📰📰📰

⭕ Олунньу 13 күнүгэр – Төрөөбүт тыл уонна сурук-бичик күнүгэр Сэһэн Ардьакыап аатынан Бороҕоннооҕу улуус устуоруйатын түмэлэ (дир. Дьулустаан Заболоцкай) куйаар ситиминэн "Тыл оонньуута" күрэһи тэрийэн ыытта.

⭕ Оонньуу ис хоһооно бэрт судургу эрээри интэриэһинэй буолла: КЫДАМАЛАҺЫННАРБАТАХТАРЫНААҔАР диэн биир уһун тылтан саамай элбэх аат тылы булан суруйуу.

⭕ Оонньуу биллэриитэ, күрэс төһө даҕаны биир күннээх буоллар, Сахабыт сирин кылгас кэмҥэ тилийэ көтөн, кыттааччы элбэх буолла. Ол курдук Дьокуускай куораттан уонна Муома, Өймөкөөн, Сунтаар, Амма, Мэҥэ Хаҥалас, Нам улуустарыттан төрөөбүт тылларын таптааччылар сэҥээрэн, көхтөөхтүк кыттаннар күрэһи өрөспүүбүлүкэ таһымыгар таһаардылар.

⭕ Оттон бу сонун оонньууну түмэл култуурунай-сырдатар үлэтин сүрүннээччи Альбина Афанасьева иилээн-саҕалаан тэрийдэ. Кини түмүгү таһаарыыга бэйэтэ баар "Кэскил түһэ" ийэ тыл түмсүүтүн көмөлөһүннэрдэ. Дьүүллүүр сүбэ быһаарыытынан аат тыл буолбатах тыллар сотулуннулар, онон бастакы ыытыллыбыт сыыппаралар үгүстэрэ уларыйдылар.

⭕ Барыта 38 киһи илин-кэлин түһүспүттэриттэн "Кылаан кыайыылаах" аатын Дьокуускай куораттан 317 тылы булан ыыппыт Людмила Андросова эрэллээхтик ылла. Бастакы миэстэ Тулунаттан 266 тылы таһаарбыт Ирина Охлопковаҕа тигистэ, иккис миэстэни Бороҕонтон 215 тылы булбут Мария Сивцева уонна үһүс миэстэни эмиэ Бороҕонтон 205 тылы таһаарбыт Марфа Руфова ыллылар. Итини таһынан оҕолортон соҕотох кыттыбыт Мүрү 1 N-дээх орто оскуолатын 6-с кылааһын үөрэнээччитэ Айхал Неустроев "Кэскиллээх кыттааччы" ааты сүгэр чиэстэннэ.

⭕ Бэлиэтиир буоллахха, улууспутуттан саамай элбэх кыттааччы Тулуна бөһүөлэгиттэн кытынна. Итини түмэл үлэһиттэрэ: "Олохтоох бибилэтиэкэ сэбиэдиссэйин Маргарита Неустроева үлэтин түмүгэ", – дииллэр, кини түмэли кытта ситимнээх үлэтин бэлиэтииллэр.

🖊️ Светлана Бурцева, уопсас. кэрэсп.

✅ @muru.sahargata

#уйгусирэуусалдан
#уусалданхаһыата
#мүрүсаһарҕата
#улуусустуоруйатынмусуойа
#төрөөбүттылуоннасурукбичиккүнэ
https://www.instagram.com/p/CaAA2lcsAjT/?utm_medium=share_sheet