи олоххо туттар ньымалара чахчы туһалаахтарын итэҕэйэн бу семинарын ыытта. Аны муус устарга улууска оҕолорго турниры былаанныыр. Куруутун кырачааннары сайыннарыыга саҥа ньымалары булан олоххо киллэрэринэн барыбытыгар холобур буолар коллегабытынан Лидия Александровнанан киэн туттабыт, киниэхэ махтанабыт.

✍️ Анна Алексеева, "Мүрүчээнэ" оҕо тэрилтэтин бас иитээччитэ

✅ https://t.iss.one/murusahargata/12617?single

#уһуйааннарга

💢 Оҕо саастан үлэни таптыырга иитэбит-үөрэтэбит

Оҕону үлэ үөрүйэхтэригэр сыһыарыы, уһуйуу, үлэҕэ тапталы иҥэрии олох кыра сааһыттан саҕаланнаҕына, оҕо бэйэтин бэйэтэ көрүнэр, үлэни таптыыр, дьон үлэтин сыаналыыр буола улаатара биллэр.

Маннык сыаллаах-соруктаах "Мүрүчээнэ" уһуйаан эрдэтээҥҥи " Ымыычаан" бөлөҕөр "Үлэлии үөрэниэм элбэҕи ситиһиэм" диэн уһун болдьохтоох бырайыак ылынан үлэлии сылдьабыт. Оҕону үлэҕэ иитии дьиэ кэргэнтэн, төрөппүттэрин, чугас дьоннорун холобурдарыттан саҕаланар. Бырайыакпыт чэрчитинэн "Ийэ кырачаан көмөлөһөөччүтэ" диэн бөлөхпүт иһинэн видеоролик күрэһин ыыттыбыт.

Төрөппүттэр олус көхтөөхтүк кыттаннар, кырачаан иитиллээччилэрбит араас анал ааттарга тигистилэр. "Кырачаан Тортофея" анал ааты Аделина Морозова, "Кырачаан кондитер" анал ааты Ева Колодезникова, "Кырачаан асчыт" анал ааты Дархан Местников, "Кырачаан көмөлөһөөччү" анал ааты Ая Петухова уонна " Минньигэс коктейль" анал ааты Юлиан Румянцев ыллылар. Бырайыакпытын төрөппүттэрбит биир санаанан өйөөбүттэригэр махтанабыт. Бу күннэргэ "Аҕам үтүө холобурунан" диэн оҕо аҕатын кытта үлэлэрин, дьарыктарын түгэннэриттэн хаартыска быыстапкатын ыытар былааннаахпыт.

Бу бырайыакпыт Өрөспүүбүлүкэҕэ – Үлэ, нэһилиэккэ – Аҕа сылын чэрчитинэн ыытыллар.

✍️ Маргарита Копырина, Майя Ноговицына, “Мүрүчээнэ” оҕо тэрилтэтин иитээччилэрэ

✅ @murusahargata @ulusmedia

#уһуйааннарга

💢 Бүгүн Мүрүтээҕи 15-с нүөмэрдээх "Кэскил" уһуйааҥҥа сахалыы оонньуулары тарҕатааччы, хабылык, хаамыска күрэхтэһиилэрин улууска, өрөспүүбүлүкэҕэ биллэр кыайыылааҕа – иитээччи идэлээх кэллиэгэбит Елизавета Черкашина маастар кылаас көрдөрдө.

Кини хабылык, хаамыска билиҥҥи күрэхтэһиигэ ирдэниллэр быраабылаларын, хайдах оонньонорун билиһиннэрдэ. Онтон “иэрэгэй” диэн бэрт интэриэһинэй сахалыы остуол оонньуутун көрдөрөн күрэхтэһии ыытта. Манна уһуйаан кэлэктиибин үлэһиттэрэ бары кытыннылар.

Бу оонньууга сатабыл, сымса буолуу ирдэнэр эбит. Ким иэрэгэйэ уһуннук эргийэригэр тыҥааһыннаах киирсиилэри көрдүбүт. Кыайыы өрөгөйүн физкултуура инструктора Лаврентий Тарскай биллэ. Оттон 2-с миэстэҕэ Иван Сосин таҕыста, үһүс миэстэ Нарыйаана Егорова буолла.

Кыайыылаахтар идэлээх сойуус кэмитиэтэ (бэрэсс. Е. Григорьева) бэлэмнээбит грамотатынан, мэтээлинэн наҕараадаланнылар. Хас биирдии кыттааччы маннык оонньуулар оҕолорго наадалаахтарын, өссө да сайдар кэскиллээҕин бэлиэтээтилэр.

✍️ Галина Матвеева, сэбиэдиссэй

✅ t.iss.one/murusahargata @ulusmedia

#уһуйааннарга

💢 Сыл бастыҥ иитээччитин күрэһигэр ситиһиилэннибит
 
Кулун тутар 27-30 күннэригэр Дьокуускайга "2023 сыл бастыҥ иитээччитэ" идэ таһымын көрүү 14-с сылын ыытыллар өрөспүүбүлүкэтээҕи күрэхтэһиитигэр "Мүрүчээнэ" оҕо тэрилтэтин педагог-логопеда Ульяна Омукчанова үрдүк таһымнаахтык кыттан биэс финалист ахсааныгар киирдэ.

Барыта 32 улуустан иитээччи идэлээхтэр кытыннылар. Ульяна Васильевна кэллиэгэтинээн Олеся Юрьевналыын хас эмит сыллаах үлэлэрин түмэн, оҕо тылын сайдыытын сылыктаан көрүүгэ альбом уонна оҕо тылын кэһиллиитин көннөрүүгэ айбыт "Дорҕоон холбуката" мас оонньууларынан кыттан, маастарыстыбаларын көрдөрөн киэҥ сэҥээриини, дьүүллүүр сүбэ үрдүк сыанабылын ылыахтарын ыллылар.

Ону таһынан төрөппүттэргэ Бильгоу дуосканы дьиэтээҕи усулуобуйаҕа хайдах туттарга сэминээр ыытан истээччилэр махталларын, хайҕалларын ылла. Бу тэрээһиҥҥэ тэрилтэбит бүтүннүү биир сүбэнэн көмө-тирэх буолла.

Түмүккэ икки кыайыылаах таҕыста. Ньурбаттан сылдьар Антоновка "Ромашка" оҕо тэрилтэтин эбии үөрэхтээһинин педагога В.А. Егоров бастаан Бүтүн Арассыыйа таһымыгар барар чиэһи сүктэ. Оттон Сунтаар "Ньургуһун" оҕо тэрилтэтин иитээччитэ Н.А. Алексеева төрөөбүт тылы үөрэтэр иитээччилэр күрэстэригэр Осетияҕа кыттар буолла.

Быйылгы күрэхтэһии өрөспүүбүлүкэбитигэр – Үлэ, дойду үрдүнэн Педагог уонна уһуйааччы сылыгар анаммыта бэлиэ буолар. Бу биһиги улууспутугар иккис финалист:
2017 сыллаахха Курбуһахтааҕы "Чуораанчык" оҕо тэрилтэтин иитээччитэ Ольга Бурнашева ситиһиилээхтик кыттан СӨ үөрэҕириитин туйгуна ааты ылбыта. Онон бэйэбит бэйэбитигэр үтүөкэн бэлэх оҥоһуннубут диэн үөрэбит, астынабыт. Ульяна Васильевнабытынан киэн туттабыт, махтанабыт. Инникитин өссө айымньылаах, таһаарыылаах үлэни баҕарабыт.

 ✍️ Анна Алексеева, “Мүрүчээнэ” оҕо тэрилтэтин бас иитээччитэ

✅ t.iss.one/murusahargata @ulusmedia

#уһуйааннарга

Оҕоҕо математическай толкуйдаах оонньуулар олус көдьүүстээхтэр

Оҕо киһи быһыытынан сайдарыгар олук ууруллар кэмэ оскуола иннинээҕи сааһа. Хас биирдии иитээччи билиҥҥи кэмҥэ сиэр-майгы, өй-санаа өттүнэн сайдыылаах, олоххо бэлэмнээх оҕону иитэргэ дьулуһар.

Ол курдук, оҕо оонньуу таарыйа билэн хаалыахтаах диэн санаанан салайтаран, 3-4 саастаах оҕолорго бэйэ илиитинэн оҥоһуллубут математическай толкуйдаах оонньуулар көмөлөрүнэн эбии дьарыктыыбыт. Бу оонньуулары туһанан оҕо өйүгэр тутар, толкуйдуур дьоҕурун, саҥарар саҥатын, болҕомтотун сайыннарабыт. Маны оҕолор дьиэҕэ эбэтэр уһуйааҥҥа оонньуохтарын сөп.

Оҕо күннээҕи ылыммыт билиитин чиҥэтиини оонньуунан ыытар олус табыгастаах. Математическай толкуйдаах оонньуулары эдэр төрөппүттэр, саҥа үлэтин саҕалаан эрэр иитээччилэр үлэлэригэр туһаныахтарын сөп.

"Сыыппара бэлиэтин бул"
Оонньуу быраабылата: икки оҕо оонньуур. Оонньотооччу ыйытар: “Икки төгүрүк ханна баарый?”, – диир, оччоҕо бастакы оҕо булан, ол таһыгар турунан кэбиһэр, онтон “Икки сыыппара бэлиэтэ ханна баарый?” диир, оччоҕо иккис оҕо ол бэлиэ таһыгар тиийэн турунан кэбиһэр. Ол курдук, биэскэ диэри ханнык баҕар бэлиэттэн саҕалаан баран иһэр. Манна оҕо сыыппара бэлиэтин билэ үөрэнэр.

"Араас өҥнөөх кубиктар"
Оонньуу быраабылата: биирдиилээн олорон оонньууллар. Бэлэм ойуулаах дуоска бэриллэр, манна оҕо өҥнөөх хаптаҕай кубиктары өҥнөрүнэн сөп түбэһиннэрэн ууран иһиэхтээх. Оонньуу көмөтүнэн оҕо өҥнөр ааттарын билэр буолар.

Салгыы комментарийдарга көр⏬⏬⏬

✍️ Галина Куприянова, Уһун Күөллээҕи “Чуораанчык” оҕо саадын иитээччитэ

☑️ https://мюрюгазета.рф/article/94111

✅ t.iss.one/murusahargata @ulusmedia

#уһуйааннарга

💢 Мындааба уһуйааныгар "Иитээччи көмөлөһөөччүтэ" улуустааҕы куонкуруска Варвара Стручкова кыайда

Мындааба бөһүөлэгин "Күнчээнэ" уһуйааныгар ыытыллыбыт улуустааҕы куонкуруска биэс кыттааччы күөн көрүстэ – Суоттутааҕы "Кустук" уһуйаантан Анастасия Соловьева, Мүрүтээҕи "Мүрүчээнэ" оҕо тэрилтэтиттэн Айталина Мигалкина, Арыылаах бөһүөлэгин "Кэнчээри" оҕо саадыттан Евгения Сивцева, Мүрүтээҕи "Кэскил" уһуйаантан Мария Гоголева уонна Мындааба "Күнчээнэтиттэн" Варвара Стручкова.

Кыргыттар уопсайа биэс түһүмэххэ тургутустулар. Түһүмэхтэр быыстарыгар "Күнчээнэ" уһуйаан иитээччилэрэ уонна иитиллээччилэрэ ырыа доҕуһуоллаах эҕэрдэлэрин тиэртилэр.

Доруобуйаны харыстыыр инструктор Акулина Черкашина уонна уһуйаан ас астааччыта Александра Андросова мустубут ыалдьыттарга битэмииннээх, оҕо доруобуйатыгар туһалаах, киһи бары сөбүлүүр смузитын оҥорууга маастар-кылааһы көрдөрбүттэрин мустубут дьон олус кэрэхсээтилэр.

Күрэхтэһиигэ олус да талааннаах, сатабыллаах, үлэлэригэр бэриниилээх кыргыттар мустан, бары араас анал аатынан бэлиэтэннилэр. Ол курдук "Идэҕэ бэринии" – Анастасия Соловьева, "Айар талаан" – Мария Гоголева, "Мааны иитээччи көмөлөһөөччүтэ" – Айталина Мигалкина, "Бастыҥ кэпсээнньит" – Евгения Сивцева. Оттон "Бастыҥ иитээччи көмөлөһөөччүтэ-2023" үрдүк ааты Варвара Стручкова сүктэ.

Түмүккэ кыттааччылар үлэһиттэргэ сөптөөх куонкурустар өссө да ыытылла туралларыгар баҕа санааларын эттилэр.

✍️ Ульяна Ушницкая, Анастасия Кириллова, "Күнчээнэ" оҕо тэрилтэтин иитээччилэрэ

✅ t.iss.one/murusahargata @ulusmedia

#уһуйааннарга

💢 Оҕолорбут доруобуйаны чэбдигирдэр дьарыгы олус сөбүлээтилэр

Доруобуйа нэдиэлэтин чэрчитинэн Мүрү 1 N-дээх орто оскуолатын медицинскэй үлэһитэ Анастасия Жиркова биһиги уһуйааммытыгар ыалдьыттаата.
Олус интэриэһинэй бэсиэдэ, практическай дьарык ыытта, сүбэ-ама биэрдэ.
Анастасия Федоровна практическай дьарыгар анал оҥоhyктары аҕалан, хайдах туhанары көрдөрдө.

Хараҕы, осанканы көннөрүүгэ, тоноҕос, сис былчыҥнарын сайыннарыыга тренажердарга оҕолорго эрчиллиилэри оҥотторбутун олус астыннылар.

Олус интириэhинэй практическай дьарыгын оҕолор болҕойон истэн, араас ыйытыылары биэрэн, хоруйдары ылан, доруобуйаны харыстыырга элбэҕи эбии билэн астынан тарҕастылар.

Анастасия Федоровнаҕа инникитин биhиги тэрилтэбитин кытта үлэлэhэригэр баҕа санаабытын эттибит, махталбытын тиэртибит.

Доруобуйаны кыра оҕо саастан көрүннэххэ, инники ыччаппыт кэскиллээх, уhyн үйэлээх буоларын өйдөөҥ!

✍️ Акулина Черкашина, "Күнчээнэ" оҕо тэрилтэтин иитээччитэ

t.iss.one/murusahargata @ulusmedia

#уһуйааннарга

💢 «Нивал» күөн-күрэс бастакытын улуус таһымыгар ыытылынна

Оҕо оонньуу нөҥүө сайдарын бары билэбит. Ахсаан курдук ыарахан өйдөбүлү оҕоҕо тиэрдэргэ «Нивал» оонньууну туттабын. "Мүрүчээнэ" уһуйааҥҥа оҕолору түргэнник өйгө суоттуурга дьарыктыырым бэһис сыла. Маҥнай биир бөлөх оҕолоругар үөрэтэн, төрөппүттэригэр маастар кылаас ыытан, оҕолорго күрэхтэһии тэрийэн «Мүрү саһарҕатыгар» сырдатан саҕалаабытым. Онтон уһуйаан иитээччилэригэр семинар ыытан, үөрэтэн атын бөлөхтөр истэригэр турнир ыыппытым.

Быйыл улуус иитээччилэригэр «Нивал» оонньуу быраабылатын үөрэтэн сэминээр ыыппытым, онтон муус устар 5 күнүгэр аны 5-6 саастаах оҕолорго улуустааҕы турнир буолбута. Өйү сытыылыыр, түргэн суокка үөрэтэр оонньууга улуус 5 уһуйааныттан 28 оҕо кытта кэлбитэ (Чараҥ “Кэрэчээн”, Кэптэни “Чэчир”, Бороҕон “Мичээр”, “Сардаана” уонна “Мүрүчээнэ” уһуйаан “Росточек”, “Юнион”, “Любознатики”, “Алыптаах хонуу”, “Созвездие” бөлөхтөрө). Ол иһигэр 18 бэлэмнэнии бөлөх, 10 улахан бөлөх оҕолоро кыыс-уол диэн арахсан күөн көрсүбүттэрэ.

Маннык күөн-күрэс оҕону доҕордоһорго, өйүн сайыннарарга көҕөлүүр, быраабыланы тутуһан оонньуурга үөрэтэр. Кыттыбыт оҕолор бары туоһу сурук туппуттара. Оттон кыайыылаахтар мэтээл кэтэн, грамота ылан уонна долоҕойу сайыннарар оонньууларынан наҕараадаланан үөрэн-көтөн тарҕаспыттара. Оҕолору турнирга бэлэмнээн эрчийбит иитээччилэргэ эмиэ махтал суруктары туттарбыппыт.

Бастакытын улуус таһымыгар ыытыллыбыт «Нивал» оонньуу турнирын кыттыылаахтарын флейтист кыргыттар, ырыаһыт оҕолор эҕэрдэлээн киэргэппиттэрэ. Инникитин бу оонньууну элбэх оҕо оонньоон сайдыан баҕарабын.

✍️ Лидия Петрова, “Мүрүчээнэ” уһуйаан иитээччитэ

☑️ Сиһилии: https://мюрюгазета.рф/article/94754

✅ t.iss.one/murusahargata @ulusmedia

#уһуйааннарга

💢 Бороҕоннооҕу “Кэскил” уһуйааҥҥа бүгүҥҥү Космонавтика күнүгэр араас хабааннаах тэрээһиннэр буоллулар.

Киһи космос куйаарын баһылыыра, наука эйгэтэ хайдах сайдан испитин көрдөрөр киэҥ ис хоһоонноох быыстапка оҕолор болҕомтолорун тарта. Манна космонавтар хаартыскалара, скафандр көрдөрүүгэ турда, иитээччлэр өссө фотозона тэрийэн оҥордулар.

Оҕолор билиилэрин хаҥатан викториналар, хамсанылаах оонньуулар ыытылыннылар, бөлөхтөрүнэн космонавтика тиэмэтигэр уруһуйдаатылар.

Оттон бэлэмнэнии бөлөх итиллээччилэрэ улуустааҕы Сэһэн Ардьакыап аатынан түмэлгэ тиийэн Станислав Луковцев Космонавтика уонна авиацияҕа аналлаах быыстапкатын олус болҕойон, сөҕөн-махтайан көрдүлэр.

Онон бүгүҥҥү күн кырачаан иитиллээччилэрбитигэр умнуллубатык, олус интэриэһинэйдик ааһан эрэр.

✍️ Александра Васильева, бэлэмнэнии бөлөх иитээччитэ

☑️ https://vk.com/wall-219778198_14

✅ t.iss.one/murusahargata @ulusmedia

#уһуйааннарга

💢 "Мүрүчээнэ" уһуйааҥҥа иитээччилэр айбыт оонньууларын көрүү-быыстапка тэрилиннэ

Бүгүн "Мүрүчээнэҕэ" Педагог уонна Настаабынньык сылынан педагогтар бэйэлэрэ айан таһаарбыт оонньууларын быыстапката тэрилиннэ. Барыта 15 иитээччи, 4 специалист 37 оонньуунан кытыннылар.

Аҕа сүбэһит Галина Иванова, бас иитээччи Анна Алексеева, үрдүк категориялаах иитээччи Ирина Окоемова састааптаах дьүүллүүр сүбэ оонньуулары оҕо сааһыгар сөп түбэһиитинэн, өйүгэр-санаатыгар тиийимтиэтинэн, табыгастааҕынан, саҥа сүүрээнинэн, матырыйаалын хаачыстыбатынан уонна сайыннарар-үөрэтэр өрүтүнэн сыаналаатылар. Оонньуулары иккилии 1-кы, 2-с, 3-с миэстэлэргэ араардылар.

✍️ Анна Алексеева, бас иитээччи

☑️ Сиһилии: https://мюрюгазета.рф/article/94857

✅ t.iss.one/murusahargata @ulusmedia

#уһуйааннарга

💢 "Сардаанаҕа" уһуйаан саастан айылҕаҕа тапталы иҥэрэллэр

Бүгүн Мүрүтээҕи «Сардаана» оҕону сайыннарар киин – оҕо саадын бырайыагынан төрдүс төгүлүн улуустааҕы «Мин айылҕа оҕотобун» экологическай научнай-практическай кэмпириэнсийэ буолан ааста. Күрэскэ 16 оҕо тэрилтэтиттэн бэлэмнэнии бөлөх 24 иитиллээччитэ кыттыыны ылла.

Кэмпириэнсийэҕэ кырачааннар дакылааттарын икки секциянан үс хайысханан (флора, фауна, айылҕа көстүүтэ) көмүскээтилэр. Дьүүллүүр сүбэҕэ үөрэх управлениетын начаалынньыга, сүрүннүүр исписэлииһэ, юннатскай станция педагогтара, айылҕа харыстабылын иниспиэктэрэ үлэлээтилэр.

«Флора» хайысхаҕа 1-кы миэстэни – Зарина Ефимова («Мичээр», Мүрү), 2-с миэстэни – Дуня Окоемова («Кэнчээри», Танда), 3-с миэстэни – Сахаяна Нартахова («Сардана», Дүпсүн) уонна Артем Губарев («Мичил», Мүрү) ыллылар.

«Фауна» хайысхаҕа кыайыылааҕынан Алимпия Акимова («Кэскил», Дүпсүн), иккис миэстэҕэ Айнаара Григорьева («Сардаана», Мүрү), үһүс миэстэҕэ Ярик Гуляев («Чуораанчык», Майаҕас) уонна Эрик Рожин («Чуораанчык», Уһун Күөл) таҕыстылар.

Оттон «Айылҕа көстүүтэ» хайысхаҕа 1-кы миэстэни үс хайысханан – Тимур Алексеев («Сардаана», Мүрү), 2-с миэстэни – Сандаара Копырина («Чэчир», Кэптэни), 3-с миэстэни – Кира Саввинова («Мүрүчээнэ», Мүрү) ыллылар.

✍️ Мария Аргунова

☑️https://мюрюгазета.рф/article/94940

✅ t.iss.one/murusahargata @ulusmedia

#уһуйааннарга

💢 Уһуйааннарга – "Доруобуйа нэдиэлэтэ"

"Мичил" оҕо саадыгар оҕолору, төрөппүттэри успуордунан дьарыктанарга, чөл олоххо көҕүлээн, "Доруобуйа нэдиэлэтигэр" араас бэсиэдэлэри, оонньуулары, үөрэхтээһиннэри ыыттылар.

Төрөппүт, сиэстэрэ үөрэхтээх С.И. Егорова оҕуруот аһа, фрукталар туһаларын, оҕо саадын повара Е.К. Портнягина битэмииннээх салааттары оҥорууну, иитээччилэр киһи этэ-сиинэ туохтан турарын билиһиннэрдилэр.

Иитиллээччилэр К. Чуковскай "Мойдодыр", А.Барто "Девочка чумазая" айымньыларын ааҕаан, чэгиэн буоларга үгүһү биллилэр. Психолог-педагог А.Г. Макарова төрөппүттэргэ бэсиэдэни оҥордо. Маны тэҥэ оҕолор "Чөл олоҕу талабыт", "Тус туттар тэриллэрим" тиэмэлэринэн уруһуйдарын быыстапката, араас хамсаныылаах, "оруолларынан" оонньуулар, көрдөөх стартар буоллулар.

Инструктор-иитээччи Л.Н. Дьячковскай "Эти-хааны эрчийии" диэн чэбдигирдэр хамсаныылары оҥоттордо. "Доруобуйа нэдиэлэтэ" маннык араас хайысханан олус интэриэһинэйдик ааһан, туһалаах буолла.

✍️ Алина Никифорова, "Мичил" оҕо саадын сэбиэдиссэйэ

✅ t.iss.one/murusahargata @ulismedia

#уһуйааннарга

💢 “Мүрүчээнэҕэ” иитээччилэргэ күөн-күрэс буолла

"Мүрүчээнэ" уһуйааммыт иһинэн Үлэ, Педагог уонна Настаабынньык сылын чэрчитинэн идэ таһымын көрдөрөр "Иитээччи-2023" көрүү-күрэс категорията суох уонна идэтигэр сөптөөх категориялаах иитээччилэр ортолоругар ыытылынна. Манна Майя Ноговицына, Маргарита Копырина “Ымыычаан” эрдэтээҥҥи бөлөх, Пелагея Парникова (“Росточек” бэлэмнэнии бөлөх), Вероника Аммосова (“Созвездие” бэлэмнэнии бөлөх) кытыннылар.

Бастакы күн күрэхтэһээччилэр дьарыктары ыыттылар. Майя Ноговицына – кырачааннарга уруһуй, Пелагея Парникова - бэлэмнэнии бөлөххө сурук, Вероника Аммосова – бэлэмнэнии бөлөххө билэр-көрөр дьоҕуру сайыннарыы, Маргарита Копырина улахан бөлөххө ситимнээх саҥаны сайыннарыы дьарыктарын кыайа-хото тутан көрдөрдүлэр. Дьарыктар бары да оҕо интэриэһин тардар, аныгы ирдэбилэгэ эппиэттиир гына ыытылыннылар.

Иккис күн иитээччилэр бэйэлэрэ үлэлиир педагогическай бырайыактарын кэпсээтилэр. Ол курдук Майя Ноговицына – “Традиционнайа суох ньыманан уруһуйдатыы”, Пелагея Парникова – “Олоҥхонон остуол оонньуулара”, Вероника Аммосова – “Норуот тылынан уус-уран айымньытыгар оҕону уһуйуу”, Маргарита Копырина “Оҕону үлэҕэ иитии” диэн бырайыактарын көмүскээтилэр. Өрөспүүбүлүкэтээҕи күрэс ирдэбилинэн Вероника Васильевна дьарыгын, Маргарита Васильевна бырайыагын нууччалыы тылынан ыыппыттарын хайгыахха эрэ сөп.

Тыҥааһыннаах күрэхтэһии кэннэ кыайыылааҕынан Маргарита Копырина ааттанна, 2-с м. Вероника Аммосова ылла, 3-с м. Пелагея Парникова тигистэ. Онон кыайыылаах уонна 2-с миэстэлээх иитээччилэр кэлэр үөрэх сылыгар улууска кыттар чиэһи сүктүлэр. Кэллиэгэлэрбитин улахан күрэскэ бастакы хардыы оҥорбуттарынан эҕэрдэлиибит. Күрэхтэһиини дьүүллээһиҥҥэ иитээччилэр бүтүн Россиятааҕы күрэстэрин кыттыылааҕа, “Я – педагог” өрөспүүбүкэтээҕи күрэс кыайыылааҕа Александр Артамонов, өрөспүүбүлүкэтээҕи “Сыл бастыҥ иитээччитэ-2023” күрэс финалиһа Ульяна Омукчанова күүс-көмө буоллулар.

✍️ Анна Алексеева, бас иитээччи

☑️ https://мюрюгазета.рф/article/95558

✅ t.iss.one/murusahargata @ulusmedia

#уһуйааннарга

💢«Островок безопасности» күөн-күрэс үрдүк таһымнаахтык ааста

Мүрүтээҕи №15 «Кэскил» оҕо тэрилтэтигэр улуустааҕы «Островок безопасности» диэн күрэс үрдүк таһымнаахтык ааста. Бу конкурс 2015 сылтан тэриллэн оҕону детсад сааһыттан сэрэхтээх буолуу үөрүйэхтэригэр үөрэтэр сыаллаах уонна араас буолар быһылааннарга бэйэ билиитин туһанан тахсалларын ситиһэргэ, биир хамаанда буолан бэриллибит сорудахтары сөпкө оҥорорго соруктаах ыытыллар.

Быйылгы күрэскэ улууспут 8 оҕо тэрилтэтиттэн 28 оҕо кыттыылаах ыытылынна. Оҕолор уопсайа 5 станциянан күрэхтэстилэр. Дьүүллүүр сүбэҕэ улуустааҕы Ис дьыала отделын суолга инспекциятын старшай инспектора В. Мырсанов, баһаарынай инспекция инструктора С. Атласова уонна Мүрүтээҕи юннаттар станцияларын эбии үөрэхтээһинин педагога А. Жиркова үлэлээтилэр.

Тыҥааһыннаах киирсиилэр кэннилэриттэн «Баһаартан сэрэхтээх буолууга бастыҥ» анал ааты – 15 №-дээх «Кэскил» уһуйаан (Бороҕон), «Суол быраабылатыгар бастыҥ» анал ааты – Мындаабатааҕы 12№-дээх «Күнчээнэ», «Бастыҥ медиктэр» – Майаҕастааҕы 14№-дээх «Чуораанчык», «Тулалыыр эйгэни билээччилэр» анал ааты 3№-дээх «Мүрүчээнэ» (Бороҕон) ылары ситистилэр.

Оттон күрэхтэһии 3-с миэстэтин – 3№-дээх «Мүрүчээнэ» (салайааччылар С. Иванова, М. Гуляев), 2-с миэстэтин – Мындаабатааҕы 12№-дээх «Күнчээнэ» (салайааччылар Н. Портнягина, Л. Васильева, Т. Егорова), 1-кы миэстэтин Мүрүтээҕи 15№-дээх «Кэскил» (салайааччылар Л. Бурцева, А. Васильева) ыланнар мэтээллэринэн, кыайыылаах хамаанда көһө сылдьар кубогынан наҕараадаланнылар.

Күрэхтэһии сыалын-соругун ситтэ, аны кэлэр күрэхтэһиигэ хамаандалар өссө бэлэмнэнэн кэлэллэригэр баҕарабыт.

✍️ Н. Егорова, «Кэскил» оҕо тэрилтэтин методиһа

☑️ Сиһилии: https://vk.com/wall-219778198_28

✅ t.iss.one/murusahargata @ulusmedia

#уһуйааннарга

💢 Иитээччи көмөлөһөөччүтүн табыгастаах таҥаһа тигилиннэ😍👍

Сыл ахсын муус устар 28 күнүгэр «Үлэ харыстабыла» диэн анал күн биллэриллэр. Манан сибээстээн муус устар толору бу үлэҕэ ананар.

Мындаабатааҕы 12 №дээх «Күнчээнэ» оҕо саадын үлэhиттэригэр, оҕолоругар, төрөппүттэригэр былааннаах үлэлэр ыытылыннылар.

Ураты тэрээhиммитинэн иитээччи көмөлөһөөччүлэригэр аныгылыы быһыылаах трансформер-униформа презентацията буолла.

Униформаны иитээччи көмөлөһөөччүтэ Александра Самсонова эскизтээн, тигэн оҥордо.

Таҥас иитээччи көмөлөһөөччүтүгэр аналлаах анал чараас матырыйаалтан тигиллибит, санитарнай ирдэбиллэргэ толору эппиэттиир көстүүм: косынка, блузка, передник, ыстаан, инчэйбэт фартук. Оҕолору кытта үлэҕэ өҥө, матырыйаала барыта сөптөөх уонна табыгастаах.

✍️ Акулина Черкашина, "Күнчээнэ" оҕо саадын иитээччитэ

✅ t.iss.one/murusahargata @ulusmedia

#уһуйааннарга

⏺ Дүпсүн «Сардаҥалара» саҥа бырайыакка кытталлар

«Саха Ай Кут» НКО «Все вместе к гармоничному уютному пространству» диэн Ил Дархан гранын бырайыагар Дүпсүннэээҕи «Сардаҥа» оҕо уһуйаана кыттар.

Быйыл сайын ол граны НКО-лар кыайан, коллектив бу бырайыакка оҕо саадын дьиэтин иннинээҕи сирин ландшафтнай көҕөрдүүнэн, дьиэ биир хоһун интерьернай дизайнынан уонна дьиэ үүнээйитинэн көҕөрдүүнэн үлэтин саҕалаата, эһиил түмүктэниэхтээх.

✍️ Пелагея Соловьева, "Сардаҥа" уһуйаан бэтэрээнэ

☑️ Сиһилии: https://мюрюгазета.рф/dypsyn-sardanalara-sana-byrajyakka-kyttallar/

✅ t.iss.one/murusahargata @ulusmedia