#Keles_Open
#Sport
#Toshkent_tumani

700 dan ziyod yoshlarni birlashtirgan "Keles Open" xalqaro turniri

Joriy yil 15-16 iyun kunlari Toshkent tumani sport maktabiga qarashli "Universal" sport majmuasida sportning karate WKF turi boʻyicha "Keles Open-2024" beshinchi anʼanaviy xalqaro turniri boʻlib oʻtdi.

Oʻzbekiston Respublikasi sport vazirligi, Toshkent viloyati sport boshqarmasi, Toshkent tumani hokimligi, Oʻzbekiston karate WKF assotsiatsiyasi, Yoshlar ishlari agentligi Toshkent tumani boʻlimi, Toshkent tumani sport maktabi kabi qator tashkilotlar "Keles Karate" sport klubi bilan hamkorlikda oʻtkazilgan mazkur xalqaro turnir yuqori saviyada tashkil etildi.

Oʻzbekiston Respublikasi Prezidentining 2023-yil 3-noyabrdagi PQ- 356 sonli "Karate (WKF) sport turini yanada rivojlantirish chora-tadbirlari toʻgʻrisida"gi qarori ijrosini taʼminlash hamda iqtidorli sportchilarni saralash orqali terma jamoalarga munosib nomzodlarni aniqlash maqsadida tashkil etilgan mazkur musobaqada mamlakatimizning barcha hududlaridan hamda qoʻshni Qozogʻiston va Tojikiston davlatlardan 5 yoshdan 18 yoshgacha va 18 yoshdan katta boʻlgan 700 nafardan ziyod sportchilar gʻoliblik uchun kurash olib borishdi.

Murosasiz va qizgʻin bahslarga boy tarzda oʻtgan beshinchi anʼanaviy turnirni "Keles Karate" sport klubi rahbari Dilshod Yusupov, musobaqa bosh kotibi Xurshid Shodibekov, bosh hakam Zokir Hayitmatovlar boshchiligidagi 30 nafar hakamlar guruhi boshqarib borishdi.

Ikki kun davom etgan murosasiz bellashuvlarning yakuniy natijalariga koʻra, umumjamoa hisobida faxrli birinchi oʻrinni Toshkent viloyati karatechilari qoʻlga kiritdi. Ikkinchi oʻrinni Qashqadaryo viloyati jamoasi egallagan boʻlsa, uchinchi oʻrinlar Sirdaryo va xorazmliklarga nasib etdi.

Tadbir, Yoshlar oyligi doirasida o'tkazildi va unda nafaqat Toshkent tumani, balki mamlakatimizning har bir viloyatidan, qolaversa Qozog'iston va Tojikiston Respublikasidan tashrif buyurgan 700dan ziyod yoshlarni birlashtirishga erishildi.

✅Telegram 💬Facebook 📸Instagram 📹YouTube 🌍Website