#Kun_tartibi

Dual ta’lim: dastlabki natijalar va istiqbol tashvishlari muhokama qilindi

Mehnat bozoriga kirib kelayotgan yoshlarni to‘g‘ri yo‘naltirish, talabgor kasblarga o‘qitish, ta’lim muassasalarida dual ta’limga e’tiborni kuchaytirish bugungi kunda g‘oyatda dolzarb masaladir.

Bugun O‘rta Chirchiq tumanidagi “Jannatmakon mebel fabrikasi” ishlab chiqarish ustaxonasida dual ta’lim imkoniyati va istiqbollariga bag‘ishlangan amaliy seminar o‘tkazildi.

Tadbirda viloyatimizdagi oliy o‘quv yurtlari rektorlari, o‘rta-maxsus o‘quv yurtlari rahbarlari va ma’lum toifadagi mutaxassislik bo‘yicha kadrlarga talabgor yirik tadbirkorlik sub’eklarining vakillari ishtirok etdi.

Tomonlar mehnat bozoridagi bugungi real talablar asosida kadrlar tayyorlab berish borasida o‘zaro fikr almashdilar. Seminar ishtirokchilari shu yerda mehnat qilib, pul ishlab topayotgan, o‘rta-maxsus o‘quv yurtlarida dual ta’lim asosida tahsil olayotgan yoshlarning mehnat faoliyati bilan tanishdilar.

Yig‘ilishda Oliy ta’lim, fan va innovatsiyalar vazirligi hududiy boshqarmasi boshlig‘i Nasiba Kulbekovaning axboroti eshitildi. Qizg‘in muhokamalarda viloyatda dual ta’limni keng joriy etish, o‘quvchilarni talabga qarab kichik guruhlarga biriktirib, kasb-hunarga o‘qitish tizimi xususida so‘z bordi.

Seminarda Toshkent viloyati hokimi Zoyir Mirzayev ishtirok etdi va nutq so‘zladi.

✅ Telegram 🌐Website 📹YouTube 📸 Instagram✅Facebook 🕊Twitter