ንዝሓለፉ 6 መዓልታት ካብ ስራሕ ተኣጓጒለን ዝቐነያ ኣብያተ ዕዮ ዞባ ደቡብ ሎሚ ስሩዕ ስረሐን ጀሚረን።

ጉዳያት ኮሙኒኬሽን እቲ ዞባ ሎሚ ሓምለ 21/2017 ዓ.ም ንቲክቫህ ኢትዮጵያ ቤተሰብ መቐለ ኣብ ዝሃቦ ሓፂር ሓበሬታ : ዋና ኣማሓዳሪ ሃፍቱ ኪሮስ ሓዊሱ ኩሉ ኣመራርሓ ኣብ ስሩዕ መንግስታዊ ስርሑ ይርከብ።

ፕሬዜዳንት ታደሰ ወረደ (ሌ/ጀነራል) ምስ ወከልቲ ህዝብን ኣመራርሓ ዞባን ዘካየድዎ ዘተ ዝፈጠሮ ተነፃፃሪ ምርድዳእን ርግኣትን ፈጢሩ ዝበለ ጉዳያት ኮሙኒኬሽን : እቲ ዘተ ሓምለ 27/2017 ዓ.ም ክካየድ ቆፀሮ ተታሒዙ ኢሉ።

ፕሬዜዳንት ታደሰ ወረደ (ሌ/ጀነራል) "ንኣማሓዳሪ እታ ዞባ ካብ ሓምለ 14/2017 ዓ.ም ካብ ሓላፍነት ኣልዒለ " ምባሎም ስዒቡ ኣብ'ቲ ዞባ ወይህዱእ ኩነታት ቀንዩ።

ኣማሓዳሪ ዞቦኦም "ብዘየእምን ምኽንያት ኦዮም ተላዒሎም " ኢሎም ዝኣምኑ ነበርቲ ራያ ዓዘቦ ትማሊ ሓምለ 20/2017 ዓ.ም ቁጥዐ ዝተሓወሶ ሰላማዊ ሰልፊ ኣካይዶም እዮም።
@tikvahethiopiatigrigna

ውፅኢት ብሄራዊ ፈተና ሻምናይ ክፍሊ ዘበነ ትምህርቲ 2017 ዓ.ም ዕላዊ ኮይኑ።

ኣብ'ቲ ሓምለ 21/ 2017 ዓ.ም ኤጄንሲ ምርግጋፅ ፅሬት ትምህርቲ ትግራይ ዕላዊ ዝገበሮ ውፅኢት : ብመሰረት ዝተወሰነ መሕለፊ ነጥቢ 31,246 ኣንስትዮ ዝርከብኦም 61,140 (94.06%) ተምሃሮ ናብ ዝቕፅል ደረጃ ክፍሊ እንትሓልፉ ፤ 1,969 ኣንስትዮ ዝርከብኦም 3,901 (5.94%) ተምሃሮ ደጊሞም ኣለዉ።

865 ኣንስትዮ ተምሃሮ ዝርከብኦም 2,026(3.02%) ተምሃሮ ድማ ብዝተፈላለየ ምኽንያት ተመዝጊቦም ከይተፈተኑ ዝተረፉ እዮም።

ኣብ'ቲ ካብ ሰነ 4-6 / 2017 ዓ.ም ኣብ ትሕቲ ጊዚያዊ ምምሕዳር ትግራይ ካብ ዝርከባ 80 ወረዳታት ኣብተን 79 ወረዳታት 1,165 መፈተኒ ናቑጣታት 33,215 ኣንስትዮ ዝርከብኦም 65,041 ተምሃሮ ንፈተና ከምዝቐረቡ ይዝከር ከም ሓበሬታ ኤጄንሲ ምርግጋፅ ፅሬት ትምህርቲ።
@tikvahethiopiatigrigna

ቤት-ፍርዲ ክልል ትግራይ ብር 500,573,309.86 ንመምህራን ትግራይ ክኽፈል ውሳነ ሂቡ ።

ላዕለዋይ ቤት ፍርዲ ትግራይ ሎሚ ሓምለ 22/2017 ዓ/ም ኣብ ኣብ ዝሰየሞ መጋባእያ ውዙፍ መሃያ ናይ 17 ኣዋርሕ መምህራን ዝምልከት ተኸሳሲ ቢሮ ትልምን ፍይናንስን ክልል ትግራይ ኣብ ሒሳብ ቑፅሪ 1000537846724 ባንኪ ንግዲ ኢ/ያ ተኣጊዱ ዝፀንሐ ብር 500,573,309.86 ን መምህራን ትግራይ ክኽፈል ወሲኑ ።
@tikvahethiopiatigrigna

ህዝቢ ትግራይ ፀቕጥታትን ምግላልን በዚሑዎ ተገዲዱ ተስፋ ናይ ዝሰኣነ ውሳነ ከይውስን ጥንቃቐ የድሊ ኢሎም
ፕረዚደንት ታደሰ ወረደ ( ሌ/ጀነራል) ።

እቶም ፕሬዚዳንት እዚ ዝበሉ ብዋና ኮሚሽነር ፕሮፌሰር መስፍን ኣርኣያ ዝተመርሐ ጉጅለ ልኡኽ ኮሚሽን ሃገራዊ ምኽክር ኢትዮጵያ ዝተመርሐ ልኡኽ ምስ ካቢኔኦም ብምኻን ኣብ ዘዘራረብሉ እዩ።

ትማሊ ሓምለ 22/2017 ዓ.ም ኣብ ቤት ፅሕፈት ጊዚያዊ ምምሕዳር ኣብ ዝተገበረ ፈላሚ ዘተ : ቅድሚ ሃገራዊ ምኽክር ፓለቲካዊ ዘተ መንግስቲ ትግራይን ፌደራልን ይቐድም ኢሎም ፕሬዜዳንት ታደሰ።

ዕላማ : ዕማማትን ኣንፈታትን ኮሚሽን ሃገራዊ ምኽክር ዘብርሁ ዋና ኮሚሽነር ፕሮፌሰር መስፍን ኣርኣያ ብወገኖም : ሃገራዊ ዘተን ምኽክርን ፀገማት ብዘላቒ ከፍትሑን ዝጀመረ ሰላም ፅኑዕ መሰረት ክህልዎን ፍቱን መድሓኒት እዩ ኢሎም።

ጊዚያዊ ምምሕዳር ትግራይ እቲ ሃገራዊ ምኽክር ኮሚሸን ኣብ ትግራይ ንዘካይዶ ስራሕቲ ከምዝድግፍ ፕሬዜዳንት ታደሰ ወረደ ( ሌ/ጀነራል) ኣረጋጊፆም እዮም።

@tikvahethiopiatigrigna

ፅባሕ ሓሙስ ሓምለ 24/2017 ዓ.ም በብርኪ ሃገር ኣብ ሓንቲ ፀሓይ ተኸላ ፈልሲ 700 ሚሊዮን ክሳለጥ እዩ።

ቀዳማይ ሚንስትር ፌዴሪኢ ኣብይ ኣሕመድ ( ዶ/ር ) ሎሚ ሮቡዕ ሓምለ 23/2017 ዓ.ም ኣብ ማሕበራዊ ሚድየኦም ኣብ ዘሕለፍዎ መልእኽቲ " ኩልና ኣብ'ዚ ደሚቕ ታሪኻዊ ፍፃመ ኢድና ንሕወስ " ኢሎሞ።
@tikvahethiopiatigrigna

ኣብ ዋና ቤት ፅሕፈት ፓርቲ ዴሞክራሲያዊ ስምረት ትግራይ ጥቕዓት ምብፅሑ ተፈሊጡ።

ፓርቲ ስምረት ሎሚ ሓምለ 23/2017 ዓ.ም ኣብ ዕላዊ ገፅ ማሕበራዊ ሚድዩኡ ከምዝበሎ : "ዝተፈፀመ ዘይሕጋዊ ተግባር ኩሉ ክኹንኖ ይግባእ : " ።

ኣብ ዋና ቤት ፅሕፈት ፓርቲ ዴሞክራሲያዊ ስምረት ትግራይ እንታይ ተፈፂሙ ?

ትማሊ ሰሉስ ሓምለ 22/ 2017 ዓ.ም ለይቲ ሰዓት 4:45 መንነቶም ዘይፍለጡ ብማስክ ገፆም ዝተሸፈኑ ዕጡቓት ኣብ ከተማ መቐለ ዝርከብ ዋና ቤት ፅሕፈት ውድብ ዴሞክራሲያዊ ስምረት ትግራይ ጉድኣት ኣብፂሖም።

ካብቶም መንነቶም ዘይተፈለጡ 5 ዕጡቓት እቶም 3 ናይ ነባር ዩኒፎርም ፍሉይ ሓይሊ ትግራይ ዝተኸደኑ : እቲ ሓደ ድማ ዩኒፎርም ፖሊስ ክዳን ዝተኸደነን ሓዲኡ ድማ ክዳን ሲቪል ዝወደዩ እዮም ።

መንነቶም ዘይተፈለጡ 5 ዕጡቓት ንሓለዋ እቲ ህንፃ ብሓይሊ ኣፈራሪሖምን ደፊኦምን ብምእታው ኣብ ዋና ቤት ፅሕፈት ተለጢፉ ዝነበረ ባነር ነቒሎምዎ እዮም።


ብሔራዊ ቦርድ መረፃ ኢትዮጵያ ሰነ10/ 2017 ዓ.ም ብቑፅሪ 1262/11/15569 ንጊዝያዊ ምምሕዳር ትግራይ ብዝፀሓፎ ዕላዊ ደብዳቤ ፓርቲ ስምረት ክሳብ ጣብያ ወሪዱ ምልመላን ምዝገባን ኣባላት ክፍፅም ኣድላዪ ድጋፍ ክገብር ኣተሓሳሲቡ እዩ።