#TONGGI_MUTOLAA

💎KICHKINA KATTALARGA

Martaba berganda fe’l ham bersa keng,
Adlu muruvvatdan qilmasa judo.
Dargohi kattalar bor bo‘lsin, lekin
Kichik kattalardan asrasin xudo.

Sen biror eshikka bosh urib borsang,
Yuz bor haq bo‘lsang-da bitmasa ishing,
Bilki, ko‘ksi ichra qalb emas, xarsang,
Kichkina kattadir uchragan kishing.

Sen olim bo‘lsangu ixtiro bilan
Lol qilgudek bo‘lsang agar dunyoni,
Senga yo‘l ochguncha bir imzo bilan
Kichkina kattaning uzilar joni.

Tadbirkor bo‘lsangu el nafi uchun
Bir tadbir o‘ylasang, izlasang chora,
Ular topar albat yechilmas tugun,
Suyaging qolguncha qilar ovora.

Askar qasam ichar bo‘lmoqqa fido,
Tabib qasam ichar baxsh etmoqqa jon.
Kichkina kattalar ont ichar ammo
“Falon bo‘lay, seni qilmasam sarson”.

Chinor bo‘lsang, ular kemirguvchi qurt,
Po‘lat bo‘lsang, ular yemiruvchi zang.
Ey tangrim, el unmas, qad ko‘tarmas yurt
Kichik kattalarga insof bermasang.

Hech kimsa bo‘lmagan dunyoga ustun,
Uqboga zar olib ketmagan odam.
Kattayu kichikning boshida bor kun
Kelar, axir kichik kattalarga ham.

Men she’r aytdim, xolos, ne ham qilay man,
Ne iloj, iztirob jonga o‘t qalar.
Faqat ko‘nglingizga imon tilayman,
Diyonat tilayman, kichik kattalar.

KICHKINA KATTALARDAN ASRASIN XUDO!...

✍️Erkin Vohidov
O‘zbekiston Qahramoni, O‘zbekiston xalq shoiri

🖊Toshkent viloyati maktabgacha va maktab taʼlimi boshqarmasi matbuot xizmati
——————————————————-
Kanalni yaqinlaringiz bilan ulashing
Telegram   |   Facebook

#TONGGI_MUTOLAA

💐TASAVVUR
Bolalik ekan-da,
Muallimimdan
So‘rabman bir kuni:
— Ayting-chi, agar —
Yer shunday tezlikda aylansa chindan,
Ne uchun to‘kilib ketmas odamlar?

Yodimdan chiqmaydi bir chelak suvni
Muallimbosh uzra aylantirgani.
Qatra to‘kmay yerga qo‘yarkan uni,
Tushundingmi, deya mendan so‘rgani.

Yillar o‘tib ketdi va lekin hamon
O‘sha ilk tasavvur yashaydi menda.
Bir chelak suv kabi aylanar jahon,
Men-chi, bir tomchiman o‘sha to‘lqinda.

Uchqur zamon bilan qalqib, chayqalib,
Charx urib boraman girdoblar aro.
Beshafqat tezlikdan asabim tolib,
Bir nafas tin olsam deyman-u, ammo —
Mendami ixtiyor?
Yugurar zamon,
Shiddati o‘tadi har bir tolamdan.
To‘xtasam, to‘kilgum bir tomchisimon,
Tomchidek yo‘q bo‘lib ketgum olamdan.

🖊Toshkent viloyati maktabgacha va maktab taʼlimi boshqarmasi matbuot xizmati
——————————————————-
Kanalni yaqinlaringiz bilan ulashing
Telegram   |   Facebook

#TONGGI_MUTOLAA

💐"Yoshligim"
✍️Muhammad Yusuf

🖊Toshkent viloyati maktabgacha va maktab taʼlimi boshqarmasi matbuot xizmati
——————————————————-
Kanalni yaqinlaringiz bilan ulashing
Telegram   |   Facebook

#TONGGI_MUTOLAA

💎USTOZ BO‘LMASA

Iymon qayda edi, ustoz bo‘lmasa,
Urfon qayda edi, ustoz bo‘lmasa.
Sohibqiron qayda, Navoiy qayda,
Cho‘lpon qayda edi, ustoz bo‘lmasa!

Yo‘qsillar yurtiga dunyo keltirgan,
Sahrolar bag‘riga daryo keltirgan,
Ul yurtdan bul yurtga ziyo keltirgan,
Karvon qayda edi, ustoz bo‘lmasa!

Muallim atalgan, buyuk atalgan,
Ardoqlangan mudom, suyuk atalgan,
Olti asr avval ko‘kka qadalgan,
Narvon qayda edi, ustoz bo‘lmasa!

Ko‘nglidan taralgay ming bitta irmoq,
Kunduzi quyoshdir, kechalari moh,
Aqlin ekib yerga, ko‘tarilgan tog‘,
Xirmon qayda edi, ustoz bo‘lmasa!

U shundoq yashaydi, tug‘ilgan shunday,
Zarrasi behisob, bir siqim qumday,
Mardlikdan dars olgan -Jaloliddinday,
Qurbon qayda edi, ustoz bo‘lmasa!

She’r bitsam, SO‘Z topib, g‘amimni yegan,
Ko‘ngil deb atalmish zo‘r ilhom bergan,
Chor tomoni gulzor, she’riyat degan,
Bo‘ston qayda edi, ustoz bo‘lmasa!

Muallif:
O‘lmasbek Samarqandiy .

🖊Toshkent viloyati maktabgacha va maktab taʼlimi boshqarmasi matbuot xizmati
——————————————————-
Kanalni yaqinlaringiz bilan ulashing
Telegram   |   Facebook

#TONGGI_MUTOLAA

💎DO‘STIM OMONMISIZ?

Do‘stim omonmisiz, joningiz sog‘mi,
Ishlar avjidami, kayfiyat chog‘mi?
Bir diydor bersangiz, bag‘rimga bossam,
Men tomon kelguvchi yo‘llar yiroqmi?

Ancha bo‘lib ketdi, sog‘inchim to‘kib,
Hol so‘rab sms yozganimga ham.
Balki unutgansiz, ehtimol ish ko‘p,
Yo so‘zim ko‘ngilga bermadi malham.

Telefonim ichida qadrdon odam,
Sizning ismingizni ko‘raman gohi.
Qo‘ng‘iroq qilaman, javob yo‘q mudom,
Aytsin telefonimning bo‘lsa nigohi.

Mendan nima o‘tdi, sukutsiz nechun,
Qaysi yo‘lingizga g‘ov bo‘ldim, to‘sdim?
Mayli, borligingiz dalda men uchun,
Qayda bo‘lsangiz ham sog‘ bo‘ling do‘stim!

Yana almashgandir «toychoq» hoynahoy,
Allohim aylasin sizni ziyoda!
Menda hamon o‘sha: eski hovli joy,
Yo‘l yurib kelaman hamon piyoda.

Ming shukur! Nolish yo‘q, dilda yo‘q yaro,
She’r yozib yuribman qog‘oz qoralab.
Siz dunyo kezasiz G‘arbu Sharq aro,
Mening umrim o‘tar ko‘ngil oralab.

Bugun eslashaylik - Diydor damidir,
Har yaxshi kunimiz umr zarhali.
Ikki og‘iz suhbat dil hamdamidir,
Keling uchrashamiz, oqshom mahali.

💐Yaqinlarni yo‘qlab turing! Kuningiz xayrli o‘tsin!

🖊Toshkent viloyati maktabgacha va maktab taʼlimi boshqarmasi matbuot xizmati
——————————————————-
Kanalni yaqinlaringiz bilan ulashing
Telegram   |   Facebook